Read Kahua JUTITI 1 Bible Online

JUTITI 1 - Kahua bible

JUTITI 1

¹Matena na maneraha o Nebukanesare ki marungira na ai ni Asiria ma ki oga i Nineve na hinua raha iana, na maneraha o Arapakasata ki marungira na ai ni Metia ma ki oga i Ekebatana na hinua raha iana.

²Na maneraha o Arapakasata ki pararihia i Ekebatana renia na para na hê ga bani retegi. Na ara ni hê ka upupuga na mita gi rua ma na aberaberagani nikâ ma na borahusigani ki 3 mita. Na para ki akê na 70 mita ma na aberaberagana ki 50 mita.

³Surigi na ara ni maani para ngaia ki tagarahigi igê na bebetehe ga akê na 100 mita ma na aberaberagani na hunani ki 60 mita.

⁴Na ara ni maani para ki akê na 70 mita ma na aberaberagani ki 40 mita, hanana i hatahata tangara na mane ni me hato iana, matena ga tavotavo uga harahara.

⁵Matena o Nebukanesare ki maneraha noga surigi na 12 na harisi, ngaia ki râ ke meheariha na maneraha o Arapakasata igê na bagabena raha hagarangia na hinua raha i Ragesi.

⁶Na mane ni me rako ngavê ka pane henia na maneraha o Arapakasata: na me hato ga ogasigi na hungani, na me ga ogasigi na ve i Tigirisi, i Uparatesi me Hitasipesi, ma ngaira nikâ na me ga ogasia na bena o Arioko na maneraha i Elama i marungia. Rako na me tenigi na agua getigi ka tê me igê na hearihatana iata na Geleutita.

⁷O Nebukanesare na maneraha i Asiria ki kasi tamasinga tangara na ai ni Pesia ma tangara na enoni kereso i na apanena i Silisia, i Tamasiko, i Libanone, i Antilibanoni, ma tangara na enoni igê na tarasini,

⁸ma igê na apaneni i Karemele, i Gileata, i Galilea ma igê na maruguna i Jeserele.

⁹Ngaia ki kasi tamasinga tangara nikâ na ai ni Samaria ma tangagi na hinua hagarangia, tangara na enoni kereso i ve i Jotano ki râ ki tarahugi na hinua i Jerusaleme, i Betani, i Gelusi me Katesi ma tanga na apanena i Gosene.

¹⁰Na tamasinga ki râ tangagi nikâ na hinua i Esipito, i Tapanesi, i Memepisi, i Ramesesi, i Tanisi ma tanga na apanena kere banu na ve i Nile ki tariha râ igê na pereperegana i Etiopia.

¹¹Ma ngaira hato ka pe aganaria na tamasinga iana na maneraha o Nebukanesare ma ka usi vige pane henia igê na hearihatana. Ngaira ka takusia ma vi ngaia ki asa vige teha igê na hearihatana. Tahema ngaira ka pe magutenia. Na mane tora tamasinga iana ka aporo baguru ma ka maki.

¹²Na tarana ngekana ki hagamangaria ngavê o Nebukanesare. Vikê ngaia ki tohe, vi naka na siva tangara na enoni hato ngegana, naka ma i têtê tara renigi na arahanga ma na mare iana. Ngaia ki tohe, vi mutera ngavê na enoni hato i Silisia, i Tamasiko, i Siria, i Moaba, i Amone, i Juta me Esipito, i vi na enoni hato i berarogaterua na asi i kerekê ma i kereso.

¹³Matena o Nebukanesare ki maneraha noga surigi na 17 na harisi, ngaia ki bêngenira na mane ni me iana ka meheariha na maneraha o Arapakasata. Ngaia ki teharira na mane ni me hato iana o Arapakasata henira na mane ni me hato igê na hosi ma igê na kati ni me iana.

¹⁴Hemuri o Nebukanesare ki parênigi na hinua hato i Metia ma ki tavo uga, hanana i taharia na hinua raha i Ekebatana. Ngaia ki henahuraugi na bebetehe ni hinua, ki rurugugi na tara igê ma ki ruhuruhua na hinua bâkoro.

¹⁵Ngaia ki henahuraua na maneraha o Arapakasata igê na hungani i Ragesi ma ki ahura ki me, renigi na ora ma ki tê hunia ngavê.

¹⁶Hemuri o Nebukanesare ma na mane ni me gahu iana ka aporo tanga i Nineve henigi na marâ ga rurugugi igê na hearihatana. I ngekana ngaira ka mamaro, ka vagevage ma ka magoto surigi na hageha ge he.