Read Kahua ESETA (Hebereo) 2 Bible Online

ESETA (Hebereo) 2 - Kahua bible

ESETA (Hebereo) 2

¹I murina i bani vato na mangariaganiha iana na maneraha, ngaia ki takusia mênga na tauhana ka Vasiti ma nikâ na tarohana renia tangara na enoni.

²Vikê na hitangita na mane ni hagaotonga i hagêguritogo renira, ngaira ka vi tanga, ka vi: “Hega ko pe gari rârâ, hanana gu tarahura tani na kare viru ge bâkoro?

³Igo ko girara go atera na mane ni hagaotonga surigi na apaneni hato go marungigi, hanana ga merarâ me na kare viru hato i bâkoro na apeta tanga na ruma ni gete iamu ikê i Susa na hinua raha. Go naka o Hegai na vâmavo ki bâbâsurira, suria ngaia ki bâsurira na gete iamu, hanana ga maningaira ka bâkoro ngavê.

⁴Ma hemuri ko torea na kere gete na ani i râ me i mangatamu ma ko auragia urusia ka Vasiti.”

⁵I Susa ki oga igê ta na mane na Siu. Ngaia ki no Moretekai karena o Jaire. Ngaia ki tenia na varo ninuni iana o Benamino ma na raraha iaterua o Kise ma o Simi.

⁶Matena o Nebukanesare na maneraha i Babilone ki henahuraua o Jegonia na maneraha i Juta tenia i Jerusaleme henira na enoni getera, o Moretekai ki na hitangita.

⁷Ka Eseta kani kesina tonge. Na Siu ka visia vi ka Hatasa. Ngaia ka na viru i bâkoro ngavê. Na apena ki bâkoro era. Matena garu me na enana, o Moretekai ki têa ma ki marupea manga vi ka karena marena.

⁸Matena na maneraha ki haribona, viga merarâ me na kere gete, ngaira ka merarâ me rako na kare viru tanga i Susa. Ka Eseta ka na hitangita. Ngaira ka kasia ka Eseta ki oga nogana igê na ruma raha iana na maneraha, hanana o Hegai ki bâsuria igê, suria ngaia ki bâsuria na ruma ni gete.

⁹O Hegai ki takuia ka Eseta ma ki koro tanga. Ngaia ki haganega ototo râ nga ki hagabâkoro ki hirihirisia ma ki vatea renia na ngêra, tanga i bâkoro na apena renigi. Ngaia ki vatea renia na kiboru i koro ngavê igê na ruma ni gete, ma ki atera na kere gete gi pi tenira na ani i ruma raha iana na maneraha, hanana ga bâsuria.

¹⁰Hoi, ka Eseta ki pipinihia marena, vi ngaia ki na Siu, suria o Moretekai ki vi.

¹¹I na ara ni tangiani o Moretekai ki arigurigu rârâ i maana na mahera ni ruma ni gete, hanana i obania i girara, vi ka Eseta ki manga i he ma vi na tarana ta ki page tarahua.

¹²Na maningaiana na gete ki oga suria na harisi gi tage. Na hirisiana renia na oile ni mire ki oga surigi na hageha ge ono, ma na hirisiana renia na oile ni balasame ki oga surigi na hageha ge ono nikâ. I murina ngekana ka torera tatage na kere gete tanga na maneraha o Seresese.

¹³Matena ga arâ tenia na ruma ni gete tanga na ruma raha iana na maneraha, ngaira ka girara ga gahugahu manga hanana ga obania.

¹⁴Ngaira ka arâ i ngekana igê na manurahitagani, ki tangitangi me ma ka torera tanga na ani getea na ruma ni gete. I ngekana o Sasagasi ki bâbâsuria igê, suria na vâmavo ki bâbâsurira ngaia na gete râma iana na maneraha. Ngaira ka pe aporo râ i pasina na maneraha, nga noga ma matena i obanira ma ki unini na atata.

¹⁵Hoi, i râ me na matena iana ka Eseta, hanana i râ i pasina na maneraha. Ka Eseta kani ka karena o Abigaile ma kesina tonge o Moretekai i têa. Ka Eseta na enoni hato ga bâsia, ka konetenia na bâkorohana. Matena i râ me na matena iana i banu, ngaia ki gahu manga i visia o Hegai, na vâmavo i bâsuria na ruma ni gete.

¹⁶Vikê igê na pita na harisi o Seresese i maneraha surigi, igê na tangahuruta na hageha na Tebete, ngaira ka merâ ka Eseta i ruma raha tanga na maneraha o Seresese.

¹⁷Na maneraha ki tenia ngavê teharira na ani getera na kere gete. Ngaia ki koro tanga ma ki takuia ngavê teharira na ani getera na kere gete. Ngaia ki naka i bêna ka Eseta na tarepuri i marisina kaniana na maneraha ma ki kasia ki geteraha urusia ka Vasiti.

¹⁸Hemuri na maneraha ki katoa na magotoha raha, hanana ga hagahigasia igê ka Eseta, ma ki harora na mane ni hagaotonga ma na gavumane hato iana. Ngaia ki vi tangara na enoni hato i marungira, ka mamaro tenigi na tagaraha ma ki vutungira renigi na mahatanga raha ngavê manga hanana i tuguhia ngaia na maneraha.

¹⁹I na matena ngekana na maneraha ki bani atea o Moretekai, hanana i tagara tanga.

²⁰Ka Eseta ki mamênga vige visia vi ngaia ki na Siu. O Moretekai ki bani vi tanga, vi siana ki hagagirara ta na enoni renia marena. Vikê ka Eseta ki râ suria vikana, manga i bani tê viteana me o Moretekai, i marupea me ngaia ka Eseta matena i sisite mênga.

²¹Matena o Moretekai ki tagara i ruma raha iana na maneraha, na vâmavo o Bigitana mo Teresi garu anumasia na tarâto tangagi na kiboru iana na maneraha. Ngairerua karu haganega karu merongasia na maneraha o Seresese ma karu harikato vigaru nahuia ki meme.

²²O Moretekai ki girararerua ma ki hagarongoa na geteraha ka Eseta renirerua. Hemuri ka Eseta ki hagarongoa nogana na maneraha renia na tarana ngekana o Moretekai i bani girara.

²³Ngekana ka hahariria ma ka tarahua, vi i monari. Vikê ngaira ka riguirerua igê na apinige ni riguiha. Na maneraha ki haribona, ka segegi so na tarani ngegana igê na buka tangagi na marâ ga voravora me igê na apaneni i marungigi.