Read Kahua JUTITI 13 Bible Online

JUTITI 13 - Kahua bible

JUTITI 13

¹Ki rârâ matena i bungi raha, na kariana o Holoperenesi ka tako viga aporo, ma na ani ga oga so mênga o Bagoasi ki vi tangara, ka râ. Ngaia nogana ki hura ma ki purusia na ruma na gahu. Vikê ngaira hato ka râ ka mêru, suria i me bâraha na apeta re na tonoha.

²Ngaia getea ma ka Jutiti ki oga so i ruma na gahu henia o Holoperenesi, i bani ehu râ ki tâ i bea iana, suria i ruguhia hunia na vaini.

³Ka Jutiti ki bani vi tanga na kere gete tagara iana, ki oga naasia i metara na ruma na gahu, hanana ngaia ka Jutiti ki arâ ki nunginungi manga bani hanana i na ara ni bungiani. Ngaia ki bani hagarongoa vikana nikâ o Bagoasi.

⁴Hoita, na ara ni enoni ka bani râ hato vê. Ngairerua ma ka Jutiti mo Holoperenesi karu oga getererua igê na ruma na gahu. Ka Jutiti ki ura hagarangia na bea iana o Holoperenesi ma ki nungi i obana, ki vi: “Araha God raramohaga hunigo, gu tamaniê, hanana i akê me bâkoro na katoha iaku, hanana i rongo raha na atana i Jerusaleme.

⁵Nga na matena ngekê hanana go hagatahira igê na kariamu hetakui ma ko tamaniê kê akê me bâkoro igê na katoha iaku, hanana go mutera na merongamami ga obania viga mutegami igami.”

⁶Ka Jutiti ki ura râ tanga na u na bea i teha akê hagarania na bêna o Holoperenesi ma ki musia na tatapa borahu iana o Holoperenesi igê.

⁷Ngaia ki ura râ tanga na bea, ki rangu i varehuna o Holoperenesi ma ki nungi, ki vi: “Araha God iata na Isiraelita, gu hagaramoniê nga.”

⁸Hemuri ka Jutiti ki meura akê me na tatapa borahu ma ki tapigenia hagerua i hunana na riona o Holoperenesi ma ki rete musia râ na bêna.

⁹Ngaia ki purisia râ na apena tenia na bea ma ki tasia vato na gahu vavararaga pusira na namu tenigi na u na bea ga teha akê. Hemuri ngaia ki hura tenia na ruma na gahu ma ki vatea na gete tagara iana na bêna o Holoperenesi. Ngaia ki tugunia igê na anga ni ngêra.

¹⁰Hoi, ngairerua karu tage râ manga bani hanana garu arâ karu nunginungi. Matena garu hura hato tenia na tênga iata na me ni Asiria, ngairerua karu aharêvoro igê na maruguna ma karu tagere igê na tarihana na hungana mataro me karu tariha igê na maanipara ni hinua i Betulia.

¹¹Matena garu hagarangia, ka Jutiti ki ngere tangara na me ga anumasia na maanipara, ki vi: “Tangahia na maanipara! Tangahia na maanipara! God ki ngahisigia mênga. I ngekê nikâ ngaia ki bani hagabângenia na raramohana. Ngaia ki tamanigia na Isiraelita ma ki nahuira na merongaka.”

¹²Matena na mane ni me ka rongo hagagara renia na ringena, ngaira ka hatani rere vato tangagi na maanipara ma ka hagarongora na enoni raha i hinua.

¹³Ngaira hato, na kare ma na bani nuni, ka tango haku me tanga na maanipara, suria ga vi ma vi ka Jutiti ki asa vige aporo me. Ngaira ka tangahia na maanipara tangarerua ngaia ma na gete tagara iana ma ka ageagesirerua. Ngaira ka tanga na gi ki mavesira ma ka ura rihirerua na gete ngegana.

¹⁴Ka Jutiti ki ngere, ki vi: “Hagarahasia God! Hagarahasia! Hagarahasia God i ama ni takigia nga na Isiraelita. Ngaia ki bani mutera na merongaka reniê inê.”

¹⁵Ngaia ki tavoa hura na bêna o Holoperenesi tenia na anga ni ngêra ma ki hagabâsira na enoni renia, ki vi: “Ngaia ikê! Na bêna o Holoperenesi i teha i berarogata na mane ga bêngenira na mane ni me ni Asiria. Ikê nikâ na gahu vavararaga pusira na namu tenia na bea iana i tâ igê matena i ruguhia hunia na tonoha. Na Araha ki katoa na gete ki nahuia ki me.

¹⁶Inê kê tohe renia na Araha, vi o Holoperenesi ki asa vige hagatasiê. Na bâkorohaku kani beka suria ma ki pirisia. Ngaia ki pe meêmêru rârâ se vige hagamakiê. God ki anumasiê tare.”

¹⁷Na hinua hagenani ki konekone ngavê. Ngaira hato ka susure ma ka rahesia raha haku God, ka vi: “God iamami, igami kami hagarahasigo, suria i ngekê igo ko teharira na merongamami igami na kariamu.”

¹⁸Hemuri o Usia ki vi tanga ka Jutiti, ki vi: “Jutiti kareku, na Araha God raha teha ki hagakorogo teharira na gete hato i maveta. Ge hagarahasia na Araha God i hagavorarerua na vavearo ma na ano. Ngaia ki ngahisigo matena go retea râ na bêna na mane i bêngenira na merongaka.

¹⁹Na enoni hato ga tarohenia na raramohana God ki asa vige page bonotenia na hagêguringatogo iamu renia God.

²⁰God ke kasigo akê tare renia na tauhamu. Ngaia ke korokoro tangago renia, suria go toto suria tare ma ko pe magu, hanana vigu kasi manavamu, matena igami na goamu kami mamasiaga.” Ma na enoni hato ka ngere, ka vi: “Monari! Monari!”