Read Kahua JUTITI 11 Bible Online

JUTITI 11 - Kahua bible

JUTITI 11

¹O Holoperenesi ki tamasi tanga ka Jutiti, ki vi: “Siana ko tako bâraha. Siana ko magu. Inê kê pe hagamamasiaga rârâ ta na enoni i agana ki tagara tanga o Nebukanesare i marungia na maveta hagenani.

²I ngekê nikâ manga vi na enoni i pasimu ga ogasigi na hungani ma ka hagahigasiê, inê ki asa be meraheariha. Ngaira ka hagarateta mareta.

³Ma ku visia me tangê. Tanu hega kanigo gava panira ko râ me i pasimami? Igo ko obania vari vigo tahitahi? Igo ko tahitahi ikê! Siana ko magu. Haganega tenia i bungi akê igo ko page asitatara.

⁴I asa ta na enoni ikê vige page hagamamasiagago ma ngaira hato ka page katogo bâkoro mangara na kariana getera hato na maneraha iaku o Nebukanesare.”

⁵Ka Jutiti ki aramia, ki vi: “Araha iaku, gu nakê be tamasi tangago. Gu karinga nga na marâ gê tamasia. Inê na kariamu. Ki asa iaku vive hagaparugo.

⁶Manga go arâ suria na hagaotonga iaku, God ki page katogo ko akê me bâkoro ma na katoha iamu ki asa vige page magahuru.

⁷Inê kê tohe tangago renirerua na mêrihana ma na raramohana o Nebukanesare i marungia na maveta hagenani ma ki hagatorago go hagaotora aporo na enoni hato i ruguhana na arahanga iana, kê vi, vi renigo igo tahema na enoni ka tagara tanga o Nebukanesare. Ma ki mareha vi vikana ma, ma renia nikâ hete na raramohamu na marâ vasiga, na togoha ma na manu ka tê viteana nogata. Renigo igo tahema o Nebukanesare ma na ruma hagenani iana ka page gâga igê na ramana.

⁸Igami kami bani rongo tarohamu, vi igo ko nahuni takoha ma na aitangisiha. Na maveta hagenani ki bani girara, vi igo ko teharira na ara ni mane hato ga bêngenira na mane ni me iana na maneraha i Asiria, suria igo ko aitangisia ma ko manisingenia ngavê na hearihatana ma ko tehateha tare igê.

⁹Na me ni Betulia ka hagatahia o Agiore ma ngaia ki hagarongogami renia na marâ i visia igê na hekarigiana ni hearihatana iamu.

¹⁰Araha, siana ko ata ni tako mavê renia na tamasinga iana o Agiore tangago, ma ku tako renia hete, suria i tamasi monari. I asa ta na enoni ge girara vige hagaitangira se vige teha renira igê na hearihatana, manga vi ngaira ma ka pe haritohea God iata.

¹¹Hoita, araha, igo ko page teha igê na hearihatana ma na katoha iamu ki page tavoraha bâkoro. Na Isiraelita ka page me, suria ngaira ka page haritohea na God iata ma ka page hagamangaria.

¹²Na ngêra ki bani hato tenira. Na ve ki abubu ngavê tenira. Vikê ngaira ka bani tako viga nahuira na togoha iata ma ka ngaugi na ngêra God i manimanigi ngavê tenira.

¹³Nikâ ngaira ka bani tako viga ngaugi na nagoni na mu ni koni ma na tangahuruta tenigi na vaini ma na oile ga hagapunarigi ma ka nakagi râ tangara na mane ni vogasiha, ga tagara i ruma ni rotu iana God i Jerusaleme. Ma tangagami igami ki apu ngavê, vigami hatarigi râ na ngêra apuna ngegana.

¹⁴Ma suria na enoni i Jerusaleme ka bani aharêngia na ramata ngekana, na enoni i pasimami ka bani hagatorangenira na mane tora tamasinga tangara na enoni raha i ngekana, ka nungi, hanana vige hagamarumu tangara nogata vikana.

¹⁵Igê nga na tangiana ga hagamarumu igê tangara ka ngaugi nga na ngêra ngegana, igo ko girara go mutera.

¹⁶Pusina ma gê rongo vikana, inê kê gava panira. God ki hagatorangeniê kê katogi na marâ renigo igo, ga page hagakonera ngavê na enoni hato i maveta, ga page rongorongo tarohani.

¹⁷Araha, inê na kariamu, kê toto suria God. Inê kê rahesia na Araha God surigi na tangiani ma na bungiani. Inê be oga ikê igê na tênga iamu ma i na ara ni bungiani inê kê page arâ igê na maruguna kê rahesia God, ma ngaia ki page hagarongoê renia na matena na Isiraelita ka haritohea igê.

¹⁸Matena gê tahetara renia, inê kê page tari oto me kê hagarongogo renia, ma ko kahu meratavo uga hura na mane ni me hato iamu. Na Isiraelita ki asa vige ura hagabarasigo.

¹⁹Inê kê page bêngenigo aharêvoro i Juta tanga i Jerusaleme. I ngekana i gupuna na hinua inê kê page kasigo igê ko maneraha. Igo ko page sikirenira na ai ni Jerusaleme mangara na sipi i mareha na avanuta. Henaka na o, ngaia ki asa vige ngirigo. God ki bani hagagirarê hagenago renigi ma ki hagatorangeniê me kê hagarongogo renigi.”

²⁰Na tamasinga iana ka Jutiti ki hagakoro obata o Holoperenesi ma na kariana. Ngaira ka konekone renia na takoha mataha iana.

²¹Ngaira ka hetamatamasi so mareta, ka vi: “E, i mareha rârâ ta na gete i maveta vige tako mataha ma ke bâkoro manga ngaia!”

²²Hoi, o Holoperenesi ki vi tanga ka Jutiti, ki vi: “I koro era God ki hagatorangenigo me ikê, hanana i katogami kami teharira ma kami mutera na ani ga ruhia na maneraha o Nebukanesare.

²³I mareha vigu bâkoro ma, ma ko koro nikâ hete igê na tamasinga. Manga go hagamonaria na tamasinga iamu, na God iamu ki page God iaku nogaku. Igo ko page gâga i ruma raha iana na maneraha o Nebukanesare ma ki page rongo raha na atamu suria na maveta hagenani.”