Read Kahua ESETA (Hebereo) 5 Bible Online

ESETA (Hebereo) 5 - Kahua bible

ESETA (Hebereo) 5

¹Igê na oruta na tangiana i hari igê ka Eseta, ngaia ki tuguni manga i marisina na gete iana na maneraha. Ngaia ki banu igê na beraro na ruma raha ma ki ura ki maatia na kiboru na âgâga iana na maneraha. Na maneraha i rarona ki oga igê na atohana ma ki maatia na maani ruma.

²Matena ngaia na maneraha i bâsia râ ka Eseta kaniana i metara, ngaia ki vagevagesia ma ki usia râ renia na vato na golo iana. Ka Eseta ki râ me ma ki hataria na bogona.

³Na maneraha ki hagatea, ki vi: “Eseta kaniaku, na tao? Visia me na ta kanigo obania. Inê kê girara gê vatego renia, naka ma go obania tapanena na agua gê marungia.”

⁴Ka Eseta ki arami, ki vi: “Maneraha, manga vige ararigo ma, inê kê obanigamurua igo mo Hamane, muru arâ me i pasiku i rikini bungi tanga na ngêra gê hagarêa tangago.”

⁵Hoi, na maneraha ki bonasia o Hamane ki hatani râ me, hanana garu ngêngê i pasina ka Eseta. Vikê na maneraha ma o Hamane karu râ tanga na ngêra i pasina ka Eseta.

⁶Matena ga totono na vaini, na maneraha ki hagatea ka Eseta, ki vi: “Visia me na ta kanigo obania! Inê kê girara gê vatego renia, naka ma go obania tapanena na agua gê marungia.”

⁷Ka Eseta ki arami, ki vi:

⁸“Maneraha, na obaniha iaku ki manga ikê. Manga igo maneraha ma ko obâbakoro renia ma ko agana, hanana go aganariê, inê kê obanigamurua igo ma o Hamane, vigamuru arâ me nikâ i pasiku i gomaha tanga na ngêra. Igê nga na matena ngekana kanigê page visia vê tangago na obaniha iaku.”

⁹Matena ga ngê hato, o Hamane ki aporo i pasina. Ngaia ki vagevage ma ki obakoro. Matena i hura vê, ngaia ki gasuga renia o Moretekai i maana na maani ruma na ruma raha. Matena o Hamane ki ritenia o Moretekai, o Moretekai ki pe aharaga ma ki pe hagahigasia rârâ. Tahema o Hamane ki mangariaga ngavê tanga.

¹⁰Ngaia ki muni so ma, ma ki arage bê nga tanga i pasina. Hemuri ngaia ki unira me na tamana i ruma iana ma ki nungia ka Seresi kaniana, hanana vi arâ me nogana.

¹¹Ngaia ki kasikasia akê marena tangara renia vi raha era na ruruguha iana, renia viga rako o karena ma renia na tagaraha na maneraha ki gurua akê igê, ma renia vi ngaia ki raha teharira na mane ni hagaotonga getera iana na maneraha.

¹²Ma ngaia ki vi nikâ, ki vi: “Ta na marâ raha nikâ. Ka Eseta kaniana na maneraha ki unigamirua, igamirua na maneraha menê, kamuru ngê i pasina, ma ki unigamirua nikâ tanga i gomaha.

¹³Na tarani ngegana ka na marâ purua ma tangê, suria gê bâsia o Moretekai na Siu i gâga mênga i na maana na maani ruma na ruma raha.”

¹⁴Tahema na tamana hato ma kaniana ka vi: “Tanu hega kanigo pe hagêrasia na u na tangahana tangahuru matarerua, hanana gu riguia igê o Moretekai? I gomaha mavoraro igo ko girara go nungia na maneraha, hanana i haribona ka riguia igê o Moretekai, ma ko kahu obâbakoro hanana go arâ tanga na ngêra.” O Hamane ki takusia vi na tarana ngekana ki koro. Ma ngekana ngaia ki hagêrasia na u ni riguiha.