Read Kahua JUTITI 16 Bible Online

JUTITI 16 - Kahua bible

JUTITI 16

¹Hoi, ka Jutiti ki kiria na ki ni visiha koro i maata na Isiraelita hato, ma na enoni hato ka kiki suria.

²Ngaia ki ki vikê: “Ge kiria na Araha God iaka. Ge hagarahasia renigi na gogo ma na maramara. Ge hagarahasia renia na ki haoru. Ge katoa ke rongo raha na atana.

³Na Araha God kani teha igê na hearihatana. Ngaia ki hagatahiê tenira na merongaka ma ki meêaporo me tanga na tênga iata na kariana.

⁴Na me ni Asiria ka vato me tenigi na hungani. Na mane ni me iata ka gahu teha ngavê. Ngaira ka ahunigi na maravegani. Na hosi iata ka manasigi na hungani.

⁵Ngaira ka tohe viga hagamakaka na agua iaka, ka mutera na mane na gapu haoru iaka, ka metametarira so i ano na kare meramera iaka, ka henahuraura vê na kareka ma ka torera vê na kare viru iaka.

⁶Ma na Araha raramohaga hunia ki katora ma ki mutera renia na rimana na gete.

⁷Mareha vi na mane ni me na gapu haoru, mareha vi na mane borahu ga raramohaga kanige taharia ma ke tê hunia na mane ramo teha iata ma ka Jutiti hete ka karena o Merari kani hagavotaria renia na bâkorohana.

⁸Ngaia ki katora ka teha na Isiraelita ga mamasiaga. Ngaia ki naka râ na gahu ni nâ, ki monea na maana renigi na oile i sigini koro. Ngaia ki rere igê na tuguni bâkoro ngavê ma ki surugi na varehuna renia na sigana na gahu, hanana i hagamua renigi.

⁹Na êgana ka Jutiti ka hagabarea. Na bâkorohana ki gona i obana ma na tatapa borahu ki rete nguria na bêna.

¹⁰Na me ni Pesia ka bubununuga, suria i pe magu. Na ai ni Metia ka konetenia, suria i ramo.

¹¹Na merongaka ka magu, suria igia ka ngere hagaramo. Ngaira ka hagamamasiagagia ka memeaga ma igia ka ngirira ma ngaira ka magu. Ngaira ka hetogotogo ka gavagava.

¹²Na kareta na gete ga karekare ka ahurara ma ka mutera o kareta na ani ga hakuhaku marapageva. Ngaira hato ka me igê na henahuita iana na Araha.

¹³Inê kê kiria na ki haoru tanga God iaku. Igo Araha ko raramohaga ma ko bâhahanetaga. Na raramohamu ki raha ngavê ma igo ko tehateha tare.

¹⁴Na marâ hato go hagavorara ke tê viteamu, suria igo ko tamasi ma, ma ngaira ka vora me. Igo ko uhira renia na roga ni mêriha ma ngaia ki hagavorara ma ki asa ta na hitangita vige guguruga tangago.

¹⁵Na hungani ka angingi ka guguru tenigi na hunani ma ka apuripuri vato i asi. I maamu na hê ka rono manga na êbe. Ma igo ko takira na ani ga hagahigasigo.

¹⁶Na vogasiha, henaka i sigini koro ngavê, ngaia ki na marâ i sisite ma tanga na Araha. I tagenana ma na êbe ga susu renia tanga. Ma na enoni i têtê viteana, ngaia ki raha tanga.

¹⁷I era ngavê tangara na enoni ga merongasira na kariaku. Na Araha raramohaga hunia ki page hagaitangira igê na tangiana na suriha raha. Ngaia ki page hagatorangenira na gi ma na mama, hanana ga ngaugi na apeta. Ngaira ka page angiangi renia na mamasiaganiha iata tare ki bâ ki arâ.

¹⁸Matena na enoni ka ata i Jerusaleme, ngaira ka hagamatarotarora mareta suria na rotu ma ka kahu rahesia God. Ngaira ka susu tanga God, ka vogasia suri parongata mareta ma ka tagarenigi na votovoto iata tanga.

¹⁹Ka Jutiti ki hagapunarigi tanga God na nahuninga hato iana o Holoperenesi na enoni ga bani vatea renigi. Nikâ ngaia ki tagarenia tanga God na gahu vavararaga pusira na namu, i bani torea tenia na bea iana o Holoperenesi, hanana i hagamonaria na suruha.

²⁰Surigi na hageha gi oru na enoni ka ama ni gâga haku nga ka vagevage i maana na ruma ni rotu i Jerusaleme ma ka Jutiti ki oga henira.

²¹Hemuri na enoni hato ka aporo hegitigi i pasita. Ka Jutiti ki aporo nogana i pasina i Betulia ma ki oga igê na mako iana marena. Rârâ mataro me ki me, ki rongo raha na atana suria i Isiraele hagenani.

²²Rako na mane ka obania viga auragia ma ngaia ki usi vige êragi aporo nikâ i murina i me o Manase o vaniana ma ki hakunira na êvarina.

²³Na atana ki ama ni rongo raha nga. Ngaia ki oga i ruma i me tenia o vaniana. Ngaia ki gemêa ngavê. Hagenago ma ki me, ngaia ki votogi na nahuninga iana tangara na goana o Manase o vaniana ma tangara na goana so marena. Ngaia ki hatungia na gete tagara iana tenia vige kare vurivuri. Ka Jutiti ki me i Betulia, matena i tonga na 105 na harisi iana. Ga bagia igê na vaba ngahisia o vaniana. Na enoni ka angi maramara surigi na tangiani gi pi.

²⁵Matena ka Jutiti ki tahitahi mênga ma ki arihu era i murina i me, ki mareha rârâ ta na enoni vige hagabubununugara nikâ na Isiraelita.