Read Kahua JUTITI 5 Bible Online

JUTITI 5 - Kahua bible

JUTITI 5

¹Matena o Holoperenesi i teha i berarogata na mane ga bêngenira na mane ni me ni Asiria, ki rongo vi na Isiraelita ka bani nanêa na hearihatana, ka bani hagabarasigi na teha igê na hungani, ka bani pararihigi na boteni na hungani ma ka bani hagabarasigi na tara i bena,

²ngaia ki mangariaga ngavê. Ngaia ki unihakura me na enoni raha hato iata na Moabita, na Amonita hato ga bêngenira na mane ni me, ma na gavumane hato ga bâsurigi na tarasini i kereso.

³Ngaia ki vi tangara, ki vi: “Igamu ka na ai ni Kanani. Hoi, mu hagarongoê me renira na enoni ga ogasigi na hungani igê. Na hinua ta kaniga ogasigi? Na mane ni me iata ka rako manga i he? Ngaira ka ramoramo vari? I he ki râ me igê na ramoha iata? Ti ka na maneraha iata i bêngenira na mane ni me iata?

⁴Tanu hega ngaira getera ma kaniga usi vige hura me ke tagarenira mareta tangê ma na enoni hato i kereso ki mareha?”

⁵Hoi, o Agiore i bêngenira na mane ni me hato ni Amone, ki aramia o Holoperenesi, ki vi: “Maneraha, inê na kariamu inê kê nungigo ko aganariê kê tamasi ma ko karingê. Inê be tamasi igê na monariha tangago renira na enoni ngegana ga ogasigi na hungani hagarangia na tênga iamu. I asa be hagaparugo.

⁶Na enoni ngegana ka na apaparaha iata tani na ai ni Babilonia.

⁷Ngaira ka usi vige rahesira na ataro iata na êvarita, hanana ga rahesia hete na Araha God. Suria ngaira ka kasira râ na ataro iata na êvarita, tahema ka paira hura tenia na apanena iata. Ngaira ka gava tanga i Mesopotamia. Ngaira ka oga i ngekana ma ka oga arihu igê.

⁹Rârâ ma na God iata ki bonasira ka pania i Mesopotamia ma ka râ tanga i Kanani. Ngaira ka oga i ngekana ma ka ruruguha ngavê renigi na golo, na siliva ma na togoha.

¹⁰Hemuri matena na magêha raha ki tarahua i Kanani hagenani, ngaira ka râ tanga i Esipito ma ka oga i ngekana surigi na mateni ga oga igê na ngêra tangara. Na enoni ngegana ka kahu hêtata vi na Isiraelita. Matena ga oga i ngekana ngaira ka tataka ngavê, i bara vige tomanira.

¹¹Vikê na maneraha i Esipito ki haganega ki merongasira. Ngaia ki ura i murita ka tagarahigi na hê. Ngaia ki hagamamasiagara ma ki katora ka vora re na kare rakuraku.

¹²Ma ngaira ka avarasia na God iata, ma ngaia ki hagaitangira na ai ni Esipito renigi na hagaitangiha ga tê erasira ngavê. Tahema na ai ni Esipito ka paira hura.

¹³Na God iata na Isiraelita ki hagamamataria na Asi Memera i nago tarata na Isiraelita

¹⁴ma hemuri ki bêngenira suria na tara tanga i Sinai ma i Katesi Baranea. Na Isiraelita ka tarigenira hura na enoni hato ga ogasia i Negeve i Kanani.

¹⁵Ngaira ka oga parênia na apanena iata na Amorita ma ka mutera ngavê na ai ni Geseboni. Hemuri ngaira ka tarêhia na ve i Jotano ma ka têa hagenani na apanena huhunganiga.

¹⁶Ngaira ka tarigenira hura na Kananita, na Perisita, na Jebusita, na Sekemita ma ngaira hato na Girigasita. Na Isiraelita ka ogasigi arihu me noga na hungani ngegana.

¹⁷Na God iata ki kitenigi na eraha. Ngaira ka oga igê na ramana suria na matena ga toto suria God igê.

¹⁸Ma na matena ga murisigea, rako na hitangita ka me igê na hearihatani, ma na ani ga pe me na merongata ga henahuraura tanga na agua hagatê. Na merongata ka ruhuruhua na ruma ni rotu iana na God iata ma ka ogasigi na hinua iata.

¹⁹Ma i ngekê na Isiraelita ka bani aporo me i pasita tenigi na agua ga totoko surigi, suria ga aharia aporo na God iata. Ngaira ka têa aporo na hinua i Jerusaleme i oga igê na ruma ni rotu iata, ma ka ogasigi aporo na hungani ga hihiruga i murita ga râ.

²⁰Maneraha, manga na enoni ngegana ma ka aharêngia ta na ramata iana God iata, henaka ga girara nga me, ma igia ka girara vi ngaira ka tasi monari, hoi, igia ka girara ga teharira.

²¹Ma ki manga vi ngaira ma ka pe tasi rârâ, hoi, gu nakara vê nga mareta, suria na Araha God iata ki page anumasira, i era ma igia ka maki i maata na enoni hato i maveta.”

²²Matena i tamasi hato o Agiore na enoni hato rihia na ruma na gahu ka haganega ka tamasi hepusi. Na mane ni me iana o Holoperenesi ga bêngenira na mane ni me ma na Moabita ma na me tenia na tarasini i kereso ka obania viga nahuia râ nga ki meme.

²³Ngaira ka vi: “Magutenira ma na Isiraelita? Na marâ purua ngegana! I bara tangara vige megiaheariha. Nika, ge taharira!

²⁴Holoperenesi, bâ, na mane ni me iamu ka gahu. I mataku ma tangara viga mutera ngavê!”