Read Kahua JUTITI 3 Bible Online

JUTITI 3 - Kahua bible

JUTITI 3

¹Na enoni hato igê na tarasini ka hagatorangenira na mane tora tamasinga tanga na maneraha o Nebukanesare, ka nungia vi siana ki meraheariha.

²Ngaira ka vi: “O Nebukanesare, igo ka na maneraha go teha, igami kami ama ni panepane nga henigo. Igami kami nanê hanana mi tamanigo ma kami arâ surigi na ani mavê na bonasiha iamu tangagami.

³Na ruma iamami, na mako hato iamami, na mu iamami, na togoha iamami ma na ruma na gahu iamami, ngaigi hato ka na animu. Igo ma ko giraragi.

⁴Na hinua iamami ma igami na enoni igê ka na animu. Igo ma ko giraragami.”

⁵I murina ga bani ata râ na mane tora tamasinga ma ka bani nungia na marapeha,

⁶o Holoperenesi ki bêngenira na mane ni me iana o Nebukanesare ka bêso tanga na tarasini. Ngaia ki nakara na mane ni me surigi na hinua hato ga pararihigi, ma ki atera na mane so i hinua ga pane henia, ka mane ni me hanana ga tamania.

⁷Na enoni surigi na hinua ma surigi na agua hagarangigi ka mêri renia o Holoperenesi. Ngaira ka takerenigi na mahe, ka mâmâ ma ka tarugigi na gogo.

⁸Ma o Holoperenesi ki ruhuruhugi na agua ni vogasiha ni ataro iata ma ki tapigi so na apinige iata ga vogasi igê. O Nebukanesare ki bani bonasia, hanana vi hagaerasigi na nunuta na ataro iata, hanana na ara ni enoni hato surigi na agua ka vogasia ma o Nebukanesare ma ka rahesia manga vi ngaia ki God.

⁹Hemuri o Holoperenesi ki râ nga ki ata igê na maruguna i Jeserele hagarangia i Totane i maatigi râ na boteni na hungani i Juta.

¹⁰Ngaia ki tênga i berarogaterua i Geba me Sikitopolesi. Ngaia ki oga i ngekana suria na hageha gi tage, hanana i rurugi haku nikâ na marâ hato tangara na mane ni me iana.