Read Kahua TAHINGA 12 Bible Online

TAHINGA 12 - Kahua bible

TAHINGA 12

¹Na Araha ki tamasi tangarerua o Moise mo Aroni i Esipito, ki vi:

²“Na hageha i ngekê ngaia ki na hageha hagenago igê na harisi.

³Muru hagesurira na Isiraelita hato, kamuru vi vikê: Igê na tangahuruta na tangiana igê na hageha ngekê na ara ni mane ki atea nga na karena sipi se na goti tanga na ruma iana.

⁴Manga ga pe rakorako nenuni i ruma iana, hanana vige ngaua hagahatungia na ganiana hagenani, ngaia ki mebêrihu râ na ruma i mebasigu hetanga. Vikana ngaia ki tuguhia, vi girara hagenago, vi gi hita na enoni ma ki manga i he kani ararira hehegitigi.

⁵I koro ma gamu atea na sipi se na goti, na ani mane i hatohato huria ma na harisi gi tage ma ki apeape koro nga.

⁶Ma hemuri igê na tangahuruta gi tage matara ge he na tangiana igê na hageha ngekê na Isiraelita hato ki tuguhira, viga nanahuira na ganiani ngegana igê na manurahitana.

⁷I tuguhigamu, mu apegi tani na gapu ma kamu taruhigenigi igê na u i na akereniheri na maani ruma ma i bêni na maani ruma i ruma mu ngaugi igê na ganiani.

⁸Igê na bugiana nga ngekana kamu hanugi na ganiani ma kamu garamasi henigi na bereti i pe ahunga ma na ruve mahe.

⁹Siana kamu ngaugi na ganiani maga, se vigamu hagagobo, ma kamu hanunu nga hete hagenani: na bêni, na êgani ma na aunâbani.

¹⁰Siana ki hitahita râ tagua tanga na mavoraro. Manga i hitahita râ tagua, mu sungigi nga.

¹¹I tuguhigamu, vigamu hatani ngêngê rêrê, matena mu hagesuru ni râha ma kamu santele ma kamu taugi na vato iami i rimami. Ngaia ki na tangiana raha na Paseka, hanana mu hagarahasiê igê inê na Araha.

¹²“Igê na bungiana nga ngekana inê kê page arâhia igê i Esipito hagenani, hanana gê hagamesira na ara ni bêbê ni kare mane iata na enoni ma na togoha, ma kê hagaitangira na ara ni ataro hato i Esipito. Inê nga ki na Araha.

¹³Na gapu igê na u i na akereniheri na maani ruma ngaia ki na girarana tangê, vi na ruma iami. Matena gê bâsigi na gapu, inê kê riri tenigamu. Tahema igamu kamu page tahitahi tenia na mera, matena gê hagaitangia igê i Esipito.

¹⁴I tuguhigamu, vigamu hagahigasia na tangiana ngekê manga na tangiana raha igê na rotu, hanana i hagatakusigamu renigi na tauhaku. Mu hagahigasia na tangiana ngekê tare, ki bê ki arâ.”

¹⁵Na Araha ki vi: “Surigi na tangiani gi pi, siana kamu ngaugi igê na bereti i ahunga. Mu ngaugi ma igê hete na bereti i pe ahunga. Igê na tangiana hagenago mu kasigi râ nga na isiti hato tenigi na ruma iami. Manga vi ta na enoni ma ki ngaua na bereti i ahunga i raroni na tangiani ngegana, ngaia ki hato, vige vora na kariaku.

¹⁶Igê na tangiana hagenago ma nikâ igê na pita na tangiana, ki tuguhigamu, vigamu hakuhaku nga tanga na hagarahenga. I apu, vigamu tagara igê na tangiani gi rua ngegana, nga noga ma mu hagamako igê na ngauha.

¹⁷Mu hagahigasigi na tangiani ngegana, hanana ga hagatakusigamu, vi inê kê bêngenigamu hura, igamu ma na raraha iana o Isiraele tenia i Esipito igê na tangiana ngekana. I tuguhigamu, vigamu hagarahasia na tangiana ngekana manga na tangiana raha tare ki bê ki arâ.

¹⁸Haganega tenia na manurahitana igê na tangahuruta matare he na tangiana igê na hageha hagenago, ki tariha igê na manurahitana na tangahuruta gi rua matare tage na tangiana, siana kamu ngaugi igê na bereti i ahunga.

¹⁹Igê na matena hagenani ngekana siana hagetage ki gâga na isiti i ruma iami. Manga vi na anima na enoni, na ai ni hinua se na mahuara, ma ki ngaua na bereti i ahunga, ngaia ki hato, vige vora na kariaku.

²⁰Naka ma vigamu gâga i na agua mavê i he, mu ngaua ma na bereti i pe ahunga.”

²¹O Moise ki unira me na enoni raha hato iata na Isiraelita, ma ki vi tangara, ki vi: “Na ara ni hitangimi ki tuguhia i torea na bêhâgana na sipi se na goti ma ki nanahuia, hanana igamu ma na ahemata iami hegitigi ki hagahigasia na paseka renia.

²²Mu hugusigi na arani na hisope ma kamu anumigi igê na gapuna na ganiana igê na apira ma kamu monegi na u i na akereniheri na maani ruma ma na bêni na maani ruma i ruma iami. Mu gâga akêku i ruma iami, mataro me ki tangitangi.

²³Matena na Araha ki arâhia i Esipito hagenani, hanana i hagamesira igê na bêbê ni kare mane hato iata na ai ni Esipito, ngaia ki page bâsigi na gapu igê na u i na akereniheri na maani ruma ma igê na bêni na maani ruma, ma ngaia ki page riritare tenigi na ruma iami. Vikana ngaia ki page hagabarasia na angero ni mera, vige banu i ruma iami, hanana vige hagamesira na bêbê ni kare mane iami.

²⁴Igamu ma na raraha iami mu arâ surigi nga na ramata ngegê tare, ki bê ki arâ.

²⁵Matena mu ataata vê igê na agua, na Araha ki bani surua, vi haganahunigamu renia, ki tuguhigamu vigamu katoa na hagarahenga ni Paseka ngekê.

²⁶Manga na karemi ma ka hagategamu, ka vivi. ‘Tanu hega mu katoa na vogasiha ngekê?’

²⁷mu arami nga, kamu vivi, ‘Ngaia ki na vogasiha ni Paseka, hanana ga hagarahasia na Araha, suria ngaia ki ri tenigi na ruma iata na Isiraelita i Esipito. Ngaia ki hagamesira igê na bêbê ni kare mane hato ni Esipito ma ki hagatahigia igia.’ Na Isiraelita ka susure ma ka hagarahe.

²⁸Hemuri ngaira ka aporo i pasita ma ka arâ surigi na tamasinga iana na Araha tangarerua o Moise mo Aroni.”

²⁹Matena i gupu ni bungi na Araha ki hagamesira na bêbê ni kare mane hato ni Esipito. I mareha rârâ tani vige hita, haganega tenia na bêbê ni kare mane iana na maneraha i Esipito, vi page urusia, mataruhia na bêbê ni kare mane iana na mane i oga i ruma ni hagaitangiha. Ma ka me nikâ na ara ni kareta hagâkani na togoha.

³⁰Igê na bungiana ngekana na maneraha ma na kariana ma na ai ni Esipito hato getera ka gasuga ka rite. Na angiha maramara ki râ suria i Esipito hagenani, suria na ara ni bêbê ni kare mane ka hemeri surigi na ruma iata na ai ni Esipito.

³¹Igê na bungiana ngekana na maneraha ki unirerua o Moise mo Aroni ma ki pairerua ki vi: “Mu tavoraha nga i ngekê, igamurua ma na Israelita hato! Mu hura pania na agua iaku! Mu râ kamu rahesia na Araha. Nga na tarana mu obania ngekana!

³²Mu merarâ nga na togoha ni sipi, ni goti ma ni puruka iami. Mu nungia God ki korokoro tangê nogaku.”

³³Na ai ni Esipito ka hagasusura na Israelita, ka tavoraha rêrê tenia i Esipito. Ngaira ka vi tangara, ka vi: “Manga mu pe arâ, igami hato kami page meme!”

³⁴Vikê na Isiraelita ka hagavunusigi na apira iata renigi na makoni na bereti i pe ahunga, ka baraigi renigi na gahu ma ka tarehagi i gaparata.

³⁵Ngaira ka nungigi na rêni na golo ma na siliva ma na gahu tenira na ai ni Esipito, manga i bani bonasira o Moise.

³⁶Ma na Araha ki katora na ai ni Esipito ka hagahigasira na Isiraelita ma ka vatera renigi na marâ ga nungigi. Na Isiraelita ka rêgi na ruruguha iata na ai ni Esipito igê na tangiana ngekana.

³⁷Na Isiraelita ka tavoraha tenia i Ramesesi tanga i Sokote. Ngaira hato na mane ka na ararina na 600, 000. Ga pe tomanira me henira na gete ma na kare.

³⁸Ngaira ka merarâ na togoha rako ni sipi, ni goti ma ni puruka. Rako na enoni getera ka râ henira nikâ.

³⁹Ngaira ka hahi na makoni na bereti i pe ahunga, ga tora henira tenia i Esipito. Suria na ai ni Esipito ka hagasusura ka paira hura, tahema ngaira ka pe nahunia na matena, hanana vige hagamako igê se vige hagarêgi igê na makoni na bereti i ahunga.

⁴⁰Na Isiraelita ka bani oga i Esipito surigi na harisi 430.

⁴¹Igê nga na tangiana ga hato igê na harisi 430, na ara ni raraha hato iata na kariana na Araha ka hura tenia i Esipito.

⁴²Igê nga na bungiana ngekana na Araha ki bâbâsurira ma ki bêngenira hura tenia i Esipito. Tahema na Isiraelita hato ki tuguhira, viga bâbâ nga igê na bungiana ngekana, hanana ga hagahigasia tare igê na Araha.

⁴³Na Araha ki vi tangarerua o Moise mo Aroni, ki vi: “Na ramata renia na Paseka kani igê. Na ai ni mahura ki apu tangara, vige ngaua na ngêra na Paseka.

⁴⁴Na kare rakuraku, mu bani vuria ngaia ki araria ma vi ngaua, manga vigamu retea râ hagenago na gavona na varana.

⁴⁵Na ai ni mahuara i goga henigamu se na ani i tagara meni haga i pasimi ki apu, vige ngaua.

⁴⁶Na ngauha hagenani kamu ngaua hato so nga igê na ruma mu hagamako igê. Siana kamu torea hura i metara. Siana kamu barugigi tani na surina na ganiana.

⁴⁷Na hakuta hagenani na Isiraelita ki tuguhira, ga hagahigasia na tangiana raha ngekê,

⁴⁸nga noga ma na mane ga pe retea râ na gavona na varana ki apu, vige ngaua. Manga vi na ai ni mahuara i oga berarogami ki obania vi hagahigasia na Paseka, hanana vi hagarahasia na Araha, ngaia ki koro ma, manga vigamu retegi râ hagenago na gavoni na varata na mane hato i ruma iana. Vikana ngaia ki manga vi na Isiraelita monari ma ki girara i hakunigamu igê na tangiana raha ngekana.

⁴⁹Na ramata ngegana ka tagenani ma tangara na Isiraelita monari ma na ai ni mahuara ga oga i berarogami.”

⁵⁰Na Isiraelita hato ka râ surigi na tamasinga iana na Araha tangarerua o Moise mo Aroni.

⁵¹Igê na tangiana ngekana na Araha ki bêngenira hura igê na raraha iana o Isiraele tenia Esipito.