Read Kahua ESETA (Hebereo) 1 Bible Online

ESETA (Hebereo) 1 - Kahua bible

ESETA (Hebereo) 1

¹Na maneraha o Seresese ki oga igê na atohana i ruma raha iana i Susa, na hinua raha i Pesia. Ngaia ki marungigi na apaneni 127 i tariha i Intia ma ki tariha i Nubia.

³Igê na oruta na harisi iana i maneraha igê, ngaia ki magoto tangara ngaira hato na mane ni hagaotonga iana ma na kariana. Na mane ni me ni Pesia ma ni Metia ka oga nikâ i ngekana, ma ngaira nikâ na mane, ga bâsurigi na apaneni hehegitigi henira na enoni raha surigi.

⁴Surigi na hageha hagenani ge ono ngaia ki hagarere renigi na ruruguha i ruma raha iana, henigi na nahuninga iana ma henigi na bâkorohani ma na maremaregata na enoni.

⁵I murina ngekana ngaia ki magoto nikâ tangara na mane hato i hinua raha i Susa, na mane ruruguha ma na mane matareha. Na magotoha ki oga surigi na tangiani gi pi, igê na mahera i mu ni mahe i metara na ruma raha iana na maneraha.

⁶Na mahera ka hagamahea renigi na gahu maravarava ma na ani siki, ga kuharenigi i berarogani na u na hê reoreoga. Na varo rotorotoaga memera ka surugi igê na ringi na siliva igê na u, ka kuku igê na gahu. Ngaira ka aba na mahera renigi na hê siki, na hê ahe, na hê misi ni bo ma na hê marava. Na bea ga tagarahigi re na golo ma na siliva ka nakagi igê na mahera.

⁷Ngaira ka tono igê na kâkâ na golo, ga bâ hehegitigi. Na maneraha ki bâsurira renigi na vaini iana.

⁸Ngaira ka ata ni totono mavê. Na maneraha ki bani bonasira na enoni tagara i ruma raha iana, hanana ga nakara mavê na mane ka totono surigi na obaniha iata.

⁹Igê nga na matena ngekana ka Vasiti na gete iana na maneraha ki magoto nogana i rarona na ruma raha iana na maneraha tangara na gete.

¹⁰Igê na pita na tangiana ni magotoha, na maneraha ki tono ma ki koro ngavê na obana. Vikê ngaia ki unira me na vere pi na mane na vâmavo, ga tagara tanga ma ngaia. Ngaira ka no Mehumane, o Biseta, o Garabona, o Bigita, o Abagata, o Setare ma o Karakasi.

¹¹Ngaia ki bonasira ka merâ me ka Vasiti kaniana, i naka i bêna na tarepuri i marisina vi ngaia kani kaniana na maneraha. Kaniana ki na gete i bâkoro ngavê. Na maneraha ki obania vi hagarere renia na bâkorohana kaniana tangara na mane ni hagaotonga iana ma ngaira hato i harora.

¹²Matena na kariana na maneraha ka hagarongoa ka Vasiti kaniana renia na tamasinga iana na maneraha, ngaia ki usi vige râ me. Vikana na maneraha ki mangariaga ngavê.

¹³Hoi, na tauhana na maneraha, ngaia ki hagate tarana tare i pasita na mane ni hagaotonga renigi na marupeana ma na aharêngiana na ramata. Vikê ngaia ki unira me na mane ni hagaotonga iana ka girara vi na tarana ta kani katoa.

¹⁴Na ani i hagate tarana tare i pasita ka no Karesena, o Setare, o Atamata, o Tarasisi, o Meresi, o Marasena, ma o Memukane. Ngaira ka na mane ni hagaotonga gi pi ni Pesia me Metia. Ngaira ka têgi na ani raha na tagaraha i ruguhana na maneraha.

¹⁵Ngaia ki vi tangara na mane ngegana, ki vi: “Inê nga o Seresese, inê kê hagatorangenira na kariaku, hanana ga vi tanga ka Vasiti kaniaku ki arâ me, ma ngaia ki usi ngavê! Hoi, na ramata ki vi marata? Na ta ka katoa renia, suria i guguruga ngavê?”

¹⁶Vikê o Memukane ki vi tangara na maneraha ma na gavumane iana, ki vi: “Ka Vasiti na gete raha ki pe erasia ma na maneraha ma ki erasira nikâ hete na gavumane iana na maneraha ma na enoni hato surigi na apaneni hato.

¹⁷Na ara ni gete hato surigi na ara ni apaneni ka page ruhira o vaniata, matena ga rongoa na tarana, i katoa ka Vasiti na geteraha. Ngaira ka page vivi, ‘Bâ, na maneraha o Seresese i bonasia ka Vasiti kaniana, hanana vi arâ me, ma ngaia ki usi!’

¹⁸Manga na gete iata na gavumane ni Pesia me Metia ga oga i ruguhana na maneraha ma ka rongoa na bagatauhana ka Vasiti na geteraha, ngaira ka page merahetuguri ototo râ nga o vaniata, mareha vige tangisira. Surigi na ara ni hinua na gete ka page hato, vige hagahigasira o vaniata. Ma na mane ka page mangariaga tangara kaniata.

¹⁹Maneraha, manga vigo obania, hoi, igo, suria go maneraha, gu tarohenia rârâ, vi ka Vasiti ki apu hagetage vige râ me nikâ i pasimu. Gu hatungia tenia vige geteraha. Gu segea so nga igê na buka ni ramata tangara na ai ni Pesia me Metia, hanana i tâtâ nga ki bê ki arâ. Hemuri ko urusia kaniamu renia na gete getea i korokoro teharia.

²⁰Manga na enoni hato surigi na apaneni hato go marungigi, ma ka rongoa hagapere na tarohana vikana, na gete hato ka page hagahigasira maninga o vaniata, naka ma o vaniata ka ruruguha se ga matareha.”

²¹Na maneraha ma na gavumane iana ka aganaria na tarana ngekana, ma na maneraha ki râ suria na takoha iana o Memukane.

²²Tangagi na ara ni apaneni i marungigi, ngaia ki kasi tamasinga igê na tamasinga ma na segesegeha ga râ hehegitigi surigi. Ngaia ki vi, vi na mane êragi ngaia nga kani raha tanga na ruma iana ma ngaira nga kaniga nahuni ramoha.