Read Kahua JUTITI 15 Bible Online

JUTITI 15 - Kahua bible

JUTITI 15

¹Matena na mane ni me hato ga oga mêngara igê na ruma na gahu ka rongo vikana, ngaira ka magu nogata.

²Ngaira ka bubununuga ngavê ma ka hetogotogo nogata. Ngaira hato ka hegavasi totoko tenia na tênga, na anie ma gu arâ vê. Ngaira ka gava surigi na tara igê na bena ma na hungani.

³Na mane ni me ga tênga igê na hungani rihia i Betulia ka haganega ka gava nogata. Vikana na mane ni me hato na Isiraelita ka vato me hurira.

⁴O Usia ki hagatorangenira na mane tora tamasinga surigi na hinua i Betomesitaimi, i Bebai, i Goba, ma i Kola ma suria i Isiraele hagenani, ka hagarongora na enoni hato renia na tarana ngekana ma ka nungira nga, ka râ me ka tarigenira ma ka mutera na merongata.

⁵Matena ga rongo, ngaira hato ka taharira na me ni Asiria ma ka tarigenira ka râ ka tariha i Koba ma ka nahu tangotango renira. Ngaira nikâ i Jerusaleme ma na ani ga ogasigi na hungani ka tamanira ka taharira. Matena ga rongoa na tarana i akê me igê na tênga iata na ai ni Asiria, na me igê na apaneni i Gileata me Galilea ka taharira nogata na me ni Asiria ga gava ma ka mutera rako ngavê. Ngaira ka tarigenira rârâ ma ka tariha i na apanena i Tamasiko.

⁶Na ai ni Betulia, na ani ga oga so, ka vato huria na tênga iata na me ni Asiria, ka rurugu igê ma ka toregi vê rako na ruruguha.

⁷Matena na mane ni me na Isiraelita ga aporo me tenia na hearihatana, ngaira ka rurugu nogata na ruruguha ga hita so. Na enoni ga ogasigi na hinua raha ma na ani sisite igê na hungani ngaira nogata ka rurugu, suria i gahu teha ngavê.

⁸O Joiakimo na mane ni vogasiha i teha ma na enoni raha igê na Kaunselo iata na Isiraelita ka râ me tenia i Jerusaleme, hanana ga bâsigi mareta na tarani koro na Araha i bani katogi tangara na kariana ma nikâ hanana ga bâsia ka Jutiti ma ka vagevagesia.

⁹Matena ga ata me, ngaira ka hagarahasia ka Jutiti, ka vi: “Na bâbâhana raha i Jerusaleme kanigo. Na atamu ki rongo raha i berarogata na Isiraelita.

¹⁰Igo getego ma ko hagatahira na Isiraelita. Na Araha God raramohaga hunia ke obakoro renia na tauhamu. Ngaia ke korokoro tangago tare ki bê ki arâ.” Na enoni hato ka ngere, ka vi: “Monari! Monari!”

¹¹Na enoni ka rurugu igê na tênga iata na me ni Asiria surigi na tangiani tangahuru gi oru. Ngaira ka vatea ka Jutiti na ruma na gahu iana o Holoperenesi, na marâ ni ngêra iana ga tagarahigi re na siliva, na apira iana, na bea ni mamaroha iana ma na nahuninga hato i ruma iana. Ngaia ki aganarigi ma ki hagarutangia na tonki iana renigi tani, ma tani ki hagarutangigi igê na kati iana ga bani hagarêra na marâ ga okegi.

¹²Na gete hato na Isiraelita ka râ me ka bâsia ka Jutiti. Ngaira ka kiki ka hagarahasia ma ka mâmâ ka hagahigasia. Ka Jutiti ki votungira na gete hagarangia renigi na arani na apinige ni olive.

¹³Ngaia ma na gete getera ka hagamahegi na bêta renigi na ahani na apinige ni olive. Ka Jutiti ki ura igê na bêna na mâha ma ki bêngenira na gete igê na mâha. Na mane hato na Isiraelita ka mumurira. Ngaira ka hagamahegi na bêta renigi na takani na mahe, ka tangaru ma ka kirigi na ki ni hagarahasiha.