Read Kahua TOBITI 6 Bible Online

TOBITI 6 - Kahua bible

TOBITI 6

¹O Tobiasi ma na angero o Rapaele karu tavoraha tanga i Metia. Na o iana o Tobiasi ki râ surirerua. Ngairerua karu rârâ mataro me ki su na arito ma karu tênga i ve i Tigirisi.

²O Tobiasi ki so i ve ki manuhigi na êgana. Ki parama na bagasiare raha ma ki reke tenia na ve ma ki haga ni unumia têgana. O Tobiasi ki ngere.

³Na angero ki ngere râ tanga ki vi: “Gu têa! Siana ki gavagava.” Hoi o Tobiasi ki têa na siare ma ki okea tare mamata.

⁴Na angero ki bonasia o Tobiasi, ki vi: “Gu tataria na siare ma ko tavogi râ na osuna, na bunaniana ma na rokona. Go nakanaka maninga henigo, suria ngaigi ka girara ga hagakorogi na maeha, ma ko kasigi râ na angena.”

⁵O Tobiasi ki râ surigi na tamasinga iana na angero tanga. Hemuri ngaia ki hagamakoa na siare, ki ngêa tagua ma tagua ki tarigi ki marasiga, hanana i totora i tara. Hemuri ngairerua karu râ nga mataro me karu hagarangia i Metia.

⁶Matena garu arâ, o Tobiasi ki hagate, ki vi: “Bamane o Asaria, na osuna, na bunaniana ma na rokona ka girara ga hagakorogi na ani ta na maeha?”

⁷Na angero ki arami, ki vi: “Manga na enoni, na mane se na gete, ma na ataro era ki angaria ki mamasiaga, hoi, gu sungigi na bunaniana ma na rokona, hanana go paia hura tenia. Na roboni ki hagatahia ototo râ na enoni ngekana tenia na ataro era ma na ataro ki asa vige angaria aporo.

⁸Na osuna ko girara go naka igê na maana na enoni i reoreo. Go taruhigi na maana renigi ma ko uhigi na reo, ma ngaia ki page marava aporo na maana.”

⁹Matena garu ata i Metia ma karu hagarangia na hinua i Ekebatana,

¹⁰o Rapaele ki vi: “Bamane o Tobiasi!” O Tobiasi ki arami, ki vi: “Na tao?” O Rapaele ki vi: “I rikini bungi, igerua karu page gâga i pasina o Raguele na goamu. Ngaia ki apara na kare gi tage ma. Ngaia kani ka Sara.

¹¹Ma suria igo ka na goana tonge hagarangia, tahema i oto tangago vigu auragia. I oto tangago nikâ, vigo page nahunigi na nahuninga hato iana o vaemana.

¹²Ka Sara ki na gete ni takoha, i pe magu ma ki bâkoro ngavê. O vaemana ka na mane koro. I rikini bungi inê kê page nungia o Raguele, hanana i hagauragingenia ka karena tangago. Ma ngaia ki page hagamarumungenia tangago. Hemuri, matena garu aporo me tenia na hinua i Ragesi, igia ka katoa na hagataku. O Raguele ki asa vige manimanigo vigu auragia, ma ki asa vige hagauragingenia tanga ta na mane getea. Manga i katoa vikana, ki arari ma viga nahuia ki meme suria na ramata iana o Moise. Ngaia ki bani girara vi igo getego ma ka na mane i oto tangago vigo auragia ka karena ma ko nahunigi na nahuninga iana. Vikana go tê viteaku. O Raguele menê kamuru page hekarigi renia na tarana ngekê i rikini bungi ma kamuru surua na heatengeha iamu tanga ka Sara. Matena garu aporo tenia na hinua i Ragesi, igerua karu page merâ tanga i pasikerua.”

¹³Ma o Tobiasi ki vi tanga o Rapaele, ki vi: “Bamane o Asaria, inê kê bani rongoa vi ka Sara ki bani êragi hagepi noga i nago. Ma na ara ni hitangita o vaniana ki meme igê nga na bungiana ni hagataku, matena i bêbanu igê na kiboru hanana vi memêru.

¹⁴Igê na rongoha gê rongoa, ta na ataro kani nahuira ka meme vigana. Ngaia ki pe hagamamasiaga apena ka Sara, suria i takuia, ma na ara ni hitangita o vaniana i uhungia vi metâ, ngaia ki nahuia ki meme. Inê kê magutenia na ataro ngekana. Na enaku karu aparê inê gitageku. Ma ki manga gê meme inê, na hetakiha ki page hagamesirerua na enaku. I mareha rârâ tani o kareterua hanana vige bagirerua.”

¹⁵Na angero ki arami, ki vi: “I hega, igo ko bonotenigi noga na hagaotonga iana o vaemamu tangago? Ngaia ki bani vi tangago, hanana vigo auragia na gete tenia na hagosi ninuni iamu maremu. Hoi, gu karingê maninga. Siana ko magutenia na ataro. Go auragia nga ka Sara. Inê kê bani girara, vi i rikini bungi o Raguele ki page hagauragingenia ka Sara henigo.

¹⁶Matena go bêbanu igê na kiboru ni mêru, go mererâbanu na bunaniana ma na rokona na siare ma ko nakarerua i rarona na apira i tarê igê na marâ i sigini koro.

¹⁷Vikana na vanuhaterua ki page rararo igê na kiboru. Matena na ataro ki siginia, ngaia ki arâ su nga vê tenia ka Sara. Ma hagenago tarana muru mauru haku, muru aharaga kamuru rêra ma kamuru nungia na Araha God ke korokoro tangagamurua ma ke anumasigamurua. Siana ko magu. I nago kerevê noga God ki bani naka ka Sara tangago. Igo nga ka na ani go page hagatahia tenia na ataro. Ngaia ki page agana ki arâ surigo tanga i pasimu. Be vi tangago, igamurua kamuru page aparara rako na kare muru page takuira ngavê. Vikê, siana ko magu!” O Tobiasi ki karinga maninga o Rapaele. Ngaia ki bani girara vi ka Sara ka na goana igê na apanena na hagosi ninuni iana o vaemana. Ka Sara ki haganega ki tâ igê na aitangihana o Tobiasi. O Tobiasi ki naasia vi auragia rêrê.