Read Kahua 1 ESETARASE 4 Bible Online

1 ESETARASE 4 - Kahua bible

1 ESETARASE 4

¹Na mane ni me i anumasia na maneraha ma ki bani sege renia na raramohana na maneraha, ngaia ki tamasi nogana.

²Ngaia ki vi: “Goaku, i mareha rârâ ta na marâ i maveta, vige raramohaga i maveta teharira na mane ga marungigi na agua ma na asi ma na ara ni marâ hato i maveta.

³Ma na maneraha ki raramohaga teharira ngaira hato. Ngaia nga ka na araha iata ma na avanuta. Na mane ka têtê viteana, henaka vi na ta ki bonasira renia.

⁴Manga i bonasira vige heariha heri, ngaira ka katokato vikana. Manga i hagatorangenira ka meraheariha na merongana, ngaira ka arâ, henaka viga gurugi na hungani ma ka hogegi na para ni hinua se na bebetehe.

⁵Ngaira ka mutera na enoni se ga meme ngaira, ma ki asa iata vige haritohegi na bonasiha iana na maneraha. Manga vi ngaira ma ka tehateha igê na hearihatana, ngaira ka totora me tanga na ara ni marâ hato ga rurugugi ma na ara ni marâ hato ga tavogi igê na hearihatana.

⁶Na mane ni tagaraha i mu ka pe arâ tanga na hearihatana, ma ngaira nogata ka totora tanga na maneraha ta apaneni na ngêra hehegitigi iata, ma ka henganingani, hanana viga vurivuri takesi tanga na maneraha.

⁷Henaka vi na maneraha ki veretage ma, ma ki manga i bonasira na enoni ka nahunahu enoni, ngaira ka henahu. Manga i bonasira ka kasira hura na enoni tenia na ruma ni hagaitangiha, ngaira ka kasira hura.

⁸Manga i bonasira ka taharira na merongana, ngaira ka taharira. Manga i bonasira ka hogehoge, ngaira ka hogehoge. Manga i bonasira ka totora ruma, ngaira ka totora ruma.

⁹Manga i bonasira ka hagaerasigi na mu ni ngêra se ga hasihasi na mu, ngaira ka katokato vikana.

¹⁰Na ara ni enoni, henaka i mane ni me se mareha, ngaia ki têtê viteana na maneraha. Matena na maneraha ki gâgâ so ki ngêngê se i totono ma ki kahu mauru ogâga,

¹¹na kariana ka rêrarihia ka anumasia, ma ki bara tangara vige urarâ tenia tangagi na tagaraha iata mareta, suria ngaira ki asa vige haritohe.

¹²Goaku, suria na enoni ka tê viteana na maneraha, vikana ki monari, i mareha rârâ ta na marâ i maveta, vige raramohaga teharia. Nga hanana ngekana.”

¹³Na mane ni me i anumasia na maneraha ma ki bani sege renira na gete ma renia na monariha, ngaia ki tamasi hemuri. Ngaia ka no Serubabele.

¹⁴Ngaia ki vi: “Goaku, i monari, na maneraha ki raramohaga ma na mane ka rako, ma na vaini ki raramohaga. Ma ti kani marungira ma ki hagaotora ngaira hato? Ngaira ka na gete!

¹⁵Na gete kaniga aparara na maneraha ma na ara ni mane hato, ga marungigi na ano ma na asi.

¹⁶Na gete kaniga aparara me. Na gete kaniga marupera na mane ga hasi na mu ni vaini, ga arâ me igê na vaini.

¹⁷Na gete kaniga tagarahigi na gahu, ga hagesuru re na mane. Na enoni ka hagahigasira na mane surira ngaira na gete. I monari, manga vige mareha na gete, na mane ki asa vige oga se vige mauri.

¹⁸Vari, na mane ka nahunigi rako na siliva se na golo se na manimarâ bâkoro getigi, ma ki manga ga bâsia na gete, i bâkoro na maana se na apena,

¹⁹ngaira ka bonotenigi na ruruguha iata, hanana ga borebore manganga renia ma ka tenia teharigi na ruruguha iata.

²⁰Na mane ki pania o vaemana, i marupea, ma ki pania na mako iana, hanana i auragi.

²¹Ngaia ki bonotenirerua vê o vaemana ma kenana ma na apanena iana nikâ, hanana i gâga henia na gete iana mataro me ki meme.

²²Hoi, i rongo mataha tangagamu, vi na gete ka na avanumi. I hega, mu pe tagara raha kamu mavamava ma kamu kahu vatera na gete iami na meni na tagaraha iami?

²³Vari, na mane ki merâ na tatapa borahu iana, hanana i haritaha, ki hanago, ki purupuru bê ma ki tagetage igê na haka i asi ma i ve.

²⁴Vari, ngaia ki meraheariha na laione se i arâ igê na mengo. Ma i murina i purupuru bê, ki hanago ma ki rurugu, ngaia ki kahu migiaporo me na marâ ngegana tanga na gete, ngaia ki takuia bâraha.

²⁵Na mane ki takuia na gete iana teharirerua na enana.

²⁶Tani na mane ki raharaha ma i bêta na gete, ma tani nikâ ka mangara na kare rakuraku iana na gete.

²⁷Tani nikâ ka meme, ka hagaerasigi ngavê na ogaha iata se ga bagatauhata suria ma na gete.

²⁸I monari ngavê, iê? I monari, na raramohana na maneraha ki raha. Na enoni ka magu vige nahuia.

²⁹I ta na matena inê kê bani bâsia na maneraha henia ka Apeme na gete râ ma iana, ka karena o Baratako i rongo raha na atana. Ngaia ki oga so i otona na maneraha.

³⁰Ngaia ki tavoa râ na tarepuri tenia na bêna na maneraha ma ki naka i bêna ngaia marena ma ki bahitaria na maneraha renia na rimana na mahana.

³¹Na maneraha ki bore manganga ma renia. Matena na gete ki mamanamui tanga, ngaia nogana ki mamanamui bê aporo tanga. Matena na gete i mangariaga tanga, ngaia ki nakanaka bêna tanga ma ki tamasi hagaru renia, mataro me ngaia na gete ki obâbakoro aporo.

³²Goaku, manga vi na gete ma ka girara ga katokato vikana, i monari, i mareha rârâ ta na marâ i maveta vige raramohaga teharira.”

³³Na maneraha ma na gavumane ka hesiresire ma. Hemuri o Serubabele ki tamasi renia na monariha.

³⁴Ngaia ki vi: “Goaku, i monari na gete ka raramohaga teha. Hoi, mu takusia manga i he ki raha na maveta, ma manga i he ki kerekê noga na vavearo. Mu takusia, manga i he na arito ki arâ rêrê, matena i rihia rêrê na vavearo i rarona na tangiana gi tage.

³⁵Suria na arito ki arâ vikana, ngaia ki raha ngavê monari. Ma ke bâ, na monariha ki raha ma ki raramohaga teharigi na marâ hato ngegana.

³⁶Na enoni hato i maveta ka hagahigasia na monariha, God ki hagarahasia. Na ara ni marâ hato ga oga ka bubununuga i maana na monariha. I rarona na monariha ki mareha rârâ ta na tarana vige pe oto.

³⁷Mu tarahua na tarana i pe oto igê na vaini, i pasina na maneraha, i pasita na gete, i pasita na ara ni enoni hato, igê na tauhata, ma igê na ara ni marâ hato getigi. I mareha ngavê na monariha i pasita. Na tarani ga pe oto ka oga hete i pasita. Tahema ngaira ka magahuru.

³⁸Ma na monariha ki oga i oga ma ki raramohaga tare. Ngaia ki ama ni gâga nga ma ki ama ni araha nga tare ki bê ki arâ.

³⁹Na têheniana ki mareha igê na monariha ma ki mareha nikâ na paneheniana. Ngaia ki katogi ma na tarani ga oto, mareha vi na tarani ga pe oto se viga erataga. Na enoni hato ka aganarigi na tarani i katogi na monariha.

⁴⁰Na suriha iana na monariha ka korokoro tare. Na monariha ki raramohaga ma ki araha raramohaga hunia. Na ara ni marâ hato ke hagarahasia God ni monariha.”

⁴¹Matena o Serubabele ki tamasi hato, na enoni hato ka ngere, ka vi: “Na monariha ki raha teha. I mareha rârâ ta na marâ vige raramohaga teharia!”

⁴²Hemuri na maneraha ki vi tanga o Serubabele, ki vi: “Igo ko girara ma go nungia na ani mavê na marâ ga bani heaganari renia. Inê be vatego. Igo ko page mane ni hagaotonga iaku ma ka page visigo vi goana na maneraha kani igo.”

⁴³O Serubabele ki arami, ki vi: “Maneraha, gu nakê be hagatakusigo renia na tohenga iamu igê na tangiana go vora re na maneraha igê. Igo ko tohe, vigo tagarahia aporo i Jerusaleme,

⁴⁴ma ko hagatorangenigi aporo na ruruguha hato, ga bani raugi tenia na hinua. Gu takusia o Siro, matena i tohe vi ruhuruhua i Babilone, ngaia ki nakagi bâkoro na ruruguha ngegana, ma ki tohe vi hagatorangenigi aporo tanga i Jerusaleme.

⁴⁵Igo nogamu ko tohe, vigo tagarahia aporo na ruma ni rotu, na ai ni Etome ga bani hagamakaka, matena na ai ni Babilonia ga tê erasia ngavê i Juta.

⁴⁶Tahema maneraha mamahata, inê kê nungigo, hanana gu hagamonaria na tohenga iamu tanga na Araha God.”

⁴⁷Hoi, na maneraha o Tario ki aharaga ki ruia o Serubabele ma ki siginia. Ngaia ki segegi na leta renira na Siu tangara na mane hato ga bâsurigi na haga se ga gavumane se igê na tagaraha getigi surigi na apaneni hehegitigi. Ngaia ki bonasira, hanana ga nakara vê ka arâ purunguni o Serubabele ma na enoni hato ga râ henia, hanana ga tagarahia aporo i Jerusaleme.

⁴⁸Ngaia ki sege leta tangara nikâ na gavumane hato i Siria ma i Punisia ma tangara na ani i Libanone. Ngaia ki bonasira, hanana ga totora râ i Jerusaleme na bagorani na apinige, hanana ga tamania o Serubabele, ki tagarahia aporo na hinua renigi.

⁴⁹Na maneraha ki vategi na leta tangara na Siu hato, ga obania viga aporo i Jerusaleme. Na lete ngegana ka hagamarumungenira na Siu, ka aporo ma ka bonasira na mane hato ga gavumane se ga bâsurigi na haga ma na ani igê na tagaraha getigi, hanana siana ka totoravoro me pusira igê na ani mavê na tarani.

⁵⁰Ngaia ki hagamarumungenira na Siu ka pe vuria na takesi pusigi na mako hato ga ogasigi. Ngaia ki bonasira na ai ni Etome, hanana ga vatera aporo na Siu na hinua ga bani henahuraugi tenira.

⁵¹Ngaia ki surugi na 750 kilo na siliva i na ara ni harisi tanga ga tagarahia aporo na ruma ni rotu mataro me ki uhu,

⁵²henigi na 370 kilo na siliva i na ara ni harisi tanga ga vurigi re na ganiani ga susu renigi i ruma ni rotu hagetangahuru matare pi i na ara ni tangiani.

⁵³Na Siu hato, ga pania i Babilonia, hanana ga tagarahia aporo na hinua i Jerusaleme, ngaia ki hagatatarasira henira na kareta ma na mane ni vogasiha.

⁵⁴Na maneraha ki haribona nikâ vikê: Ga tamanira nga na mane ni vogasiha ma ka vatera nga renigi na gahu ni hagarahenga i ruma ni rotu;

⁵⁵ga tamanira nga na mane ni hagarahenga mataro me na ruma ni rotu ma i Jerusaleme karu uhuuhu maninga;

⁵⁶ga vatera nga na mane hato ga anumasia na hinua renigi na mako henigi na meta.

⁵⁷Na maneraha ki haribona nikâ, manga o Siro i nago, vi na ara ni kere marâ hato tanga na hagarahenga ma na ruruguha tenia na ruma ni rotu, o Siro i bani nakagi bâkoro, ngaigi ka aporo nga tanga i Jerusaleme.

⁵⁸Hemuri o Serubabele na mane na gapu haoru ki hura tenia na kiboru ni hekarigiana, ki maatia i Jerusaleme, ki ahaukê ma ki hagarahasia na Araha God.

⁵⁹Ngaia ki vi: “Araha, na enoni hato ki tuguhira viga hagarahasigo. Igê nga ka na hunani na tehariani ma na takoha mataha.

⁶⁰Araha iata na êvarimami, inê kê visigo koro, suria go haganahuniê inê na na kariamu renia na takoha mataha.”

⁶¹O Serubabele ki tavogi na leta iana na maneraha, ki râ i Babilone, ma ki hagarongora na goana na Siu i ngekana renigi na tarani ga bani akê me.

⁶²Ngaira ka hagarahasia God iata na êvarita, suria i tamanira,

⁶³hanana ga aporo ka tagarahirerua aporo i Jerusaleme ma na ruma ni rotu iana ngaia. Ngaira ka hagarahasia na tarana ngekana surigi na tangiani gi pi. Ngaira ka vagevage ma ka kiki.