Read Kahua 1 ESETARASE 7 Bible Online

1 ESETARASE 7 - Kahua bible

1 ESETARASE 7

¹Hoi, o Sisinesi i bâsuria i Siria me Punisia, o Setare Bosenai ma na tamaterua igê na gavumane ka râ surigi nga na bonasiha iana na maneraha.

²Ngaira ka bâsuria maninga na tagarahiana na ruma ni rotu ma ka tamanira na meraha iata na Siu ma na mane ga tagara i ruma ni rotu.

³Na mane tagara ka têrikitaga igê na tagarahiana na ruma ni rotu. Na poropete o Hagai ma o Sakaria karu hagaramonira.

⁴Na Siu ka hatungia na tagarahiana suria na bonasiha iana na Araha God iata na Isiraelita, suria na maneraha i Pesia o Siro, o Tario ma o Ataseresese ka hagamarumungenira.

⁵Na ruma ni rotu ki uhu igê na tangahuruta gi rua matare oru na tangiana igê na hageha na Atare igê na onota na harisi iana o Tario i maneraha igê.

⁶Hemuri na Isiraelita na mane ni vogasiha, na mane ni hagarahenga ma ngaira hato ga bani aporo me tenigi na agua ga bani henahuraura tange, ma ka bani hakunira-ngaira hato ka râ surigi na ramata hato igê na buka ni ramata iana o Moise.

⁷Igê na hagapuana na ruma ni rotu ngaira ka vogasi igê renira na 100 na puruka mane, na 200 na sipi ma na 400 na kareta na sipi,

⁸ma na 12 na goti tanga na vogasiha ni bonoteniha ni tasi tonganigi na ara ni bêni na varo ninuni iana o Isiraele.

⁹Na mane ni vogasiha henigi na tuguni iata ma na mane ni hagarahenga, na ahemata ma na ahemata, ka oga igê na atohata tangagi na hagarahenga i na ruma ni rotu tanga na Araha God iata na Isiraelita surigi na ramata igê na buka ni ramata iana o Moise. Na mane ga anumasia na ruma ni rotu ka ura tonganigi na maani para ni ruma ni rotu.

¹⁰Na Isiraelita ga bani aporo me tenigi na agua ga bani henahuraura tange, ngaira ka hagarahasia na paseka igê na tangahuruta matare he na tangiana igê na hageha hagenago igê na harisi haoru. Na mane ni vogasiha ma na mane ni hagarahenga ka bani hagamatarotarora mareta igê nga na matena ngekana.

¹¹Mareha vi na Siu hato, ga bani aporo me, kaniga hagamatarotarora mareta igê nga na matena ngekana, nga noga ma na mane ni hagarahenga.

¹²Na mane ni hagarahenga ka nahuira na ganiani tangagi na vogasiha ni paseka tangara na enoni hato, ga bani aporo me, tangara na mane ni vogasiha, ma tangara ngaira hato so mareta.

¹³Na Isiraelita hato, ga bani aporo me tenigi na agua, ga bani henahuraura tange, ngaira hato ka ngêgi na ganiani ni vogasiha. Ngaira ka rahesia na Araha ma ka kasigi râ na tauhata na enoni ahuroto ga oga i berarogata.

¹⁴Surigi na tangiani gi pi ngaira ka hagarahasia na tangiani raha ni bereti i pe ahunga. Ngaira ka vagevagesia na Araha God iata na Isiraelita,

¹⁵suria i tamanira renigi na katoha iana na maneraha i Asiria ma ki katoa na tagaraha iata ki tavoraha bâkoro.