Read Kahua JUTITI 2 Bible Online

JUTITI 2 - Kahua bible

JUTITI 2

¹Matena o Nebukanesare ki maneraha noga surigi na 18 na harisi, igê na tangahuru gi rua matarerua na tangiana igê na hageha hagenago igê na harisi, ngaia ma na mane ni hagaotonga iana ka harikato viga hagamonaria na tohenga iana, vi mutera na enoni hato igê na agua ga bani usi vige pane henia.

²Ngaia ki unihakura pinihi na gavumane iana ma na mane ga bêngenira na mane ni me iana ma ki hagarongora renia na katoha iana tangara na enoni ga bani usi vige tamania igê na hearihatana.

³Ngaira hato ka heaganari vi mutera ngavê na enoni ngegana.

⁴Matena i hato na hekarigiana, o Nebukanesare ki bonasia o Holoperenesi na ruata tanga ma ki bâsurira na mane ga bêngenira na mane ni me, ki vi vikê:

⁵“Inê o Nebukanesare na maneraha teha gê marungia na maveta hagenani, inê kê bonasigo, hanana go atera na mane ni me ga manisingenia na hearihatana: na 120.000 na mane ni me ni tavo uga ma na 12.000 na mane ni me igê na hosi.

⁶Hemuri ko taharigi na agua i kereso, suria ngaira ka usi vige pane heniê matena gê nungira.

⁷Go bonasira, hanana ga tagarenigi na mako ma na ve tangê, hanana ga hagabângenia, vi ngaira ka tagarenira purua ma mareta tangê. Inê kê mangariaga ngavê tangara. Inê be taharira. Na mane ni me iaku ka page mutera ngavê, suria ga manasia na maveta hagenani ma ka page rurugu tenigi na agua iata.

⁸Inê be hagavunusigi na maruguni renigi na gahuata ma na ve, na ani raha ma na ani sisite, ka page vunuvunu renigi rako ngavê na gahuata. Vikana ngaigi ka ahaharê ma ka tata berabera.

⁹Inê be henahuraura ngaira hato na ani ga tahitahi mêngara ma be torera vê tangagi na akereni na maveta.

¹⁰Ma igo o Holoperenesi, inê kê bonasigo, ko nanago taraku ma ko hagapusigi na agua hato iata hagenago taraku. Manga vi ngaira ma ka tagarenira mareta tangago, go taura tangê mataro me kê arâ me kê hagaitangira.

¹¹Ma ki manga ga usisi, siana ko takira. Go nahuira hete ka meme ma ko rurugu i na apanena hagenani go bani têa.

¹²Inê kê bani tohe nga ma kê togeaga nga kê hagamonaria na tohenga iaku, henaka gê meme se gê hatohato tenia vigê maneraha.

¹³Siana ko rekereke teharia na anima na marâ gê bonasigo renia. Inênga ka na maneraha iamu. Go takusia nga! Siana ko hagarihu, vigu katogi na bonasiha hato iaku tangago.”

¹⁴Vikê o Holoperenesi ki hura tenia na maneraha ma ki unihakura me na mane ni me, na ani raha ma na ani sisite, ga bêngenira na mane ni me ni Asiria.

¹⁵Ngaia ki râ suria na bonasiha iana na maneraha ma ki atera na mane ni me ga manisingenia ngavê na hearihatana: na 120.000 na mane ni me ga tavo uga ma na 12.000 na mane ni me igê na hosi henigi na epage ma na mage.

¹⁶Ngaia ki hagarêra ka ura harahara manga vi tanga na hearihatana.

¹⁷Ngaia ki torera nikâ rako era na kamelo ma na tonki, na ani mora ma na ani getera, hanana ga rutangigi na toraha ma nikâ rako era na sipi, na puruka ma na goti ni ngêra.

¹⁸Na ara ni mane ni me ki tavogi rako na ngêra ma na vurita raha renigi na golo ma na siliva tenigi na kiboru ni haga iana na maneraha.

¹⁹Hemuri o Holoperenesi ma na mane ni me hato iana ka tavoraha ka râ hagenago tarana na maneraha o Nebukanesare. Na kati ni me, na mane ni me igê na hosi ma na me ga tavo uga, ngaira hato ka tavoraha ka râ ka manasigi na apaneni i kereso hagenani.

²⁰Na ani mavê na mane ni me getera ka râ henira. Ngaira ka rako teha ngavê ma ki bara vige tomanira. Ngaira ka manga na ruruha ni pê se mangagi na one i one.

²¹Na tangiani gi oru i murina ga pania na hinua i Nineve, ngaira ka ata igê na bena i Beketileti hagarangigi na hungani i Silisia ma ka tênga i ngekana.

²²Tenia i ngekana o Holoperenesi ki tagere igê na hungani henira na mane ni me hato iana, na ani ga tavo uga, na ani igê na hosi ma na ani igê na kati ni me.

²³Ngaia ki ruhuruhurerua ngavê i Pute me Lute ma ki rurugu tenira na enoni hato i Rasisi ma tenira na Isimaelita ga oga i na akerena na bagamasusu raha hagarangia i Geleone.

²⁴Hemuri o Holoperenesi ki tarêhia na ve i Uparatesi, ki aharê voro i Mesopotamia ma ki ruhuruhugi na hinua hato ga pararihigi suria na ve i Aberone ki tariha i asi.

²⁵Ngaia ki rêa na apanena i Silisia ma ki mutera ngaira hato ga urapusia ma ki banu igê na apanena i Japete ki râ ki tariha hagarangia i Arabia.

²⁶Ngaia ki oga rihira na Metianita, ki hagamakakagi na ruma na gahu iata ma ki hanagora na sipi iata.

²⁷O Holoperenesi ki so tangagi na bena i Tamasiko. Ngaia ki na matena ga mêa na mu ni koni igê. Ngaia ki sungigi na ara ni mu hato igê, ki nahuira ka me na sipi, na goti ma na puruka, ki rurugu tenigi na hinua, ki tê erasigi ngavê na mu ma ki mutera na mane hato na gapu haoru.

²⁸Na enoni hato igê na tarasini ka bubununuga ngavê. Na enoni hato surigi na hinua i Taire, i Sitone, i Sure, i Okina, i Jaminia, i Asetote me Asekelone, ngaira ka magu ma ka tata ngavê.