Read Kahua TOBITI 11 Bible Online

TOBITI 11 - Kahua bible

TOBITI 11

¹Matena ga hagarangia noga na hinua i Kaserini i na apanena hura i Nineve,

²o Rapaele ki vi: “Tobiasi, igo ko bani girara na mamasiaganiha i bani tarahua o vaemamu ma karu kahu pania.

³Garu nanago tarana kaniamu karu hagarêa na ruma ma hemuri ka kahu atata me ngaira.

⁴Siana ko bonotenia vigo torea henigo na osuna na siare.” Vikê ngairerua karu nanago ma na o iana o Tobiasi ki râ henirerua.

⁵Matena ngekana ka Ana ki oga i na akerena na tara ki bâbâ bênitara renia o karena.

⁶Ngaia ki bâ vê mo Tobiasi ki arâ me. Ka Ana ki ngere tanga o Tobiti, ki vi: “Bâ, o karekerua ki arâ me i ngekana henia na tamana!”

⁷Hagenago ma karu kahu râ i pasina o Tobiti, o Rapaele ki vi tanga o Tobiasi, ki vi: “I page marava aporo na maana o vaemamu.

⁸Gu puruigi na maana o vaemamu renia na osuna na siare ma ki katoa na reo ki ahagogara tenigi na maana. Vikana ki page marava aporo na maana o vaemamu.”

⁹Ka Ana ki gaha râ tanga o karena, ki ruia ma ki tamasi raha, ki vi: “E, gê bâsigo aporo nikâ o kareku. I koro ma gê kahu meme!” Ma ngaia ki angi, suria i vagevage bâraha.

¹⁰O Tobiti ki aharaga ma ki râ tatagara ki hura i maani ruma.

¹¹O Tobiasi ki têa na osuna na siare ma ki râ tanga. Ngaia ki uhigi na maana o vaemana, ka têa ki ura tonge so ma ki vi: “Gu ramo vaemaku.”

¹²Ngaia ki abagi na maana renia na osuna na siare. Matena garu mamasiaga na maana o Tobiti, o Tobiasi ki haganega i na akereni na maana ma ki gaia râ na reo.

¹⁴O Tobiti ki ruia o Tobiasi ma ki angi, suria i vagevage bâraha. Hemuri ngaia ki tamasi raha, ki vi: “E, inê kê bâsigo o kareku. Igo ka na ageageha iaku! “Ngaia ki hagarahasia God, ki vi: “Ge hagarahasia God. Ge hagahigasia na atana. Ge hagarahasira na angero hato iana. Ge hagahigasia God tare ki bê ki arâ.

¹⁵Ngaia ki nakê kê guru ma ngaia ki takiê. Tahema i ngekê inê kê bâsia o kareku o Tobiasi!” Hemuri o Tobiasi ki banu i ruma, ki vagevage ma ki hagarahasia God i mêrihana hagenani. Ngaia ki hagarongoa o vaemana renia na râha bâkoro iana, renigi na haga i migiaporo me, ma renia na êragiha iana henia ka Sara ka karena o Raguele. Ngaia ki hagarongoa, vi ka Sara ki arâ me mênga i tara ma ki sugi atata me.

¹⁶O Tobiti ki vagevage ngavê ma ki hagarahasia God, matena i hura tenia na ruma tanga na maani para ni hinua i Nineve, hanana i mehetarahu kaniana o karena. Matena na enoni i Nineve ka bâsia i kahu arârâ marena, mareha vige kahu urua, ngaira ka kone ngavê.

¹⁷O Tobiti ki hagarahasia God ma ki hagarongora na enoni hato, vi God ki takia ma ki hagamaravagi aporo na maana. Matena o Tobiti ki mehetarahu ka Sara, ngaia ki mêri renia, ki vi: “Ka kareku, i koro era go râ me! Ge visia raha God i kasigo me tangagami. God ke koro tangagamu, o vaemamu, igo ma o Tobiasi o kareku. Banu me! Igo ko pane ruma. Na Araha ke haganahunigo renigi na apekoroha ma na vagevageha. Banu me ka kareku!”

¹⁸Na Siu hato i Nineve ka vagevage henia o Tobiti.

¹⁹O Agiagaro mo Nataba na goana tonge o Tobiti karu râ me karu vagevage henia nogaterua.