Read Kahua TOBITI 5 Bible Online

TOBITI 5 - Kahua bible

TOBITI 5

¹Hoi, o Tobiasi ki aramia o vaemana, ki vi: “Ua, inê kê page arâ surigi na tamasinga iamu.

²Ma ki manga i he kanigê girara gê tavogi aporo na haga tenia o Gabaele? Igamirua kamuru pe bani hegirare me. Manga i he kanigê hagagirara, vi o ti kani inê, hanana vi hagêguritogo reniê ma ki tagarenigi na haga tangê? Ma ta na marâ nikâ. Inê kê pe girara na tara tanga i Metia.”

³O Tobiti ki arami, ki vi: “O Gabaele menê kamuru segegi so na atamirua igê na pepa ni heaganariha. Hemuri inê kê tarisia kamuru tongani. Inê kê naka na tarisigana iana henigi na haga. Mataro me i ngekê ka hato na tangahuri harisi gi rua. Hoi, gu râ ma ku garia ta na enoni go hagêguritogo renia, hanana i arâ henigo tanga i Metia ma kamuru tage aporo me. Igia ka page vatea renia na mena, matena muru aporo me. Hoi, go râ nga ma ko tavogi aporo na haga gê panigi henia o Gabaele.”

⁴O Tobiasi ki hura ki garia na enoni i girara na tara tanga i Metia ma ki agana vi arâ henia. Pusina ma i hura vê tenia na ruma, ngaia ki metora hetanga o Rapaele. O Tobiasi ki pe girara vi ngaia o Rapaele ki na angero iana God.

⁵Tahema ngaia ki hagatea, ki vi: “Goaku, go râ me tenia i he?” O Rapaele ki arami, ki vi: “Na Isiraelita manga igo kani inê. Inê kê râ me ikê i Nineve kê gari tagaraha.” O Tobiasi ki hagatea, ki vi: “Igo ko girara vari na tara tanga i Metia?”

⁶O Rapaele ki arami, ki vi: “Ua, inê kê girara. Inê kê bani arâ hagarako i ngekana. Inê kê giraragi na ara ni tara. Inê kê gâga tare i pasina o Gabaele na goaka i oga i hinua i Ragesi. Tenia i Ekebatana na hinua raha tanga i Ragesi ka torererua igê na tangiani hagenani gi rua, suria i Ragesi ki oga akê igê na hungani.”

⁷Hoi, o Tobiasi ki vi tanga o Rapaele, ki vi: “Goaku, gu oga kariê noga. Be banu i ruma be hagarongoa o vaemaku. Inê kê obanigo vigo arâ me heniê tanga i Ragesi ma kê page vatego na mena garu tage arâ.”

⁸O Rapaele ki vi: “Koro ma! Gê gâga karigo ma siana ko hagarihu.”

⁹O Tobiasi ki banu i ruma ma ki hagarongoa o vaemana, ki vi: “Inê kê tarahua ta na goaka na Isiraelita hanana muru tage arâ.” O Tobiti ki arami, ki vi: “Unia banu me! Inê kê obania ve girara na hagosi ninuni iana ma na raraha iana, ma kê obania gê girara nikâ, vi inê kê girara gê hagêguritogo renia vi ngaia ki arâ henigo.” Vikê o Tobiasi ki hura ma ki unia banu me o Rapaele, ki vi: “O vaemaku ki obania vi bâsigo.” O Rapaele ki banu me ma o Tobiti ki mêri renia hagenago. Hemuri o Rapaele ki mêri renia bê aporo nogana, ki vi: “Na ara ni marâ hato ke tavoraha bâkoro tangago.” Ma o Tobiti ki arami, ki vi: “Manga i he kaniga tavoraha bâkoro na ara ni marâ tangê? Inê kê guru ma ki asa vive bâsia ta na marâ. I manga gê me, suria i hato vive bâsia na marara. Inê kê manga na enoni ga bagi mamêrigana. Inê kê rongora na enoni ga tamasi ma ki bara ve bâsira.” O Rapaele ki vi tanga, ki vi: “Go gatagata! Siana ko anumanuma. God ki sugi hagamaravagi râ nga na maamu.” O Tobiti ki vi: “O Tobi(...)

¹⁰O Tobiti ki hagate nikâ, ki vi: “Bamane, gu visia me, igo ka na hagosi ninuni ma na raraha ta?”

¹¹O Rapaele ki hagate, ki vi: “Renia i hega kanigo obania vigo girara vikana?” O Tobiti ki vi: “Go tamasi me igê na monariha. Ti kani igo? Ti na atamu?”

¹²O Rapaele ki arami, ki vi: “Na ataku ka no Asaria. Inê ka no karena o Anania raha na hitangita na goamu.”

¹³Vikê o Tobiti ki vi tanga, ki vi: “Inê kê vagevage bâraha renia go râ me i pasimami. God ke korokoro tangago o kareku. Siana ko takotako manga i he, suria inê kê obania vigê girara na monariha renigamu igo ma na hagosi ninuni iamu. Inê kê tahetara, vi igo nga ka na goaku ma ko râ me tenia na hagosi ninuni i rongo raha na atana. Inê kê girararerua o Anania mo Jatane. Vaematerua ka no Simi raha ngairerua karu rotu bâkoro tare. Igami kami tage arâ tare tanga i Jerusaleme kami rotu igê. Na goamu ka na enoni koro ma ko râ me tenia na hagosi ninuni koro. Go arâ ko mauru koro!”

¹⁴O Tobiti ki vi nikâ: “Inê kê page vatego na memu ararigi na ara ni tangiani manga bani hanana, henigi na haga muru mauri renigi igo ma o kareku.

¹⁵Manga muru aporo me bâkoro ma, inê kê page vatego akê nikâ tani na haga.”

¹⁶O Rapaele ki vi: “Inê kê arâ henia. Siana ko tako bâraha. Igamirua kamuru page aporo me bâkoro ma. Na tara ka mareha vige hagamamagura.” O Tobiti ki arami, ki vi: “God ke ngahisigamurua.” Hemuri o Tobiti ki aharo râ tanga o Tobiasi ma ki vi: “O kareku, gu nanê ni râha, hanana muru tavoraha. God ma na angero iana karu bâbâsurigamurua, hanana muru aporo me bâkoro ma.” O Tobiasi ki siginirerua o vaemana ma kenana, ki arirerua ma ki tavoraha tanga i Metia. Ma o Tobiti ki vi nikâ: “Muru arâ maninga!”

¹⁷Ma ka Ana kaniana ki haganega ki angi, ki hagagege, ki vi: “Tanu hega go kasia o kareku ki arâ hagatê? Ngaia ma kani tamanigerua matena i gâga. Ti kani kahu marupegerua?

¹⁸Na ta ki raha? Na haga se na mêrihana o karekerua?

¹⁹Na marâ God i vategerua hanana vi garu mauri re ki arari noga!”

²⁰O Tobiti ki vi tanga, ki vi: “Gu marapeaga! Siana ko tako bâraha. Ngaia ki page aporo me bâkoro ma. Igo ko page bâsia re maamu maremu, vi ngaia ki page aporo me bâkoro ma.

²¹Siana ko tako bâraha renirerua kego. Na angero koro ki râ henia o Tobiasi. Na râha iana ki page akê me bâkoro ma ngaia ki page aporo me bâkoro ma.” Vikana ka Ana ki kahu haritagi so ma ki muni so vige angi.