Read Kahua 1 ESETARASE 5 Bible Online

1 ESETARASE 5 - Kahua bible

1 ESETARASE 5

¹Hoita, ga atera na bêni na hagosi ninuni, ma na varo ninuni, hanana ga aporo i Jerusaleme henira na gete iata, na kareta, na kare vurivuri ma na togoha iata.

²Na maneraha o Tario ki bonasira na rehagaro na mane ni me igê na hosi, hanana ga bâsurira ka aporo purunguni tanga i Jerusaleme.

³Ngaia ki arira, matena ga angiangi na gogo ma na êhihi, ma na goata na Siu ka mâmâ ma ka vagevage.

⁴Igê nga na atata na mane ga aporo: na varo ninuni na hagosi ninuni ma na ahemata iata.

⁵I berarogata na mane ni vogasiha tenia na hagosi ninuni iana o Pinehasi karena o Arone, ki oga o Josua karena o Josataka. Virana ka no Seraia. O Serubabele ki takua. Ngaia ki no karena o Sealatiele tenia na apaparaha iana o Tavite, tenia na hagosi ninuni iana o Peresi, tenia na varo ninuni iana o Juta.

⁶Ngaia nga kani tamasi tako mataha i maana o Tario na maneraha i Pesia. Ngairerua karu pania i Babilone igê na Nisane na hageha hagenago igê na ruata na harisi o Tario ki maneraha igê.

⁷Igê nga na atata na mane na Siu ga aporo tenia na agua ga bani henahuraura tanga. Na ahemata iata ka bani oga me i Babilonia, haganega tenia na matena na maneraha o Nebukanesare i henahuraura.

⁸Ngaira ka aporo tanga i Jerusaleme ma i pasita hehegitigi i Juta. Na mane ga bêngenira ka no Serubabele, o Josua, o Nehemia, o Seraia, o Resaia, o Enenio, o Moretekai, o Belesaro, o Asaparaso, o Relia, o Regumu ma o Bana.

⁹Igê nga na atata na apaparaha henira vi gi hita na ani tenigi na apaparaha hehegitigi, ga aporo henira na mane ga bêngenira tenia na agua, ga bani henahuraura tanga. O Parosi — (2172) O Sepatia — (472) O Araga — (756) O Pagata Moaba, na raraha iaterua o Jesua mo Joaba — (2812) O Elama — (1254) O Satu — (945) O Gorebe — (705) O Bani — (648) O Bebai — (623) O Asagata — (1322) O Atonikama — (667) O Bigivai — (2066) O Atini — (454) O Atere, ga hêtana nikâ vi o Gisikia — (92) O Kilane ma o Asetase — (67) O Asaru — (432) O Aniasi — (101) O Arome — (----) O Besai — (323) O Arisipurite — (112) O Baitero — (3005)

¹⁷Na enoni, na êvarita ga bani ogasigi me na hinua igê, kaniga aporo nogata. I Beteleheme — (123) I Netopa — (55) I Anatote — (158) I Bete Asamavete — (42) I Kiriate Jearimi — (25) I Sepira me Berote — (743) Na hinua iata na Gatiasani ma na Amitiani — (422) I Rama ma i Geba — (621) I Mikimasi — (122) I Betele — (52) I Magabisi — (156) I Elama getea me Ono — (725) I Jeriko — (345) I Sena — (3330)

²⁴Igê nga na atata na apaparaha iata na mane ni vogasiha, ga aporo tenia na agua ga bani henahuraura tanga. O Jetaia, na raraha iaterua o Jesua mo Anasibi — (972) O Imere — (1052) O Pasure — (1247) O Garimi — (1017)

²⁶Na apaparaha iata na mane ni hagarahenga ga aporo tenia na agua ga bani henahuraura tanga: O Jesua, o Katamiele, o Banasi ma o Suteasi — (74) Na ani ni kiha i ruma ni rotu, na raraha iana o Asapa — (128) Na mane ga anumasia na ruma ni rotu, na raraha iata o Salumu, o Atere, o Talamone, o Akubu, o Gatita ma o Sobai — (139)

²⁹Na apaparaha iata na mane ga tagara i ruma ni rotu ma ka aporo tenia na agua ga bani henahuraura tanga: O Esau, o Gasupa, o Tabaote, O Kerosi, o Sia, o Patone, O Lebana, o Gagaba, o Akubu, O Utai, o Ketaba, o Hagabe, O Samalai, o Ganane, o Katua, O Geture, o Jairo, o Taisane, O Noeba, o Gaseba, o Gasera, O Usa, o Pinoe, o Asara, O Besai, o Asana, o Meunimi, O Nepisimi, o Akubu, o Hakupa, O Asure, o Parakimi, o Basalute, O Mehita, o Kuta, o Garea, O Barakosi, o Sisera, o Temaga, O Nesiaga, o Gatipa.

³³Na apaparaha iata na mane ga tagara tanga o Solomone ma ka aporo tenia na agua ga bani henahuraura tanga: O Hasopetete, o Peruta, o Jala, O Losone, o Gitele, o Sepatia, O Agia, o Pogerete, o Hasebaimi, O Saroti, o Masia, o Gase, O Atusi, o Subasi, o Apera, O Barotisi, o Sapata, o Atelone.

³⁵Na raraha iata na mane ga tagara i ruma ni rotu ma tanga o Solomone ma ka aporo tenia na agua ga bani henahuraura tanga, ngaira hato ka 372.

³⁶Na 652 tenigi na apaparaha iaterua o Telaia, na raraha iana o Tobia, ma o Nekota, ngaira ka aporo tenirerua na hinua i Tele Melaga me Tele Garasa henira o Gerube, o Atane, ma o Imere, ga bêngenira. Ngaira ki bara tangara vige hagatanga monari, vi ngaira ka na raraha iata na Isiraelita.

³⁸Igê na apaparaha ga vi, vi ngaira ka na apaparaha iata na mane ni vogasiha. Ngaira ki asa vige tarahua ta na pepa i hagatanga monari renia: O Gobaia, o Hakose, ma o Jatusi. Na êvarina na apaparaha iana o Jatusi ki êragia ka Agia, na hitangita ka karena o Baresilai ma ki torea na atana na apaparaha iana o hungâna. Suria i bara tangara vige hagatanga monari, vi o ti ka na êvarita, tahema ki apu tangara vige tagara mangara na mane ni vogasiha.

⁴⁰O Nehemia ma o Atariasi ngairerua karu vi tangara, vi i pe ararira vige ngaugi na ngêra, ga vogasia God renigi mataro me na matena i page rêra akê me na mane ni vogasiha i teha i nahunigi na hê ni girarasiha ma ni monariha.

⁴¹Ngaira hato na Isiraelita, ga tonga na tagahuru matarerua na harisi iata se ga asiba râ ma ka pe enoni tagara — 42.360 Na mane ma na gete tagara — 7.337 Na mane ma na gete ni kiha — 245 Na kamelo — 435 Na hosi — 7.036 Na tonki — 248 Na ani getera na tonki — 5.525

⁴⁴Matena na enoni, ga bani henahuraura, ka ata me igê na agua i Jerusaleme i oga i nago igê na ruma ni rotu iana God, tani na bêni na apaparaha ka tohe, viga page uhungia nga ka tagarahia aporo na ruma ni rotu igê na bani atohana.

⁴⁵Ngaira ka tohe, viga hetamani igê na tagarahiana aporo na ruma ni rotu ma igê na hagarahenga igê renigi na 500 kilo na golo, na 2500 kilo na siliva ma na tuguni tangarê gi tage tangara na mane ni vogasiha.

⁴⁶Na mane ni vogasiha ma na mane ni hagarahenga ma tani na enoni ka kahu oga igê se hagarangia i Jerusaleme, na ani ni kiha ma na mane ga anumasia na ruma ni rotu ka ogasigi na hinua hagarangia i Jerusaleme. Na ani getera na Isiraelita ka ogasigi na hinua iata na êvarita.

⁴⁷Igê na pita na hageha na Isiraelita ka bani ogasigi na hinua iata. Ngaira hato ka haku me igê na mahera i maana na maani para hagenago ma i na apanena bêkê i na agua igê na ruma ni rotu.

⁴⁸O Josua karena o Josataka ma na tamana na mane ni vogasiha, ma o Serubabele karena o Sealitiele henira na goana, ngaira ka tagarahia aporo na bea ni vogasiha tanga God iata na Isiraelita,

⁴⁹hanana ngaira ka susu igê surigi na ramata igê na buka iana o Moise, na kariana koro God.

⁵⁰Tani na enoni i ngekana ga pe Siu, ka ramo teharira na Siu ma ka merongasira. Henaka, ma ngaira ka tamanira igê na tagarahiana aporo na bea ni vogasiha igê na bani atohana. Hemuri na Siu ka haganega aporo ka susu igê i na ara ni mavoraro ma i na ara ni manurahi surigi na ramata.

⁵¹Ngaira ka hagarahasigi na tangiani raha ni ruhu surigi na ramata. I na ara ni tangiana ngaira ka vogasi, na vogasiha i ararigi na ara ni tangiani hehegitigi.

⁵²Nikâ ngaira ka susu igê na tangiani i tuguhira viga susu igê, ma igê na tangiani ni mamaroha, igê na tangiani na hageha haoru, ma igê na tangiani hato getigi tanga ga hakuhaku igê, hanana ga rahesia God.

⁵³Henaka na enoni ka mamêngara vige tagarahia aporo na ruma ni rotu iana God, ma ngaira hato ka haganega ka susu tanga na Araha igê na tangiana hagenago igê na pita na hageha, manga ga bani surua tanga God.

⁵⁴Na enoni ka haku haga, hanana ga vurira re na mane ga tahetahe na hê ma na mane ga totora ruma. Ngaira ka nakagi haku na ngêra, na marâ ni tonoha,

⁵⁵ma na kati, hanana ga kasigi râ i hinua i Taire me Sitone, ka hohoro renigi na apinige na bagora i Libanone, hanana viga page hagataregi i asi tanga na maanitava i Jopa. Ngaira ka kato vikana, surigi na bonasiha iana o Siro na maneraha i Pesia.

⁵⁶Hoi, igê na ruata na hageha i murina ga bani aporo me tanga na agua tanga na ruma ni rotu i Jerusaleme, ngaira ka haganega na tagaraha. Ngaira ka haganega na angisi ruma. O Serubabele, o Josua ma na tamaterua na Siu, na mane ni vogasiha ma na mane ni hagarahenga, ma na enoni hato getera ga bani aporo me tanga i Jerusaleme tenigi na agua ga bani henahuraura tange, ngaira hato kaniga tagara haku.

⁵⁸Ngaira ka kasira na mane ni hagarahenga ga tonga na harisi iata tangahuru gi rua ma ki matara, hanana ga bâsuria na tagarahiana aporo na ruma ni rotu tanga na Araha. O Jesua na mane ni hagarahenga, henira o karena ma na goana, o Katamiele o vesina, ngaira o karena o Jesua Ematabuni, ngaira o karena o Jota karena o Eliatuni, henira hato o kareta ma na goata, hoi, ngaira hato na mane ni hagarahenga kaniga tagara haku renia na tagarahiana aporo na ruma ni rotu. Matena na mane tagara ka tagarahia na ruma ni rotu iana na Araha,

⁵⁹na mane ni vogasiha, ga tuguni manga hanana i marisita, ka ura igê na atohata henigi na ahuri, na êhihi, na gita ma na marâ vigana, ma na mane ni hagarahenga tenia na apaparaha iana o Asapa ka oga i ngekana henigi na marâ ni tarotaroha.

⁶⁰Ngaira ka hagarahasia na Araha ma ka visia koro surigi na ramata iana o Tavite na maneraha.

⁶¹Ngaira ka ki ka hagarahasia na Araha ma ka rugurugua na ki, ka ki vikê: “Na Araha koro ki gâga henira na Isiraelita tare ki bê ki arâ.”

⁶²Na enoni hato ka uhigi na ahuri ma ka ngerengere raha ngavê, ka visia raha na Araha renia na tagarahiana aporo na ruma ni rotu i tavoraha maninga.

⁶³Tani na gemêa, na hitangita na mane ni vogasiha, na mane ni hagarahenga ma na bêni na apaparaha ga bani bâsia na bani ruma ni rotu, ngaira ka râ me ka bâsia na ruma ni rotu haoru ma ka angi bâraha ma ki rugu na obata.

⁶⁴Ma na ani getera ka uhigi na ahuri ma ka ngerengere raha, suria ga vagevage.

⁶⁵Na enoni ka uhigi raha ngavê na ahuri. Na ringeni ki rongo hagatê ngavê. Ma na enoni hagarangigi na ahuri ki bara tangara vige rongogi na ringeni, suria na ringeta na ani ga angiangi ma ki rugu na obata ka rongo raha teha ngavê.

⁶⁶Na merongata na raraha iaterua o Juta ma o Benamino ka rongogi na ringeni na ahuri ma ka râ me viga bâsia na ta.

⁶⁷Matena ga girara vi na Siu, ga bani aporo me tenigi na agua ga bani henahuraura tange, ka tagarahia aporo na ruma ni rotu iana na Araha God iata na Isiraelita,

⁶⁸ngaira ka râ ka bâsira o Serubabele, o Josua ma na bêni na apaparaha ma ka vi: “Nakagami ke tage tagarahia na ruma ni rotu.

⁶⁹Igami ma igamu kaniga rahesia ma na Araha gitage ma igami kami bani vogasia hagenago me tenia na matena o Esaratone na maneraha i Asiria i kasigami me ikê, kami oga ikê.”

⁷⁰O Serubabele, o Josua ma na bêni na apaparaha ka vi tangara, ka vi: “Igami kami pe obanigamu vigamu tamanigami igê na tagarahiana aporo na ruma ni rotu tanga na Araha God iamami.

⁷¹Igami kami tagarahia so maremami, manga i bani bonasigami o Siro na maneraha i Pesia.”

⁷²Hemuri na enoni ga bani oga i Juta ka haganega ka hagamarusi apeta na Siu. Ngaira ka urapusigi na marâ viga arâ me tanga na tagarahiana na ruma ni rotu ma ka urapusira na Siu, hanana vi siana ka tagarahia na ruma ni rotu.

⁷³Na enoni ngegana ka harikato renira na Siu, ka tamasi pusira ma ka oga sutaga bâraha tangara. Ngaira ka hagabarasira vikana na Siu, hanana vi siana ka hatungia na ruma ni rotu igê na matena i maneraha o Siro igê. Na tagarahiana ki mamaro surirerua na harisi gi rua mataro me o Tario ki vora re na maneraha.