Read Kahua JUTITI 10 Bible Online

JUTITI 10 - Kahua bible

JUTITI 10

¹Matena ka Jutiti ki avarasia hato na God iata na Isiraelita,

²ngaia ki aharaga ki ura, ki unia me na gete tagara iana, ki rere ma ki banu i ruma manga bani hanana igê na tangiani ni mamaroha ma igê na tangiani raha ni rotu.

³Ngaia ki tasigi râ na gahu kakaga ma na tuguni ni nâ iana, ki mamanu ma ki taruhia marena renigi na oile i sigini koro. Ngaia ki surasura bê, ki surugi haku na varehuna ma ki tuguni renigi na tuguni bâkoro manga bani hanana igê na tangiani ni vagevageha, matena i tahitahi mênga o Manase o vaniana.

⁴Ngaia ki tarasigi na santele ma ki rêni renigi na mahe bâkoro iana: na garobara, na bangobango ni rima, na ringi igê na kakêna, na mumu ni karinga, na rabu ma na pupumako. Ngaia ki rêni bâkoro ngavê, hanana i hagahura obana na anima na mane i bâsia.

⁵Ka Jutiti ki vatea na gete tagara iana na anga na gavona na puruka i vunu renia na vaini ma na pi na hê i vunu renia na oile, ki torererua. Ka Jutiti ki hagavunusia na anga renigi na koni ga hanunu, na guani na fiki ga garaki ma tani na guani na bereti ga hanugi surigi na tauhata na Siu. Ngaia ki baraigi maninga na ngêra ma na kâkâ ma ki vatea na gete tagara iana ki toregi.

⁶Hemuri ngairerua karu hura pania na ruma ma karu râ tanga na maani para ni hinua i Betulia. I ngekana ngairerua karu tarahura igê o Usia ma na enoni raha i hinua o Gabirisi mo Karamisi ga anumasia na maanipara.

⁷Matena ngaira ka bâsia ka Jutiti i tuguni bâkoro ma ki rêni, ngaira ka konetenia na bâkorohana ma ka vi tanga, ka vi:

⁸“God iata na êvarika ke korokoro tangago ma ke katogo ku akê me bâkoro igê na katoha iamu, hanana na Isiraelita ke tehateha ma ke rongo raha na atana i Jerusaleme.” Ka Jutiti ki tubê so ki rahesia God.

⁹Hemuri ngaia ki vi tangara na mane, ki vi: “Mu bonasira na me ke tangahia na maanipara taraku, hanana ve katoa na tarana igia ga bani tamasia.” Vikê na me ga anumasia na maanipara ka tangahia tanga.

¹⁰Ka Jutiti ma na gete tagara iana karu hura pania na hinua. Na mane ka boresuria, matena i rere vato tanga na maruguna rârâ mataro me ki pinihi.

¹¹Matena ngairerua na gete karu aharêvoro igê na maruguna, na mane ni me ni Asiria ga arârâ bâbâ ka tarahurerua.

¹²Ngaira ka ranguia ka Jutiti ma ka hagatea, ka vi: “I he na hinua iamu? Go râ me tenia i he? Go arâ i he?” Ka Jutiti ki arami, ki vi: “Inê ka na Hebereo. Inê kê gavatenira na Isiraelita, suria God ki nakagamu kamu mutera.

¹³Inê kê arâ kê bâsia o Holoperenesi na ani i teha i berarogata na me ga bêngenira na mane ni me na tamami, hanana gê hagarongoa renigi na hagaotonga koro. Inê kê girara gê hagabâsia renigi na tara igê na hungani, hanana i taugi ma ka puruguni na mane ni me iana.”

¹⁴Na mane ni me ka boretenia, suria i bâkoro ngavê. Ngaira ka karinga i tamasi ma ka vi:

¹⁵“Igo ko hagatahigo maremu, suria go rere me ikê ko bâsia na mane i bêngenigami. Gu râ tanga na ruma na gahu iana. Tani na hitangimami ka megorâ ma ka hagabâsia renigo.

¹⁶Siana ko magu matena go rêra i maana. Gu hagarongoa renia na tarana go bani hagarongogami renia ma ngaia ki page korokoro tangago.”

¹⁷Ngaira ka atera na mane ni me tangarê gi tage, hanana ga mererârua ka Jutiti ma na gete tagara iana tanga na ruma na gahu iana o Holoperenesi.

¹⁸Matena na rongoha ki râhigi na ara ni ruma na gahu, vi ka Jutiti ki ata me, na tênga hagenani iata na me ni Asiria ka hetanguhi me tanga. Rako na mane ni me ni Asiria ka râ me ka ura rihia ka Jutiti i metara na ruma na gahu iana o Holoperenesi, matena i ura naasira na ani ga page mebanu.

¹⁹Ngaira ka konetenia ngavê na bâkorohana ma ka haganega ka tako hagahigasira na Isiraelita renia ngaia. Ngaira ka hehagateri, ka vi: “Ti ki girara i ruhira na enoni, na enoni ga nahunira na gete ga bâkoro vigana? I koro ke mutera na ara ni mane hato, i era ma na Siu ngegana ka hagamua na maveta hagenani.”

²⁰Hoi, na mane ni me ga anumasia o Holoperenesi ma na kariana ka hura me ma ka mebanu ka Jutiti igê na ruma na gahu.

²¹O Holoperenesi ki tâ ki mamaro igê na kiboru kere banu igê na bea iana i rarona na gahu vavararaga pusira na namu, ga hêrigi igê na sigani na golo ma na sigani maravarava ma ka hagamahea renigi na hê bâkoro ga raha na meni.

²²Matena na me ka hagarongoa vi ka Jutiti ki ata me, ngaia ki hura me tenia na kiboru. Na kariana ka miginanago tarana na laiti na siliva.

²³Matena ngaia o Holoperenesi ma na kariana ka bâsia ka Jutiti, ngaira hato ka konetenia ngavê na bâkorohana. Ka Jutiti ki susure ki tubê so i ano, hanana i hagahigasia o Holoperenesi, ma na kariana o Holoperenesi ka ragea aharaga.