Read Kahua TOBITI 10 Bible Online

TOBITI 10 - Kahua bible

TOBITI 10

¹Igê na matena ngekana, i na ara ni tangiani o Tobiti ki tomanigi vi na tangiani gi hita kani râ surigi i hinua i Ragesi ma ki aporo me. Matena ga hato na tangiana hanana vige aporo me, o Tobiti ki vi tanga kaniana, ki vi:

²“Na ta kani katoa ki hagarihu vê? I hega, o Gabaele ki me vari? Mareha vari ta na enoni, hanana vige vatea na haga?”

³O Tobiti ki anumanuma bâraha renia.

⁴Ka Ana ki vi: “O kareku ki me. Inê kê girara.” Ngaia ki haganega ki angi ma ki angi maramara renia o Tobiasi, ki vi:

⁵“Evaê, o kareku go bâkoro i maaku! Na ta kanigê kasigo ko râ renia?”

⁶O Tobiti ki uhungia vi haganaku parongana kaniana, ki vi: “Kego, haritagi so. Siana ko tako bâraha renia. Ngaia ki gâga bâkoro ma. Ta na marâ vari kani katoa ki hagarihu vê. Ta na marâ vari kani hagabarasia hanana vige aporo me rêrê. Na tamana ka na mane ga girara ga hagêguritogo renia. Ngaia nga nikâ ka na goaka. Kego, siana ko anumanuma bâraha renia. Gu ramo. I sugia ma ge ata me.”

⁷Ka Ana kaniana ki arami, ki vi: “Gu muni vê! Gu nakê so! Siana ko hagabekasiê! O kareku ki me nga!” I na ara ni tangiani ka Ana ki gaha hura tanga na tara i râ igê o Tobiasi, ki gâga naasia ma ki bâbâ renia. Ngaia ki usi vi ta na enoni ke haganaku parongana. Matena i su na arito, ngaia ki aporo banu i ruma. Ngaia ki pe mêru rârâ ma ki angiangi maramara ma hete renia o karena igê na bungiana hagenani. Garu hato noga na viki gi rua na ngêra na hagataku, o Raguele i bani surua vi katoa tanga ka Sara ka karena. Vikê o Tobiasi ki râ ki tamasi tanga o Raguele, ki vi: “Gu nakê nga be aporo i pasiku. Inê kê girararerua na enaku karu tako hagamarehê. Raguele va, gu nakê be aporo i pasina o vaemaku. Inê kê bani hagarongogo renia na mamasiaganiha i bani tarahua ma kê kahu pania.”

⁸Ma o Raguele ki arami, ki vi: “Gu oga noga o kareku. Gu oga noga i pasiku. Inê be hagatorangenira na mane tora tamasinga ke hagarongoa o vaemamu, vi igo ko gâga bâkoro ma.”

⁹Ma o Tobiasi ki togeaga, ki vi: “Mareha. I bara. Nakê nga be aporo i pasina o vaemaku.”

¹⁰Vikê o Raguele ki hatani tagarenia ka Sara tanga o Tobiasi o vaniana. Ngaia ki tagarenia nikâ tanga o Tobiasi ta apanena na nahuninga hato iana: na kare rakuraku, na puruka, na sipi, na tonki, na kamelo, na gahu, na haga ma na marâ tanga na ruma.

¹¹O Raguele ki ruia o Tobiasi ma ki kasira vê ka râ, ki vi: “Mauri koro o kareku. Go arâ purupurununiaga. Na Araha God ke anumasigamurua igo ma ka Sara. Ma inê be tahi rârâ mataro me be bâsira na karemurua.”

¹²Hemuri o Raguele ki vi tanga ka Sara, ki vi: “Go arâ henia o vaniamu ma ko gâga i ruma iaterua na enana. Haganega tenia i ngekê ngairerua ka na enamu manga igamirua kenamu menê. Inê kê obania vigê rongogi ma na tarani ga korokoro renigo, matena gê tahitahi mênga.” Ngaia ki arira ma ki kasira vê ka râ.

¹³Ma ka Etena ki vi tanga o Tobiasi, ki vi: “Tobiasi o kareku, na Araha ke anumasigo, hanana go atata bâkoro ma i pasimu, ma inê be tahi rârâ mataro me be bâsira na karemurua, igo ma ka Sara ka kareku. I maana na Araha inê kê naka ka kareku i na ababa ni rimamu. Igê na ogaha iamu siana hagetage ko hagarugu obana. Tobiasi, go arâ purupurunguniaga. Haganega tenia i ngekê ka Sara ka na gete iamu ma inê kani kenamu. Go gâga igê na vagevageha mataro me ko meme!” Hemuri ngaia ki arirerua ma ki kasirerua vê karu râ bâkoro.

¹⁴O Tobiasi ki râ ma ki vagevage ngavê. Ngaia ki hagarahasia na Araha i hagavoragi na vavearo ma na ano ma ki marungigi na ara ni marâ hato, suria na râha iana ki râ bâkoro. Ngaia ki suru tangarerua o Raguele ma kaniana, ki vi: “Inê be hagahigasigamurua tare ki bê ki arâ.”