Read Kahua JUTITI 6 Bible Online

JUTITI 6 - Kahua bible

JUTITI 6

¹Matena na enoni ga rihia na ruma na gahu ga hekarigi igê, ka muni so aporo, o Holoperenesi ki ramonia o Agiore i maata na enoni hato i ngekana: na me tenigi na tarasini i kereso, na Moabita, na mane ni me ni Amone ga tatêhia na hearihatana.

²Ngaia ki vi: “Agiore, go vi, vi o ti kanigamu igo ma na me iamu ni Eparaimi? Go vi vari vi na poropete kanigo? Ti kanigo, go vi tangagami, vi siana kami meraheariha na Isiraelita, suria vi God iata ngekana ki anumasira? Ti kani God? Ngaia nga ka no Nebukanesare! Ngaia ki page hagatorangenira na mane ni me iana ma ki page sinora ngavê na Isiraelita ngegana tenia na maveta. Na God iata ki asa vige tamanira.

³Ma igia na kariana o Nebukanesare, ki mataku ma tangagia viga menamenarira. Na mane ni me hato iata ka manga na veretage na mane ni me tangagia. Na mane ni me iaka igê na hosi ka page sugarira,

⁴ma ka page aharêsira manga na maganuha raha. Na hungani ka page nugugi na gaputa ma na gahuata ka page ahunigi na maruguni. Matena ga taharira hato, ngaira hato ka page magahuru ngavê, mareha vi na ani gitage togo ma vige tahi. Nga hanana i haribona o Nebukanesare. Ngaia ki na araha tanga na maveta hagenani ma ki pe tamasi purua ma.

⁵Agiore, igo na Amonita ma. I mareha vi na mane ni me monari kanigo! Igo ko pe tamasi manga vi igo ka na apanena iamami. Tahema ki asa vigu page bâsiê nikâ mataro me kê hagaitangira hato na enoni rakuraku ngegana ga gavatenia i Esipito.

⁶Matena ngekana na mane ni me iaku ka page ahurago renigi na ora ma na tatapa borahu iata. Igo ko page meme henira na Isiraelita.

⁷Hoi, na me iaku ka page megotagere igê na hungani ma ka page kasigo igê na hitangini na hinua iata na Isiraelita,

⁸ma igo ko page meme henira na enoni igê.

⁹Se Agiore, tanu hega go tako bâraha? Igo ko pe vi vari, vi inê ki asa be henahuraugi na hinua? Hoi, gu girara nga, vi na ara ni tamasinga iaku ka page vagavaga me mave vego!”

¹⁰Hoi, o Holoperenesi ki bonasira na me iana ga oga nanê i ruma na gahu iana, hanana ga taua o Agiore ma ka merâ tanga na hinua i Betulia, hanana ga tagarenia tangara na Isiraelita.

¹¹Vikê na me ka têa o Agiore ma ka mehura tenia na tênga tanga na maruguna. I ngekana ngaira ka metagere igê na hungani ki tariha igê na vebanga i Betulia ma kereso.

¹²Matena na mane i hinua ka bâsira ga tagere me, ngaira ka tavogi na tangaruha iata ma ka tango tagere tanga na botena na hungana. Na mane ga nahunigi na hêsigogo ka hêsigogora hesurisuri vato na mane ni me iana o Holoperenesi. Vikê ngaira ka hagabarasira, hanana vige tagere nga me igê na hungana.

¹³Na me ni Asiria ka ura rukuruku ngahisia na tarihana na hungana. Ngaira ka rakua o Agiore ma ka pania so ki tâ i gunitara na hungana ma ngaira ka aporo tanga o Holoperenesi.

¹⁴Hemuri na Isiraelita ka so me tenia i Betulia, ka rupasia o Agiore, ka metagere banu i hinua ma ka merâ i pasita na enoni raha ni hinua.

¹⁵Ngaira ka no Usia karena o Mika tenia na varo ninuni iana o Simeone, o Babirisi karena o Gotoniele, ma o Karamisi karena o Melekiele.

¹⁶Na enoni raha ka unihakura me na meraha. Na gete hato ma na mane na gapu haoru ka tango me nogata tanga ga rongoa na hekarigiana. Ngaira ka merâ me o Agiore ki ura i maata na enoni. O Usia ki hagatea, ki vi: “Na ta?”

¹⁷O Agiore ki hagarongora renigi na tamasinga igê na hekarigiana iana o Holoperenesi renia na hearihatana, renigi na tamasinga iana marena tangara na me ni Asiria ga bêngenira na mane ni me, ma renia manga i he o Holoperenesi ki tamasi paroparo renigi na katoha iana tangara na Isiraelita.

¹⁸Matena na enoni ka rongo vikana, ngaira ka susure ma ka rahesia God. Ngaira ka nungi, ka vi:

¹⁹“Araha God raramohaga, gu bâ! Na merongamami ka tamasi paroparo ka erasigami igami na kariamu. Gu takigami ma ku tamanigami.”

²⁰Hemuri ngaira ka hagagatagatania o Agiore ma ka vi tanga, vi na tarana i katoa ki koro.

²¹Matena i hato na hekarigiana, o Usia ki merâ o Agiore i pasina ma ki magoto tangara na meraha. Igê na bungiana hagenani ngekana ngaira ka avarasia igê God iata na Isiraelita.