Read Kahua TAHINGA 17 Bible Online

TAHINGA 17 - Kahua bible

TAHINGA 17

¹Na Isiraelita hato ka pania na bagamasusu raha i Sini. Na Araha ki bonasira ka tênga rârâ surigi na mani agua. Ngaira ka tênga i Repitimi. Ma i ngekana ki mareha rârâ igê na ve, hanana vige totono.

²Ngaira ka hagagege tanga o Moise, ka vi: “Gu vategami na ve, kami tono.” O Moise ki aramira, ki vi: “Tanu hega mu hagagege? Tanu hega mu uhungia na Araha? Tanu hega mu pe hagêguritogo renia?”

³Ma na enoni ki mamata ngavê na riota ma ka ama ni hagagege nga tanga o Moise. Ngaira ka vi: “Tanu hega go bêngenigami hura tenia i Esipito? Go obanigami vari, igami, na karemami ma na togoha iamami, vigami mesi tonoha?”

⁴O Moise ki avarasia nga na Araha, ki vi: “Ve katora marata nenuni agini? Ngaira ka sugi arihahuniê nge!”

⁵Na Araha ki vi tanga o Moise, ki vi: “Gu merarâ tani na enoni raha iata na Isiraelita ma kamu nanago tarata tanga na hungana i Sinai. Go torea na vato, go bani tahurua noga renia na ve i Nile.

⁶I ngekana inê kê page rêra igê na hê raha i maamu. Gu tahurua na hê raha, ma na ve ki page gogogo me igê tangara na enoni ka totono.” O Moise ki kato vikana i maata na enoni raha iata na Isiraelita.

⁷O Moise ki naka na ata gi rua tanga na agua ngekana: Masa, i vi Uhungiha ma Meriba i vi Hagagegeha, suria na Isiraelita ka hagagege ma ka uhungia na Araha, matena ga hagate, ka vi: “I hega, na Araha ki ngahisigami mênga, se i mareha?”

⁸Na Amalekita ka sugarira na Isiraelita i Repitimi.

⁹O Moise ki vi tanga o Josua, ki vi: “Gu atera tani na me, hanana mu meraheariha na Amalekita i gomaha. Inê kê page rêra igê na hungana, kê tavoa na vato, God ki bani vateê renia.”

¹⁰O Josua ki râ suria na tamasinga iana o Moise tanga, ma ki râ ki meraheariha na Amalekita, matena o Moise, o Aroni mo Guru ka tagere igê na hungana.

¹¹Matena garu akê na rimana o Moise, na Isiraelita ka ama ni teharira nga na Amalekita, ma na matena garu vatovato na rimana, na Amalekita ka haganega nogata ka teharira na Isiraelita.

¹²Matena garu mangusi na rimana o Moise, o Aroni mo Guru karu ragea me na hê tanga o Moise ki oga igê. Ma ngairerua karu ura hetangenia ma karu têgi akê na rimana. Ngairerua karu têgi akê rârâ na rimana mataro me ki su na arito.

¹³Igê na tarana ngekana tahema o Josua ki teharira ngavê na Amalekita.

¹⁴Ma hemuri na Araha ki vi tanga o Moise, ki vi: “Gu segea so na sihonga renia na hearihatana mu teha igê ngekê, hanana ga takusia tare. Gu hagarongoa o Josua, vi inê kê page mutera ngavê na Amalekita.”

¹⁵O Moise ki tagarahia na panga na hê ni vogasiha ma ki hêtana renia vi ‘Na Araha ki ngahisiê manga na bêata’.

¹⁶Ngaia ki vi: “Mu hagahigasia nga na ngahisiha iana na Araha. Ngaia ki tohe, vi ama ni meraheariha nga tare na Amalekita.”