Read Kahua JUTITI 14 Bible Online

JUTITI 14 - Kahua bible

JUTITI 14

¹Hemuri ka Jutiti ki vi tangara, ki vi: “Goaku, mu karinga na katoha iaku. I mavoraro râ mu torea na bêna ikê ma kamu kuharenia i murina hura na para ni hinua.

²Mu atea ta na mane ki bêngenigamu. Hoi, i mavoraro matena i raboa na arito, na mane hato i berarogami ga arari ni hearihatana ka tangaru, ma na mane mu atea ki meratavo uga hura tenia na hinua. Ki bâbâ manga vi soso tanga na maruguna, hanana vi taharira na mane ni me ni Asiria ga oga bâbâ tarege tenia na tênga iata.

³Na mane ni me ni Asiria ngegana ka page tangaru ma ka page tangotango aporo tanga na tênga, hanana ga hagaritera na mane ga bêngenira na mane ni me. Na mane ga bêngenira ka page tangotango râ tanga na ruma na gahu iana o Holoperenesi ma ka page tarahua i bani me. Vikana na mane ni me hato ni Asiria ka page bubununuga ma ka page sugare matena mu sugarira.

⁴Vikana igamu ma na tamami na Isiraelita hato kamu girara kamu tarigenira ma kamu mutera matena ga gavagava.

⁵Ma hagenago kamu unia me nga o Agiore ni Amone. Inê kê obania vi girara, manga vi ngaia ma ki bâbâgirara o Holoperenesi i tamasi erasira na Isiraelita ma ki hagatorangenia o Agiore tangagia, i takusia vi nahuia ki meme henigia.”

⁶Vikê ngaira ka râ tanga na ruma iana o Usia ma ka merâ me o Agiore. Matena i râ me ma ki bâsia na bêna o Holoperenesi i rimana na mane i têa akê tanga, ngaia ki bagamame ma ki vota so i ano.

⁷Matena ga ragea akê, o Agiore ki susure ki tubê so i ugana ka Jutiti, hanana i hagahigasia, ki vi: “Na ruma hato i Juta ke hagarahasigo ma na enoni hato i maveta ke bubununuga ngavê, matena ga rongoa na atamu.

⁸Hoi, gu visia me, go katoa mara ta?” Matena na enoni hato ka bani haku me rihia, ka Jutiti ki hagarongoa renigi na ara ni marâ i bani katogi, haganega tenia na matena i pania na hinua mataro me i ngekê.

⁹Matena i tamasi hato, na enoni ka ngerengere vagevage ma na ringeta ki tagitagi suria na hinua hagenani.

¹⁰Matena o Agiore ki rongogi hato na tarani hato i bani katogi God iata na Isiraelita, ngaia ki tongesuria ngavê. Ngaia ki nakara ka retea râ na gavona na varana ma ki vora re na Isiraelita ma na apaparaha iana ka Isiraelita nogata mataro me i ngekê.

¹¹Matena i tangi me, na Isiraelita ka kuharenia na bêna o Holoperenesi i murina hura na para ni hinua. Ngaira hato ka tangaru ma ka hura na apaneni me ma na apaneni me tangagi na tarihani na hungana i metara na hinua.

¹²Matena na me ni Asiria ka bâsia vikana, ngaira ka kasi tamasinga tangara na mane ni me iata ga bêngenira na rehagaro na mane ni me.

¹³Ma ngaira ngegana ka râ tanga na ruma na gahu iana o Holoperenesi ma ka vi tanga o Bagoasi, ka vi: “Gu hagaritea o Holoperenesi, suria na kare rakuraku na Isiraelita ka gatagata ka vato me tenia na hungana, hanana ga taharigia, ma igia ka page mutera hete.”

¹⁴O Bagoasi ki banu ma ki hitaria na gahu na kiboru ni mêru, suria i takusia ma, vi o Holoperenesi ki memêru ka Jutiti.

¹⁵Matena i pe rongoa rârâ ta na marâ, ngaia ki gurua râ na gahu ma ki banu, ma ki, e, i tarahua ma na pupurikigana na gahuana i aba râ igê na âgâga.

¹⁶O Bagoasi ki avaratenia. Ngaia ki ngere, ki tarisigi na tuguni iana, ki angi ma ki angi matomatoania.

¹⁷Ngaia ki banu igê na ruma na gahu, na agua i gâga tare igê ka Jutiti ma ki bâmareha renia.

¹⁸Ngaia ki tango hura ma ki ngere tangara na mane ga bêngenira na mane ni me, ki vi: “Na enoni rakuraku ngegana ka kare katogia! Na gete gi tage togo na Isiraelita ki hagamakia na ruma hagenani iana o Nebukanesare. Bâ banu ikana! O Holoperenesi ki me, ki tâtâ i ano akana ma na bêna ki mareha!”

¹⁹Matena na mane ga bêngenira na mane ni me ka rongo vikana, ngaira ka tarisigi na tuguni iata, suria ga takia. Ngaira ka magu ma ka bagtatako. Na tênga hagenani ki ngerengere ma ki hetogotogo.