Read Kahua TAHINGA 15 Bible Online

TAHINGA 15 - Kahua bible

TAHINGA 15

¹Hemuri o Moise ma na Isiraelita ka kiria na ki ikê tanga na Araha. “Inê be ki tanga na Araha, suria ngaia ki raramohaga hunia ma ki teha. Ngaia ki kasira i asi na hosi ma na mane ni me igê.

²Na Araha ka na raramohaku. Ngaia ki ngahisiê ma ki hagatahiê. Ngaia ki na God iaku ma inê be hagarahasia. Ngaia ki na God o vaemaku i rahesia ma inê be ki be hagarahasia.

³Ngaia ki teha igê na hearihatana. Na atana ki na Araha.

⁴Ngaia ki kasira i asi na mane ni me iana na maneraha i Esipito henigi na kati ni me iata. Na mane ni me na manisi ka tono i Asi Memera.

⁵Na asi ki buhira. Ngaira ka kokoro vato igê na rutuni mangagi na hê.

⁶Araha, na raramohamu ki raha teha vê. Igo ko menamenarira na merongamu.

⁷Igo ko teharira na merongamu, suria go teha ma ko raramohaga hunigo. Na vavatana na mangariaganiha iamu ki resira ka mangagi na go maria.

⁸Igo ko uhia na asi, ki guru hegitigi, ki ura manga na apê. Na porona vato na asi ki gatagata.

⁹Na merongamu ka vi: “Nika, ge tarigenira. Ke henahuraugi na ruruguha iata ma ke tonganigi. Ke amurigi na tatapa borahu iaka, hanana ngaira ke tuturiha.

¹⁰Ma igo, Araha, ko uhi râ ma, ma na me ni Esipito ka tono hato. Ngaira ka kokoro igê na rutuni i asi manga na poro na hagakokoro.

¹¹Araha, ti na ataro ki maratoramu? Ti ki raramohaga manga igo? Ti ki koro igê na ara ni tarani manga igo? Ti ki girara i tanugi na mena ma na tagaraha raha manga igo?

¹²Igo ko tagarenia râ na rimamu na otomu ma na ano ki unumira na merongamu.

¹³Igo ko hagamonaria na suruha iamu. Igo ko bêngenira na enoni go hagatahira. Renia na raramohamu igo ko hagaotora tanga na agua ni suruha iamu.

¹⁴Na enoni getera i maveta ka rongo tarohamu. Ngaira ka magu ma ka tata. Na ai ni Pilisitia ka bubununuga ngavê.

¹⁵Na maneraha i Etome ka anumanuma ngavê. Na mane ramo ni Moaba ka gisigisi. Na ai ni Kanani ka bagahagêguri.

¹⁶Na maguha ma na anumanumaha ka tarahura. Ngaira ka rigia na raramohamu, Araha. Ngaira ka magu ma ka tugupu ka ura, matena ga ritare na kariamu go rupasira.

¹⁷Igo ko bêngenira tanga na hungana apuna iamu ma ko hasira igê na mako iamu, i na agua go bani atea, vigo gâga igê, i ruma ni rotu go tagarahia igo maremu.

¹⁸Na arahanga iamu, Araha, ki asa hagetage vige page hato.

¹⁹Na Isiraelita ka tarê ka râ suria na tara mamata i asi. Ma na matena na me ni Esipito henira na hosi iata ma na kati ni me, ma henira na mane ni me igê na hosi, ka mumurira me i tara i asi ngekana na Araha ki katoa na asi ki aporo hetaku hurira na merongata.

²⁰Ka Miriama na poropete ma kesina o Aroni ki haganega ki tahutahuru ma na gete hato ka mumuria ka tahutahuru nogata.

²¹Ka Miriama ki haganega na ki haoru ikê tangara: “Kiria na Araha, suria ngaia ki teha ma ki raramohaga hunia. Ngaia ki kasira i asi na hosi ma na mane ni me igê.”

²²O Moise ki bêngenira na Isiraelita tenia na Asi Memera tanga na bagamasusu raha i Suru. Na tangiani gi oru ka râ surigi igê na bagamasusu raha ma ka pe tarahua rârâ na ve.

²³Ma hemuri ngaira ka ata râ i Mara. Ma na ve i ngekana ki mahe ngavê, ma ki bara tangara vige tono. Tahema ga hêtana vi Mara, i vi Mahe.

²⁴Na enoni ka hagagege tanga o Moise ma ka hagate, ka vi: “Na ta kami totono?”

²⁵O Moise ki avarasia na Araha, ma na Araha ki hagabâsia renia na kere matena na apinige. O Moise ki tavoa ma ki kasia so i ve, ma na ve ki kahu arari ni tonoha. I ngekana na Araha ki vatera igê na ramata tangagi na ogaha iata, ma nikâ ngaia ki uhungira i ngekana.

²⁶Ngaia ki vi tangara, ki vi: “Manga mu têtê viteaku maninga, mu katogi na tarani ga ototo i maaku ma kamu marupegi na ramata iaku, hoi, inê ki asa be hagaitangigamu renigi na ani mavê na mera, gê hagaitangira noga na ai ni Esipito renigi. Inê nga ka na Araha gê hagakomagagamu.”

²⁷Ma hemuri ngaira ka râ ka ata i Elimi. I ngekana ka oga igê na vebanga tangahuru matarerua ma na bêni na ni na tangahuru gi pi. Ma ngaira ka mêru so i ngekana hagarangia na ve.