Read Kahua JUTITI 8 Bible Online

JUTITI 8 - Kahua bible

JUTITI 8

¹Hoi, ka Jutiti ki rongogi ga akê me na tarani ngegana. Ka Jutiti kani ka karena o Merari. Na raraha iana ki manga ikê: O Okesi ki apara o Merari, o Josepo ki apara o Okesi, o Osiele ki apara o Josepo, o Helikia ki apara o Osiele, o Anania ki apara o Helikia, o Giteone ki apara o Anania, o Rapaimi ki apara o Giteone, o Agitube ki apara o Rapaimi, o Elia ki apara o Agitube, o Gilikia ki apara o Elia, o Eliaba ki apara o Gilikia, o Natanaele ki apara o Eliaba, o Salamiele ki apara o Natanaele, o Sarasatai ki apara o Salamiele, mo Isiraele ki apara o Sarasatai.

²O vaniana ka Jutiti ka no Manase. Ngaia o Manase ma ka Jutiti ka na tage raraha ma na aparaha. O Manase ki me, matena ga rurugi na koni.

³Na arito ki nahuia matena i oga i mu ki bâsurira na enoni tagara ga ruguni na koni ma hemuri ngaia ki me, matena i tâ igê na bea iana i ruma iana i Betulia. Ngaira ka bagia igê na matahuta na êvarina igê na bena i berarogaterua i Totani me Balamone.

⁴Ka Jutiti ki nâ ki oga surigi noga na harisi gi oru ma na hageha ge he.

⁵Suria i rugu ngavê na obana, ngaia ki tagarahia na kere kiboru i gerina aberabera na ruma iana ma ki oga igê ma ki hagesuru kakaga.

⁶Ngaia ki bani hari me vikana matena i nâ, nga noga ma igê na tangiani i apu vige harihari igê: ngaigi ka na tangiani i nago tarana na tangiana ni mamaroha, ma ngaia na tangiana ni mamaroha, na tangiana i nago tarana na hageha haoru, ma na tangiani raha ma na tangiani ni vagevageha iata na Isiraelita.

⁷Ka Jutiti ka na gete i bâkoro ngavê ma na tauhana ka hagakoro obata na enoni. O vaniana ki me panigi so na golo ma na siliva, na enoni tagara ma na kare vurivuri, na togoha ma na mu tanga. Ngaia ki torêri ki bâsurigi na marâ hato ngegana.

⁸I mareha rârâ ta na enoni ge girara ta na tarana vige pe koro renia ka Jutiti. Ngaia ki hagahigasia ngavê God.

⁹Ka Jutiti ki rongo vi na enoni ka hagagege bâraha tanga o Usia, suria ga rumakaka ngavê renia i abubu na ve. Ngaia ki rongo, vi o Usia i tohe vi tagarenia na hinua tangara na ai ni Asiria i murini na tangiani gi rima, matena i aramira na enoni ga hagagege tanga.

¹⁰Ka Jutiti ki hagatorangenia ta na gete vurivuri i bâsurigi na nahuninga hato iana, hanana i unira me na enoni raha i hinua o Usia, o Gabirisi mo Karamisi.

¹¹Matena ga ata me na enoni raha ngegana, ka Jutiti ki vi tangara, ki vi: “Mu karingê nga. Igamu nga ka na enoni raha iata na enoni i Betulia, ma na tarana mu tamasia tangara na enoni i ngekê ki pe oto. I pe oto tangagamu, vigamu tohetohe i maana God, vigamu tagarenia na hinua tangara na merongaka, manga vi pe tamanigia na Araha ma ki kahu hatohato na tangiani gi rima.

¹²I oto vari tangagamu vigamu uhungia God vikana i ngekê? Na enoni purua ma kanigamu! Mu takusia vari, vi igamu kamu raha teharia God? Mu takusia vari, vi igamu kamu giraragi na katoha iana God tangara na enoni?

¹³Na Araha raramohaga hunia nga kanigamu uhungia! Igamu kamu hite ngavê ma kamu page bonobono hatara nga!

¹⁴Igamu ki asa vigamu aitangisigi na aitangihata na enoni ma na takotako iata, ma ki manga i he kamu aitangisigi na takotako iana God ma kamu ramatenigi? Manga i he kanigamu girara vigamu vivi mu aitangisia God na Hagavoraha? Mareha, goaku. Siana hagetage kamu hagamangaria na Araha God iaka.

¹⁵Henaka i pe obania vari vige tamanigia ma ka kahu hatohato na tangiani gi rima, ngaia ki nahuni ramoha, hanana i hagatahigia igê na ani mavê na matena i atea se i mutegia i maata na merongaka.

¹⁶Siana kamu naka na ramata tanga na Araha God iaka. God ki pe maratoraka igia na enoni. Igamu kamu pe girara vigamu bonasia God. Ngaia ki mareha vi na enoni. Igamu kamu pe girara vigamu hagamagusia manga vi ngaia ka na enoni.

¹⁷Mareha vê! Ge avarasia God ma ke piringiape hete, vi ngaia ki hagatahigia. Manga vi ngaia ma ki obania, ngaia ki page aganarigi na avarasiha iaka.

¹⁸Igia ka pe rahesigi na nunuta na ataro na enoni ga tagarahigi. Henaka na êvarika ka bani kato vikana, ma i ngekê nga ki mareha rârâ ta na hitangita na hagosi ninuni iaka, na raraha iaka, na hinua iaka, na ani sisite se na ani raha, vige kato vikana.

¹⁹I nago matena na êvarika ka kato vikana, God ki nakara na merongata ka mutera ma ka henahuraugi na nahuninga hato iata. Ngaira ka sinora ngavê!

²⁰Ma suria igia ka pe hagarapea na ataro ma na Araha God hete, tahema igia ka girara ga hagêguritogo renia, vi ngaia ki asa vige usitenigia se vige rumakaka renigia na Isiraelita.

²¹Manga vi na merongaka ma ka henahuraua na hinua iaka, ngaira ka page henahuraua nikâ i Juta hagenani ma ka page rurugu tenia na ruma ni rotu iaka i Jerusaleme. Ma God ki page hagamesigia, suria igia ka nakara na merongaka ka hagaerasia na ruma ni rotu iana.

²²Ngaia ki page hagaitangigia, suria ngaira ka mutera na goaka ma ka henahuraura ma ka hagaerasia na apanena iaka, God i bani haganahunigia renia. Ngaira ka page henahuraugia vê tangagi na apanena iata. Igia ka page voravora re na kare rakuraku iata. Ngaira ka page ruhigia ma ka megiamarabe.

²³Henaka igia ka tagarenia mareka tangara na merongaka i ngekê, ngaira ki asa vige page koro tangagia. Ma na Araha God iaka ki page hagamakigia renia.

²⁴Hoita, goaku, ge hagabângenia tangara na goaka, hanana ga amaka suria na parongaka. Manga i mareha, ngaira ka page meme ma na ruma ni rotu ma na bea ni vogasiha karu page aruhuruhu.

²⁵Na Araha God iaka ki uhungigia mangara na êvarika ma ki ararigia viga visia koro renia.

²⁶Takusia aporo na matena i uhungirerua igê o Abarahamo mo Isako. Takusigi aporo na tarani ga tarahua o Jakobo, matena i bâbâ surira na togoha iana o Labane o mona i Mesopotamia.

²⁷God ki pe uhungigia bâraha, hanana vige tototo suria mangara na êvarika. God ki pe hagaitangigia renigi na bagatauhaka ma ki haganunugia hete igia ka rahesia.”

²⁸Hoi, o Usia ki aramia ka Jutiti, ki vi: “Na marâ go tamasigi ka nahunigi na takotako koro. I asa ta na enoni vige urapusigi.

²⁹Mareha vi i ngekê ma kanigo nahuni takoha mataha. Haganega tenia na matena go sisite mênga, na enoni hato ka bani bâsigo me, vi igo ko nahunigi na aitangisiha ma na takoha mataha.

³⁰Ma na kariaka ka mesi tonoha. Ngaira ka tugurigami kami visigi na marâ mi bani visigi tangara ma kami tohe. Na tohenga ngekê ki bara vigami aharêngia.

³¹Hoi, suria go toto suria ngavê God, gu nungia God tangagia igia ma na goaka. Gu nungia na Araha ke hagarangi, hanana ge nonga na ve iaka, hanana igia ke ramo aporo.”

³²Ka Jutiti ki arami, ki vi: “I koro ma. Inê be katoa ta na marâ na goaka na Siu i asa vige bonotenia.

³³Hoita, i rikini bungi kamu anumasia na maani para ni hinua, hanana igamirua inê ma na gete tagara iaku kamuru huhura tenia na hinua. Ma i nago tarana na tangiana mu surua vigamu tagarenia na hinua tangara na merongaka, na Araha ki page nakê kê hagatahira igê na Isiraelita.

³⁴Ma siana kamu surareê vi na ta kanigê page katoa. Inê kê page hagarongogamu renia i na murina na tarana ngekana.”

³⁵O Usia ma na tamana ka vi tanga, ka vi: “Go hagaovo. Na Araha God iaka ke ngahisigo, matena go hagaitangira na merongaka.”

³⁶Hoi ngaira ka hura vê pania na kiboru i gerina na ruma iana ka Jutiti ma ka aporo tangagi na atohata ni anumasiha.