Read Kahua ESETA (Hebereo) 9 Bible Online

ESETA (Hebereo) 9 - Kahua bible

ESETA (Hebereo) 9

¹Na tangahuruta matare oru na tangiana i ata me igê na hageha na Atare. Ngaia ki na tangiana i gatagata igê na bonasiha iana na maneraha. Ngaia nikâ ki na tangiana na merongata na Siu ga takusia viga teharira igê, ma hete na Siu kaniga teharira berâ ngaira.

²Igê na ara ni agua iata na Siu surigi na ara ni hinua surigi na ara ni apaneni i marungigi o Seresese, na Siu ka nanê igê, hanana viga taharira na anima na enoni ga taharira bê me. Na enoni surigi na ara ni hinua ka magutenira, suria i bara tangara vige teharira.

³Surigi na apaneni hato na enoni raha ga tagara igê na gavumane, na ani ga bâsurigi na apaneni hehegitigi, na mane segesege ma na ani ga tamasi urusia na maneraha, ngaira hato ka tamanira na Siu, suria ga magutenia o Moretekai.

⁴Na enoni hato surigi na apaneni hato i marungigi o Seresese, ka girara bâkoro, vi o Moretekai ki nahuni ramoha i ruma raha iana na maneraha ma na ramoha ki ama ni raramohaga nga.

⁵Tahema na Siu ka girara, ga katora na merongata igê na anima vê na tarani ga obanigi. Ngaira ka taharira renigi na tatapa borahu ma ka mutera.

⁶Na Siu ka mutera na tangarê gi rima na mane i hinua raha i Susa.

⁷Na hitangita na mane ga me ngegana ka no karena tangahuru gi tage o Hamane karena o Hametata, i merongasira tare na Siu. Ngaira ka no Parasanatata, o Talapone, o Asapata, o Porata, o Atalia, o Aritata, o Paramasita, o Arisai, o Aritai mo Vaisata. Ma ki mareha vige rurugu tenira.

¹¹Igê nga na tangiana ngekana kaniga hagarongoa igê na maneraha renia vi gi hita na enoni kaniga mutera i Susa.

¹²Na maneraha ki vi tanga ka Eseta kaniana, ki vi: “So nga i Susa na Siu ka mutera igê na tangarê gi rima na mane. Na hitangita na mane ga me ngegana ka no karena tangahuru o Hamane. Manga ngekana, ngaira ka mutera rako ngavê surigi na ara ni apaneni! Hoi, na ta ko obania i ngekê? Inê kê girara ma gê vatego renia. Gu visia me na ta nikâ ko obania, ma be vatego renia.”

¹³Ka Eseta ki arami, ki vi: “Maneraha, manga vigo agana, hoi, gu nakara na Siu i Susa ke katoa nikâ i gomaha na tarana, go nakara ka katora renia i ngekê akê. Ma ko haribona ka riguigi na gahuata o karena tangahuru o Hamane igê na u ni riguiha.”

¹⁴Na maneraha ki haribona ka kato vikana. Na bonasiha ki râhia na hinua i Susa. Na enoni hato ka bâsigi na gahuata o karena tangahuru o Hamane ga riguigi.

¹⁵Igê na tangahuruta matare he na tangiana igê na hageha na Atare, na Siu ka haku nikâ ma ka mutera na tangarê gi oru nikâ na mane i hinua. Ma ki mareha nikâ vige rurugu tenira.

¹⁶Na Siu surigi na apaneni ka nanê, hanana viga rêra pusira na merongata. Ngaira ka hatungira na merongata, suria ga mutera na 75,000 na enoni ga merongasira bême. Ma ki mareha vige rurugu tenira.

¹⁷Na matena ngekana kani igê na tangahuruta matare oru na tangiana igê na hageha na Atare. I tangi me na tangahuruta matare he na tangiana, ngaira ka pe nahuira nikâ na enoni, ma ka vagevage ma ka magoto hete.

¹⁸Ma na Siu i Susa ngaira ka naka na tangahuruta matare rima na tangiana ki vora na tangiana raha tangara, suria ngaira ka mutera na merongata igê na tangahuruta matare oru ma na tangahuruta matare he na tangiana, ma igê na tangahuruta matare rima na tangiana ki mareha.

¹⁹Tahema na Siu ga ogasigi na hinua sisite, ngaira ka hagahigasia na tangahuruta matare he na tangiana igê na hageha na Atare manga vi na tangiana ni vagevageha ma ni magotoha ma ka mahatangenigiheri na ngêra igê.

²⁰O Moretekai ki haribona ka segegi so na ara ni tarani ga vora me. Ngaia ki kasi tamasinga tangara na Siu hato i na ara ni hinua hato suria i Pesia hagenani.

²¹Ngaia ki bonasira, hanana vi i na ara ni harisi ka hagahigasirerua igê na tangahuruta matare he ma na tangahuruta matare rima na tangiana igê na hageha na Atare manga vi na tangiana raha.

²²Ngairerua ka na tangiani na Siu ka hatongira igê na merongata. Ngaia ki na hageha ni angiha maramara ma ki vora re na vagevageha, ma ni hagahunu bungi ki ahoro igê na magotoha. O Moretekai ki bonasira ka hagahigasirerua na tangiani ngegana ka vagevage ma ka magoto igê ma ka mahatangenigiheri igê na ngêra ma tangara nikâ na enoni ga matareha.

²³Hoita na Siu ka tê viteana o Moretekai. Na hagahigasiana ngekana ki tonga re na tauhata i na ara ni harisi.

²⁴O Hamane karena o Hametata na raraha iana o Agaga ma ki na merongata na Siu, ngaia ki kangikangigi na ata igê na heni, hanana i girara na tangiana i araria vi mutera igê na Siu. Na marâ i goga igê na ata ka hêtani vi purimi. O Hamane ki harikato vi hatungira ngavê na Siu.

²⁵Ma ka Eseta ki râ i pasina na maneraha. Na maneraha ki haribona, ka segegi na bonasiha iana tangagi na hinua hato i Pesia. Ma ki akê me vi ngaia ki hagaratena marena renia na mera, i takusia tangara na Siu. Ngaia mo karena ka riguira igê na u ni riguiha.

²⁶Tahema na tangiana ngekana ka hêtana vi Purimi, i vi na ata ga kangikangi igê na heni. Surigi na tamasinga iana o Moretekai ma na tarani hato ga tarahura,

²⁷tahema na Siu ka naka na ramata tangara ngaira mareta ma tangara na raraha iata ma tangara na enoni hato, ga page hakunira vari na Siu, vi igê nga na matena vikana igê na ara ni harisi, ngaira ka hagahigasirerua maninga igê na tangiani ngegana, manga i bani bonasira renia o Moretekai.

²⁸Na ramata ngekana ki vi, vi na ara ni ahemata na Siu surigi na ara ni apaparaha ki bê ki arâ, surigi na ara ni apaneni ma na ara ni hinua, ki tuguhira, viga takusigi ma ka higahigasigi tare ki bê ki arâ na tangiani raha ni Purimi.

²⁹Hemuri ka Eseta kaniana na maneraha, ka karena Abigaile ki sege nogana manga i bani sege o Moretekai. Ngaia ki sege ki hagagatagatania na tamasinga iana o Moretekai renia na Purimi.

³⁰Na leta i segea ka Eseta ki tangara na Siu hato, ma tahani na leta ka votongenigi surigi ngaigi hato na 127 na apaneni i Pesia. Igê na leta ki tamasi renigi na marapeha ma na ramana tangara na Siu,

³¹ma ki bonasira ngaira ma na raraha iata hanana viga hagahigasirerua na tangiana na Purimi igê na matena tangarerua, tagenana ma ga bani tonga re na tauhata, ga harihari ma ka angiangi maramara. Ngairerua o Moretekai ma ka Eseta kaniana na maneraha karu haribona vikana.

³²Na bonasiha iana ka Eseta renigi na ramata tanga na Purimi ka segegi so igê na rumina na pepa.