Read Kahua JUTITI 12 Bible Online

JUTITI 12 - Kahua bible

JUTITI 12

¹O Holoperenesi ki bonasira na me iana ka merâ ka Jutiti tanga na bea ni ngêra, ga bani hagarêgi igê na marâ ga ngaugi igê ma renigi ga tagarahigi renia na siliva. Ngaia ki bonasira nikâ ka toregi me tanga nogana na ngêra ma na vaini iana marena.

²Ma ka Jutiti ki usi, ki vi: “Inê ki apu tangê vi ve ngaugi na ngêra iamu, i era ma kê aharêngigi na ramata iana God iaku. Inê kê ngaugi ma na ngêra gê migirâ me.”

³Ma o Holoperenesi ki hagatea, ki vi: “Ma ki manga ga hatohato tenigo na ngêra ma na vaini, ko hega? I he kami page tarahugi igê na ngêra tangago? Ga mareha rârâ na Isiraelita igê na tênga iamami ikê!”

⁴Ka Jutiti ki arami, ki vi: “Araha, inê kê tohe i maamu, vi na ngêra iaku ki asa vige page hato mataro me God iaku ki hagamonaria na katoha iana reniê inê.”

⁵Hemuri na kariana o Holoperenesi ka merâ ka Jutiti tanga na ruma na gahu. Ngaia ki mêru igê mataro me ki gupu ni bungi. Ngaia ki aharaga ma ki kahu kakahugana tangiana.

⁶Ngaia ki kasi tamasinga tanga o Holoperenesi, hanana vi hagamarumungenia ki huhura ki arâ tanga na maruguna ki nunginungi igê.

⁷O Holoperenesi ki bonasira na mane ni me ga anumasia na tênga, ka naka vê ka Jutiti ki hura. Vikê surigi na tangiana gi oru ka Jutiti ki oga igê na tênga ma i na ara ni bungiani ngaia ki huhura ki arâ tanga na maruguna hagarangia i Betulia ma ki mamanu igê na ve banga.

⁸Matena i mamanu hato, ngaia ki avarasia na Araha God, hanana i bêngenia igê na katoha iana, hanana na Isiraelita ka tehateha.

⁹Hemuri ngaia ki aporo igê na tênga. Ngaia ki oga rârâ igê na ruma na gahu iana mataro me na ngêra i bungi. Ngaia ki ama ni matarotaro nga suria na rotu.

¹⁰Igê na heta na tangiana i gâga ka Jutiti igê na tênga o Holoperenesi ki magoto tangara na kariana, mareha vi tangara na mane ga bêngenira na mane ni me.

¹¹Ngaia ki vi tanga o Bagoasi, na vâmavo i bâsuria na ruma iana, ki vi: “Gu râ ku uhungia ku tamasi tanga na gete na Hebereo go bâsuria, hanana i arâ me i pasiku, ki ngêngê ma ki totono henigami.

¹²Manga igami ma kami naka mavê na gete i bâkoro vikana ma kami pe memêru, e, igami kami page maki. Manga vi inê ma kê pe uhungia vi ve memêru, ngaia ki page rurusiê.”

¹³Vikê o Bagoasi ki pania so o Holoperenesi ma ki râ tanga ka Jutiti ma ki vi: “Ka bagego bâkoro, ko pe râ me i pasina na avanuku o Holoperenesi? Ngaia ki harogo tanga i pasina, hanana i vagevagesigo renia na tonoha ni vaini. Râ me ma ko vagevage mangara na gete ni Asiria ga tagara i ruma raha iana o Nebukanesare. Ngaia ki obania vige hagahigasigo.”

¹⁴Ka Jutiti ki arami, ki vi: “Ti kani girara vi usisi? Ngaia ma ngekana. Inê kê vagevage gê agana. Na tarana ngekana ki page ama ni hagakoro obaku nga mataro me kê meme!”

¹⁵Vikê ka Jutiti ki aharaga ma ki hagesuru ma ki rêni bâkoro ngavê. Na kere gete tagara iana ki nanago tarana ma ki vatarangenia so i ano i maana o Holoperenesi na gavona na sipi, o Bagoasi i vatea renia ka Jutiti, hanana vi oga so igê ki ngêngê.

¹⁶Hemuri ka Jutiti ki banu me igê na ruma na gahu ma ki oga so igê. O Holoperenesi ki tenia ngavê, matena i bâsia. Ngaia ki gona na obana renia hanana vi memêru. Haganega tenia na matena i bâsia moramora, ngaia ki ama ni naasia nga na matena tanga vige uhungia ke tâ henia.

¹⁷Ngaia ki vi tanga, ki vi: “Gu tono ke tage vagevage.”

¹⁸Ka Jutiti ki arami, ki vi: “I koro era, araha! Matena gê vora me inê kê pe vagevage rârâ manga i ngekê.”

¹⁹Henaka, ma ka Jutiti ki ngê ma ki tono ma na marâ na gete tagara iana i bani hagarêgi.

²⁰O Holoperenesi ki koro ngavê na apena renia. Tahema ngaia ki banu hebêna re tonoha teharia na ani mavê na matena i totono i nago.