Read Kahua TOBITI 7 Bible Online

TOBITI 7 - Kahua bible

TOBITI 7

¹Matena o Tobiasi ma na angero o Rapaele karu oga noga i hinua i Ekebatana, o Tobiasi ki vi: “Bamane o Asaria, gu hatani meêrâ i pasina o Raguele.” Na angero ki merâ tanga na ruma iana o Raguele. Ngairerua karu tarahua i gâga i metara na ruma. Ngairerua karu mêri renia hagenago. O Raguele ki aramirerua, ki vi: “Goaku, banu me. Inê kê vagevage bâraha, suria muru râ me i pasiku.” O Raguele ki merarâ banu i ruma iana,

²ma ki vi tanga ka Etena kaniana, ki vi: “Na kere mane ikê ki bâ manga na goaku o Tobiti iê?”

³Ka Etena ki hagatererua, ki vi: “Muru râ me tenia i he?” Ngairerua karu arami, karu vi: “Igamirua ka na Isiraelita tenia na varo ninuni iana o Napatali. Ma i ngekê igamirua kamuru oga i Nineve i Asiria, na hinua ga henahuraugamirua tanga.”

⁴Ka Etena ki hagate, ki vi: “Muru girara vari o goamami o Tobiti?” Ngairerua karu arami, karu vi: “Mako, muru girara!” Ngaia ki hagate, ki vi: “Ma ngaia ki hega?”

⁵Ngairerua karu arami, karu vi: “Ngaia ki gâga bâkoro ma.” Ma o Tobiasi ki vi nikâ: “O Tobiti ka no vaemaku.”

⁶Vikana o Raguele ki aharaga ma ki sigia o Tobiasi. Ngaia ki angi igê na vagevageha.

⁷Hemuri ngaia ki vi: “God ke koro tangago o kareku. O vaemamu ki na mane koro, na mane ni hagêguringa togo. Hetaki teha vê i guru na maana, suria ngaia ki na mane ni takoha ma ni hekomaniha. Ngaia ki ruia o Tobiasi ma ki angi i gaparana.

⁸Ka Etena kaniana ma ka Sara ka karena karu angisia nogaterua o Tobiti.” O Raguele ki ageagesirerua, suria garu vatugia me. Ngaia ki haribona ka nahuia na sipi mane. Matena ngairerua karu mamanu hato, ma karu nanê hanana vigaru gâga so tanga na ngêra, o Tobiasi ki vi tanga o Rapaele, ki vi: “Bamane o Asaria, i na keta ko nungia o Raguele, hanana i hagamarumungeniê kê auragia ka Sara?”

⁹Ma o Raguele ki rongoa na hagatenga ngekana ma ki vi tanga o Tobiasi, ki vi:

¹⁰“Gu ngê ma ku tono noga ke koro na apemu. Igo ki oto tangago vigo auragia ka Sara. Inê ki asa be hagauragingenia henia na mane getea, suria igo ka na goaku tonge hagarangiê. O kareku, be visia vê na monariha tangago.

¹¹Inê kê bani hagauragingenia henira na verepi na mane. Ngaira hato ka na goaku. Ma na ara ni hitangita o vaniana ki meme igê nga na bungiana ni hagataku, matena i bêbanu igê na kiboru, hanana vi memêru. Hoi o kareku, gu ngê ma ku tono noga. Na Araha ki page korokoro tangagamurua. O Tobiasi ki arami, ki vi: “Mareha! Gu hagagatagatania hagenago na êragiha iamirua ma kê kahu ngêngê ma kê totono.”

¹²O Raguele ki agana, ki vi: “Hoi, i koro ma. Inê be hagauragingenia henigo manga i visia na ramata iana o Moise. Na Araha God ki bani atea na êragiha ngekê. Vikê gu êragia. Haganega tenia i ngekê ki bê ki arâ. Na Araha God ke anumasigamurua i rikini bungi akê, ke tamanigamurua ma ke korokoro tangagamurua.”

¹³Hemuri o Raguele ki unia me ka Sara ka karena. Matena i banu me ka Sara, o Raguele ki here i rimana ma ki hagauragingenia henia o Tobiasi ma ki vi: “Go torea ka Sara manga kaniamu surigi na hagesuringa igê na ramata iana o Moise. Go merâ purupurunguniaga tanga na ruma iana o vaemamu. Na Araha God ke hagakoro obamurua igê na ogaha haku iamurua.”

¹⁴Hemuri o Raguele ki vi tanga kaniana ki torea me na rumina na pepa, hanana i segea so igê na hagagatagataniana na êragiha. Ka Etena ki torea me na rumina na pepa tanga ma o Raguele ki segea so igê na hagagatagataniana na êragiha, i vi, vi ngaia ki hagauragingenia ka Sara henia o Tobiasi surigi na hagesuringa igê na ramata iana o Moise.

¹⁵I hato, ma ngaira ka haganega ka ngê.

¹⁶O Raguele ki unia kaniana ma ki vi tanga, ki vi: “Kego, gu hagarêa ta na kiboru ma ko torea banu ka Sara igê.”

¹⁷Ka Etena ki hagarêa na bea manga i vi o Raguele. Hemuri ngaia ki mebanu ka Sara igê na kiboru. Ka Sara ki haganega ki angi. Ma ka Etena ki taruhigi râ na tavoni na maana ma ki vi:

¹⁸“Ka Sara, siana ko tako bâraha. Inê kê girara nga, vi na Araha God ki page hagakoro obamu i ngekê nga, mareha vige hagabono obamu. Ka kareku, gu ramo.” Hemuri ka Etena ki hura tenia na kiboru.