Read Kahua ESETA (Hebereo) 8 Bible Online

ESETA (Hebereo) 8 - Kahua bible

ESETA (Hebereo) 8

¹Igê nga na tangiana ngekana na maneraha o Seresese ki haganahunia ka Eseta renigi na nahuninga hato iana o Hamane, na merongata na Siu. Ka Eseta ki hagarongoa na maneraha, vi o Moretekai ki na goana i hagarangia. Haganega tenia na matena ngekana, na maneraha ki kahu hagamarumungenia o Moretekai hanana i arâ me i pasina.

²Na maneraha ki tasia râ na ringi iana i oga igê na girarana ma ki vatea renia o Moretekai. Ngaia ka na ringi i bani vatea o Hamane ma hemuri ki bani tavoa aporo tenia. Ka Eseta ki naka o Moretekai ki bâsurigi na nahuninga i me tenigi o Hamane.

³Ka Eseta ki susure ki tubê so i maana na maneraha ma ki angi. Ngaia ki tamasi tanga na maneraha, ki nungia, hanana i rêra barasia na harikatoha era iana o Hamane na raraha iana o Agaga renira na Siu.

⁴Na maneraha ki usia râ ka Eseta renia na vato na golo iana. Vikê ka Eseta ki ura aharaga ma ki vi:

⁵“Maneraha, manga vi igo ma ko obakoro reniê ma ko takuiê ma ko takusia vi i koro, hoi, gu haribona, hanana ga rêra pusigi na tamasinga i bani tokorenigi o Hamane karena o Hametata na raraha iana o Agaga, i haribona, ka mutera ngavê na Siu hato surigi na apaneni hato go marungigi.

⁶Manga i he kanigê girara vigê gatagata, manga vi na bagabevoana ngekana ki tarahura na goaku na Siu ma ka meme nogata na ani ga hagarangiê?”

⁷Na maneraha o Seresese ki vi tangarerua ka Eseta kaniana mo Moretekai, ki vi: “Bâ, inê kê bani riguia o Hamane, suria i harikato renira na Siu ma kê bani haganahunigo ka Eseta renigi na nahuninga iana.

⁸Ma na haribonaha i oga igê na atana na maneraha ma ka purugenia igê na girarana na maneraha, ki asa ve page taruhi kasia. Ma ki koro ma, muru girara muru segegi tangara na Siu na marâ muru obanigi. Ma ki koro ma muru segea na ataku igê ma kamuru purugenia na giraraku igê.”

⁹Na tarana ngekê ki vora me igê na tangahuruta gi rua matare oru na tangiana igê na oruta na hageha, na hageha na Sivana. O Moretekai ki unira me na mane segesege iana na maneraha ma ki katora ka segegi na tamasinga igê na leta tangara na Siu ma tangara na enoni raha hato ma na ani ga tagara igê na gavumane ma ka bâsurigi na 127 na apaneni hehegitigi, haganega tenia i Intia ki rârâ ma ki tariha i Nubia. Na leta ka râ tangagi na ara ni apaneni hehegitigi ma ka segegi igê na tamasinga hehegitigi iata mareta ma igê na tarani na segesegeha iata mareta, ma tangara na Siu igê na tamasinga iata ma igê na tarani na segesegeha iata.

¹⁰O Moretekai ki katora na mane segesege ka segea so na atana na maneraha o Seresese igê na leta ma ka purugenia na girarana na maneraha igê. Na mane igê na hosi ni tangoha iana na maneraha ka votongenigi na leta surigi na ara ni apaneni.

¹¹Na leta i vi vikê: “Na maneraha o Seresese ki hagamarumu tangara na Siu surigi na ara ni hinua, hanana viga hagarêra mareta ka rêra pusira na merongata. Manga na mane ni me tenia na anima na apaneni nuni igê na anima na apaneni ma ka taharira na Siu, na mane, na gete se na kare, hoi, ngaira na Siu ki koro ma, ga rêra pusira ma ka mutera. I koro ma ga mutera hato ngavê ma ka nahunigi na nahuninga iata tenira.

¹²Na bonasiha ngekê ki gatagata suria i Pesia hagenani igê nga na tangiana ga harikato viga mutera igê na Siu igê na hageha na Atare. Ngaia ki na tangahuruta matarerua na hageha.”

¹³Ngaira ka hagagirarara na enoni hato surigi na ara ni apaneni, vi na tamasinga i rarona na leta ki na ramata, hanana na Siu ka nanê ka meraheariha bê aporo na merongata igê na tangiana ngekana.

¹⁴Na maneraha ki bonasira na mane tora tamasinga ka tagirira na hosi iana ma ka tango igê ka râ. Ngaira ka hagagirarara nikâ na enoni i Susa na hinua raha renia na bonasiha ngekana.

¹⁵O Moretekai ki pania na ruma raha iana na maneraha. Na aruhana ki mararavarava ma ki siki ma na tuguni iana ki rotorotoaga memera ma na tarepuri bâkoro na golo i bêna. Ngaia ki tuguni manga na maneraha. Na tara i hinua i Susa ka hebungi, suria na enoni igê ka vagevage ma ka ngerengere.

¹⁶Na Siu ka obakoro ma ka haritagi. Ngaira ka vagevage ma ka hata manga vi ngaira ka teha.

¹⁷Renia na ara ni hinua surigi na ara ni apaneni ga bani hagagirarara renia na bonasiha iana na maneraha tahema na Siu ka naka na tangiana raha tanga ga magoto ma ka vagevage igê. Rako na enoni ga pe Siu, ka hakunira na Siu, suria ga magutenira.