Read Kahua TAHINGA 10 Bible Online

TAHINGA 10 - Kahua bible

TAHINGA 10

¹Ma hemuri na Araha ki vi tanga o Moise, ki vi: “Gu râ i pasina na maneraha. Inê kê bani nakara ngaia ma na kariana ka hahêaga hanana gê katogi na mena ngegê i maata,

²ma hanana igo ko girara go hagarongora na karemu ma na esimu, manga i he kanigê hagamakira na ai ni Esipito, matena gê katogi na mena. Igamu hato kamu page tahetara reniê, vi inê nga ka na Araha.”

³Hoi, o Moise mo Aroni karu râ i pasina na maneraha ma karu vi tanga, karu vi: “Na Araha, na God na Isiraelita ga rahesia, ki vi, ‘Tanu hega go hagababeê? Gu hagamarumungenira hura na kariaku, hanana ge rahesiê.

⁴Manga go ama ni manimanira nga, hoi, i gomaha inê kê kasira na pê igê na agua iamu.

⁵Ngaira ka page gahuia hagenani na ano, suria ga rako teha ngavê. Ngaira ka page ngaugi hato na ara ni marâ, i nahu kasigi na rangi na hê anumaga, henakagi na apinige ga hita so.

⁶Na ruma raha iamu ma na ruma iata na kariamu ma na anita na enoni hato ka page vunuvunu mamasuaga renira. Ngaira ka page tê era ngavê. Na êvarimu ka pe bani hagarea me rârâ nogata na ruruha raha ni pê vikana’” Me muri o Moise ki aharâ vê ki râ.

⁷Na kariana na maneraha ka vi tanga, ka vi: “Se, o vani akana ki totogeaga taraha? Gu hagamarumungenira hura na mane na Isiraelita, hanana ge rahesia na Araha God iata. I hega, go pe girara vari, vi i Esipito ki sugi vota noga?”

⁸Vikê o Moise mo Aroni ka torererua aporo, ma na maneraha ki vi tangarerua, ki vi: “Mu girara mu arâ kamu rahesia na Araha God iami. Ma va ti nga kaniga arâ?”

⁹O Moise ki arami, ki vi: “Igami hato kanimi arâ henira na karemami ma na bani enoni nikâ. Igami kami page merarâ na karemami mane ma na gete, na sipi ma na goti iamami ma na puruka iamami, suria i tuguhigami, vigami hagahigasia na tangiana raha tanga na Araha.”

¹⁰Na maneraha ki vi: “Inê kê tohe renia na Araha, vi i asa hagetage, vi ve hagamarumungenigamu, kamu merarâ na gete ma na karemi. I mareha vige mareha. Igamu kamu bani harikato pinihi.

¹¹I bara vê! Manga vi igamu ma kamu obania, vigamu arâ, kamu rahesia na Araha, ua, na mane ma kaniga arâ.” Ma hemuri ka pairerua hura o Moise mo Aroni pania na maneraha.

¹²Ma na Araha ki vi tanga o Moise, ki vi: “Gu tagarenia akê rârâ na vato i rimanu suria i Esipito, hanana ga aruru me na pê. Ngaira ka page arâ me ma ka page ngaugi hato na ara ni marâ ga hita so, na ara ni marâ ga tahi tenia na rangi na hê anumaga.”

¹³Vikê o Moise ki tagarenia akê rârâ na vato iana, ma na Araha ki katoa na roga ki râ me tenia i kerekê, ki rogasia i Esipito igê na tangiana hagenani ngekana ma na bugiana hagenani. Igê na mahogotana na roga ki bani rurura me na pê.

¹⁴Na ruruha raha ni pê ka râ me tatage ma ka manasia i Esipito hagenani. Ngaia nga ka na ruruha raha ngavê ni pê, ga pe bani bâsia me noga i nago, ma ki asa vige page rigia nikâ i hemuri.

¹⁵Ngaira ka gahuia na ano, ma ki asa vige bâ ke vato renira. Ngaira ka ngêgi hato vê na ara ni marâ, ga hita so igê na rangi na hê anumaga, henigi na guani na apinige ni ngauha ma na ani getigi. Na ahani na apinige, na ngauha ma na rauga ka hato ngavê.

¹⁶Ma hemuri na maneraha ki hatani unirerua me o Moise mo Aroni, ma ki vi: “Inê kê haritohea na Araha God iami ma igamurua nikâ.

¹⁷Muru bonotenia hagetage me nikâ na tasi iaku ma kamuru avarasia na Araha God iami, hanana i tavoa râ teniê na hagaitangiha, i era ma kê me renia.”

¹⁸O Moise ki râ pania na maneraha ma ki avarasia na Araha.

¹⁹Na Araha ki hatungia na roga tenia i kerekê ma ki naka na roga raha i kereso, i rogatenira râ na pê ma ki suhenira i Asi Memera. I mareha rârâ vi na ani gi tage togo ma na pê vige hita so i Esipito hagenani.

²⁰Ma na Araha ki naka na maneraha ki ama ni hahêaga nga, ma ki pe hagamarumungenira hura na Isiraelita.

²¹Ma hemuri na Araha ki vi tanga o Moise, ki vi: “Gu tagarenia akê na rimamu i vavearo, ma na mengo susu ki page buhia i Esipito hagenani.”

²²O Moise ki tagarenia akê na rimana i vavearo, ma na mengo susu ki buhia i Esipito surigi na tangiani gi oru.

²³Na ai ni Esipito ki bara tangara vige bâsiraheri, ma ka pe huhura rârâ i metara igê na matena ngekana. Nga noga ma i pasita na Isiraelita ki mave ma.

²⁴Na maneraha ki unia me o Moise ma ki vi: “Mu râ kamu rahesia na Araha. I koro ma mu merarâ nikâ na gete ma na karemi, nga noga ma na sipi, na goti ma na puruka ka gâga so nga ikê.

²⁵O Moise ki arami, ki vi: “Hoi, vikana go vategami nga na ganiani, hanana mi vogasia ma kami susu tanga na Araha God iamami renigi.

²⁶Manga ki mareha, igami kami merarâ na togoha iamami maremami, mareha vige hitahita so na ani gi tage. Igami maremami kani tuguhigami, vigami atera na ganiani tanga na vogasiana na Araha God iamami. I ngekê igami kami pe girara mênga, vi na ani ta na ganiani, kanimi page vogasia renigi. Matena mi ataata râ i ngekana, ma kanimi kahu girara igê.”

²⁷Na Araha ki naka na maneraha, ki ama ni hahêaga nga ma ki pe hagamarumungenira hura na Israelita.

²⁸Na maneraha ki vi tanga o Moise, ki vi: “Gu râ vê! Gê pe obania ve bâsigo nikâ! Manga gê bâsigo nikâ, igo ko meme hagetage!”

²⁹O Moise ki arami, ki vi: “Go vi koro. I asa vigu page bâsiê nikâ!”