Read Kahua ESETA (Hebereo) 3 Bible Online

ESETA (Hebereo) 3 - Kahua bible

ESETA (Hebereo) 3

¹Hemuri na maneraha o Seresese ki gurua akê o Hamane ki gavumane raha i ruguhana. O Hamane ki no karena o Hametata na raraha iana o Agaga.

²Na maneraha ki bonasira na kariana hato igê na gavumane, hanana ga hagahigasia o Hamane, ka susure ma ka tubê so tanga. Ngaira hato ka kato vikana, nga noga ma o Moretekai. Ngaia ki usi.

³Na enoni getera ga tagara tanga na maneraha, ka hagatea, ka vi: “Tanu hega kanigo pe tê viteana na maneraha?”

⁴Tare i na ara ni tangiana ngaira ka tuguria vige têtê vita. Ma ngaia ki pe pasi rongora. Ngaia ki vi: “Na Siu kani inê. I bara vi ve tubê so tanga o Hamane.” Vikê ngaira ka hagarongoa o Hamane renia, hanana ga girara, vi o Hamane ki naka mavê o Moretekai se mareha.

⁵O Hamane ki mangariaga ngavê, matena i rongo, vi o Moretekai ki usi, vige susure ma ke tubê so tanga.

⁶Ma na matena i rongo vi o Moretekai ki na Siu, ngaia ki kato vi mareha ge hagaitangia getea ma o Moretekai. Ngaia ki kato, vi mutera nikâ hete na Siu hato surigi na apaneni hato i marungigi na maneraha i Pesia.

⁷Igê na tangahuruta gi tage matarerua na harisi iana o Seresese i maneraha noga surigi, igê na hageha hagenago, na hageha na Nisane, o Hamane ki haribona, ka kangikangigi igê na heni na atani na hageha ma na tangiani hanana ga tarahurerua nga na hageha ma na tangiana i arari nga tanga na harikatoha iana. Na ata igê na heni ga visia vi Purimi. Ngaira ka tarahua na tangahuruta matarerua na tangiana igê na tangahuruta matarerua na hageha, na hageha na Atare.

⁸Hoita, o Hamane ki vi tanga na maneraha, ki vi: “Na apaneni nuni gi tage ma ki oga totoko surigi na apaneni hato go marungigi. Ngaira ka râ surigi na tauha ga tora hegitigi tenigi na anita na apaneni nuni getera. Ma ta na marâ nikâ, maneraha. Ngaira ka pe marupegi na ramata iamu. I pe koro tangago, vigu nakara mavê.

⁹Maneraha, manga go obania ma ko haribona, ka mutera ngavê. Manga go katokato vikana, inê kê tohe, vigê page nakagi na 300,000 kilo na siliva henigi na ruruguha iamu tangagi na tagaraha igê na gavumane iamu.”

¹⁰Na maneraha ki tarasia râ na ringi i kakêna ma ki purugenia so na girarana igê na puru igê na tamasinga na ramata iana, hanana i hagagatagatanigi. Ngaia ki tagarenigi na pepa tanga o Hamane karena o Hametata, na raraha iana o Agaga. O Hamane ngaia kani merongasira na Siu.

¹¹Na maneraha ki vi tanga o Hamane, ki vi: “Na haga ka na animu. Ma tangara na enoni ngegana igo ma kanigo girara.”

¹²Hoi, igê na tangahuruta matare oru na tangiana igê na hageha hagenago o Hamane ki unira me na mane segesege iana na maneraha. Ngaia ki tamasigi na tamasinga iana tangara na enoni ka segegi so ma ka urusigi igê na tamasinga ma na segesegeha ga tora hegitigi surigi na apaneni hato i marungigi na maneraha. Ngaira ka hagaguhigi tangara na enoni raha, na gavumane ma na enoni ga bâsurigi na apanini hehegitigi. Na atana na maneraha o Seresese ki oga igê, suria i purugenia igê na ringi na girarana.

¹³Na mane tora tamasinga ka toregi na pepa ngegana tangagi na ara ni apaneni hato i marungigi o Seresese. Na tamasinga igê na pepa ki manga ikê: “Igê nga na tangiana gi tage igê na hageha na Atare mu nahuira ka meme na Siu hato, na gapu haoru ma na meraha, na gete ma na kare. Siana mu takira. Mu mutera ngavê ma kamu raugi na nahuninga iata.”

¹⁴Ngaira ki tuguhira viga tarohenia na tamasinga ngekana surigi na ara ni apaneni, hanana na enoni ka nananêa na tangiana ngekana.

¹⁵Na maneraha ki haribona, viga tarohenia na tamasinga ngekana i hinua raha i Susa, ma na mane tora tamasinga ka torea na tamasinga ngekana surigi na apanini hegitigi. Na maneraha ma o Hamane ngairerua karu oga karu totono ma na ai ni Susa ka hagagira bâraha.