Read Kahua TAHINGA 1 Bible Online

TAHINGA 1 - Kahua bible

TAHINGA 1

¹O karena o Jakobo, ga râ henia tanga i Esipito henira na ahemata iata hegitigi,

²ka no Rubeni, o Simeone, o Juta,

³o Isakare, o Sebuloni, o Benamino,

⁴o Tane, o Napatali, o Gata ma o Asere.

⁵Ngaira hato haku na raraha iana o Jakobo ngegê ka vora na tangahuru gi pi, nga noga ma o Josepo ma tani o karena kani bani oga i Esipito.

⁶Rârâ o Josepo mo veogana ma ngaira hato na vetage kare ka bani me.

⁷Henaka, ma na raraha iata na Isiraelita ka hagatakara na kare. Ngaira ka rako ma ka raramohaga ma ka manasia i Esipito.

⁸Hemuri na mane getea ki urisi ki maneraha i Esipito. Na maneraha ngekê ki pe hagarea rârâ na matena iana o Josepo.

⁹Ngaia ki vi tangara na kariana, ki vi: “Na Isiraelita ngegana ka rako teha ngavê ma ka ramo, i era ma ka parênia i Esipito tenigia.

¹⁰Vari manga i mataro na hearihatana, ngaira ka panepane henira na merongaka, hanana ga megiaheariha ka gavagava tenia na agua iaka. I ararigia, ge tarahua ta na tarana, ge hagabarasira, hanana siana ke tataka.”

¹¹Tahema ngaira ka kasira na mane ramo, ka hagatutunguhira igê na tagaraha, hanana siana ka gunaguna ni urapusira. Vikê na Isiraelita ka tagarahirerua na hinua raha i Pitome me Ramesesi tanga na maneraha, hanana i nakanaka igê na ngauha.

¹²Naka ma na ai ni Esipito ka ama ni hagamamasiagara nga na Isiraelita, ma na Isiraelita ka ama ni tataka nga ma ka ama ni manasia nga i Esipito. Na ai ni Esipito ka haganega ka magutenira na Isirealita,

¹³ma ka erasia ngavê na ogaha iata ma ka ramusira, hanana viga tagara bâraha. Ngaira ka tugurira, ka tagarahigi na hinua, na ruma ma na mu, ma ka pe tako rugu rârâ renira.

¹⁵Ma na maneraha i Esipito ki tamasi nikâ tangarerua ka Sipara ma ka Pua, na gete ni hagaparaha iata na gete na Isiraelita.

¹⁶Ngaia ki bonasirerua, ki vi: “Matena muru hagaparara na gete na Isiraelita, ki tuguhigamurua, muru nanahuira na kareta ka meme, manga vi na kare mane, nga noga ma na kare hehene kamuru nakara mavê.”

¹⁷Ma na gete ni hagaparaha ngegê karu hagahigasia God. Tahema garu pe tê viteana na maneraha. Ngairerua karu nakara mavê nogata na kare mane ngegê.

¹⁸Vikana na maneraha ki unirerua na gete ni hagaparaha ngegê ma ki hagatererua, ki vi: “Tanu hega muru kato vikana? Tanu hega muru pe nahuira na kare mane?”

¹⁹Ngairerua karu arami, karu vi: “Na gete na Isiraelita ka pe mangara na gete ni Esipito. Na gete na Isiraelita ki asa vige harahara bâraha renira na kareta. Ngaira ka gasuga ni apara, ma hemuri na hitangimirua mataruhia vê.”

²⁰Suria na gete ni hagaparaha ngegê karu hagahigasia God, tahema God ki koro tangarerua ma ki haganahunirerua renira na raraha iaterua mareterua. Na Isiraelita ka ama ni tataka nga ma ka raramohaga.

²²Tahema na maneraha i Esipito ki bonasira ngaira hato na ai ni Esipito, ki vi: “Mu kasira nga na ara ni kareta mane haoru hato na Isiraelita i ve i Nile, ka totono ka meme igê, ma na ara ni kare hehene kamu nakara mavê.”