Read Kahua TOBITI 13 Bible Online

TOBITI 13 - Kahua bible

TOBITI 13

¹O Tobiti ki hagarahasia God vikê: “Ge hagarahasia God i gâga hagahu. Na arahanga iana ki asa vige page hato.

²Ngaia ki hagaitangigia ma ki takigia. Ngaia ki kasira so na enoni igê na anoano ma ki ragera akê aporo tenigi. I asa ta na enoni vige tahi tenia na raramohana.

³Isiraelita, mu visia koro i maata na enoni igê na agua i tokorenigia surigi.

⁴I ngegana nikâ ngaia ki hagabângenia igê na raramohana. Ge hagarahasia i maata na marâ hato ga mauri, suria ngaia ka na Araha God iaka, na vaemaka nga tare ma tarema.

⁵Henaka i hagaitangigia renigi na bagatauhaka ma ngaia ki page takigia, hanana igia ka aporo i pasika tenigi na agua ga oga totoko surigi.

⁶Manga mu aharia igê na mêrihami hagenani ma kamu têtê viteana ma kamu tototo suria, ngaia ki page aharigamu, hanana i tamanigamu ma ki hato vige rumakaka renigamu. Takusigi na korohana tangagamu ma kamu visia koro igê na ringemi raha. Hagarahasia na Araha ni otoha. Hagarahasia na Araha i araha hagahu. Henaka inê kê oga i pasita na mahuara igê na agua ga henahurauê tanga, inê be visia koro na Araha ma be tamasia na raramohana raha tangara na enoni ga pe tê viteana. Igamu enoni tasi, mu urusi parongami ma kamu katogi na tarani ga hagakoro obana God. Vari ngaia ki page korokoro tangagamu ma ki page takigamu.

⁷Inê be hagarahasia God iaku ma be ageagesia na Araha God ma be hagahigasia i mêrihaku hagenani.

⁸Na enoni hato ke kasia akê renia na raramohana ma ke ki ke hagarahasia i Jerusaleme.

⁹Jerusaleme, hinua apuna iana God iaka, God ki hagaitangigo meni na tasi iata na kariamu ma ki page takira na enoni hato ga hagakoro obana.

¹⁰Vikê go visia koro maninga na Araha, suria ngaia ki koro ngavê. Hagarahasia God i araha tare, haganega me kerevê noga, i rikini ki bê ki arâ, hanana go page tagarahia aporo na ruma ni rotu iamu ma na kariamu ka page vagevage aporo. Na Araha ke hagakoro obata i pasimu na kariamu hato ga bani henahuraura vê, ma ke marupera tare ki bê ki arâ na kariamu ga mamasiaga i pasimu.

¹¹Jerusaleme, igo ko page mavesira na enoni hato suria na maveta hagenani. Na enoni tenigi rako na agua hagatê ka page hakurigo hanana ga hagahigasia na Araha God iamu ma ka tagarenigi na mahatanga iata tanga na Araha God. Igê na tara ma na mahera i pasimu na apaparaha ma na apaparaha ka page kiki vagevage ka hagarahasigo ma igo ko page gâga hagahu, suria God ki atego vi igo ka na hinua iana.

¹²Na arangeniha ke tangara na ani hato ga merongasigo ma tangara ngaira hato ga ruhuruhugi ma ka hogegi na para ni hinua iamu ma na bebetehe ma ka hagamakakagi na ruma iamu. Ma na ani hato ga hagahigasigo God ki page korokoro tangara hagahu.

¹³Jerusaleme, gu vagevage ma ku ageagesira na kariamu i oto na parongata. Ngaira ka page hakuhaku me i pasimu tenigi na agua ga bani henahuraura tange, hanana ga hagarahasia na Araha i bani mauri me tare ki bê ki arâ.

¹⁴Ga babarisi na enoni hato ga takuigo ma ka obakoro, suria ga oga igê na ramana. Na ani i rugu na obata renigo i ngekê, suria na hagitangiha ka tarahugo, ngaira ka page vagevage i pasimu, suria na vagevageha iamu ki page hagavagevagesira tare ki bê ki arâ.

¹⁵Inê kê hagarahasia na Araha God raramohaga hunia,

¹⁶suria ga page tagarahigo aporo ma ngaia ki page gâga hagahu i pasimu. Jerusaleme, inê be vagevage, manga vi na hitangita na raraha iaku ma ki tahitahi mênga ki bâsia na bâbâhamu raha ma ki visia koro na Araha God. Na maani para na hinua iamu ka page tagarahigi renigi na hê maravarava ma na hê maravarava rotorotoaga ma na para ni hinua iamu renigi na hê bâkoro i akê na meni. Na bebetehe iamu ka page tagarahigi re na golo ma na ruma nganganihaga iamu re na golo taranini.

¹⁷Na tara iamu ka page ririhêgi renigi na hê ahe ma na hê getigi ga bâkoro ma ka raha na meni.

¹⁸Na maani para ni hinua iamu ka page rararo renigi ma na ki ni vagevageha ma i ruma hato i pasimu na enoni ka page ngerengere igê ka vivi: Hagarahasia na Araha! Hagarahasia God iata na Isiraelita! Jerusaleme, God ki page korokoro tangara na kariamu ma ngaira ka page hagahigasia tare na atana.” Ikê nga na hatongina na ki iana o Tobiti i hagarahasia igê na Araha God.