Read Kahua TOBITI 4 Bible Online

TOBITI 4 - Kahua bible

TOBITI 4

¹Igê nga na tangiana ngekana o Tobiti ki takusigi na haga i bani panigi i pasina o Gabaele i hinua i Ragesi i Metia.

²Ngaia ki tako i obana, ki vi: “Suria gê bani nungia God, hanana vi hagamagahuruê, hoi, i arariê vigê unia me o Tobiasi o kareku, hanana gê hagarongoa renigi na haga.”

³Vikê o Tobiti ki unia me o Tobiasi ma ki vi tanga, ki vi: “O kareku, matena gê meme, go bagiê maninga. I murina gê magahuru, go hagahigasia kenamu ma ko marupea, matena i tahitahi mênga. Go têtê viteana ma siana ko hagarugu obana.

⁴O kareku, go bani girara, vi ngaia ki kasi manavana, matena i obarangenigo. Matena i meme, go bagia ki tâtâ ngahisiê igê na matahuku.

⁵O kareku, go tototo suria tare na Araha God iaka. Siana ko murisigea se vigo aharê igê na ramata iana. Go katogi tare na tarani ga oto i maana God. Siana ko arâ suria na tara ni eraha.

⁶Go arâ suria na monariha, hanana go akê me maninga igê na anima na tagaraha iamu, suria na tarana ngekana ki tarahura na enoni ga râ suria na monariha.

⁷Go mamahata tangara na enoni matareha. Siana ko takotako herua. Manga go maongo tangara na enoni matareha, God ki page maongo tangago nogamu.

⁸Manga go nahuni rako, go mahata rako. Manga go nahuni sisite, siana ko takotako herua vigu mahata.

⁹Na tarana ngekana ki teharia vi go hagavaraha haga. Na mena na mahatanga iamu tangara na enoni matareha ki page tarahugo, matena i barabara tangago.

¹⁰Na mahatanga tangara na enoni matareha ki hagatahigo tenia na roto na mera.

¹¹Na mahatanga tangara na enoni matareha ki manga na vogasiha ki hagakoro obana ngavê na Araha God.

¹²O kareku, go hinarura na êrâ. Go auragia na gete tenia na hagosi ninuni iaka, suria ngaia ka na apaparaha iata na poropete. Siana ko auragia na gete i mamahuara, i mareha vi na hagosi ninuni iana o vaemamu. Takusira o Noa, o Abarahamo, o Isako mo Jakobo na êvarika i nago. Ngaira ka êragira na goata. God ki hagarakonira na kareta. Vikana na raraha iata ka page nahunia i Isiraele.

¹³O kareku, go têtê surira na goamu maremu. Siana ko paroparo i pe ararigo vigu auragia na hitangita. Na paroparoha ki hagarateni na anumanumaha ma na bagabevoani, i tagenana manga na babaganiha ki hagarateni na matareha ma na magêha.

¹⁴Go vurira na enoni tagara iamu i na ara ni tangiani. Siana ko nakanaka tanga na tangiana i muri. Go hagahigasia God igê na tarana ngekana ma ngaia ki page vurigo renia. Go gâga maninga tare ma ko ototo surigo maremu.

¹⁵Siana ko tanua tanga na enoni na marâ go pe obanira na enoni vige tanua tangago igo. Siana ko totono papasi na vaini, i era ma ki ruguhigo. Siana ki angarigo na tonoha.

¹⁶Na enoni ga magê ko meratongani renigi na ngêra iamu. Na enoni rupaturi ko meratongani renigi na gahu iamu. Manga go nahuni rako go mahatangenigi rako nga tangara na ani ga matareha ma siana ko takotako herua.

¹⁷Manga i meme na enoni i toto suria God, go nakanaka na ngêra igê na anoanona, ma siana ko katokato vikana matena i meme na enoni i pe botage renia God.

¹⁸Go garigari giraraha tenira na enoni ni takoha. Siana ko usisitenia na hagaotonga koro.

¹⁹Go hagarahasia tare God, naka ma vi na tarana ta ki tarahugo. Go nungia ki katogi ka tavoraha bâkoro na anima na tagaraha iamu ma ki bêngenigo igê na ogaha iamu. Na takoha mataha ki râ me tenia God, mareha vi tenira na enoni. Ngaia ki na hunani na marâ hato ga koro. Manga i obania, ngaia ki kasia akê ta na enoni, se i kasia so se i hagamagahurua. Vikana o kareku, go nakagi igê na aitangihamu na hagaotonga hato iaku tangago. Go takusigi tare nga.

²⁰O kareku o Tobiasi, ta na marâ nikâ kê obania ve visia tangago. Inê kê panigi na haga raha henia o Gabaele o karena o Gabiria i hinua i Ragesi i Metia.

²¹I ngekê igia ka matareha ma siana ko tako bâraha. Igo ko nahunia na ruruguha raha, manga vigo têtê viteana God ma ko pe tasitasi ma ko hagakoro obana God igê na ogaha iamu.”