Read Kahua TAHINGA 18 Bible Online

TAHINGA 18 - Kahua bible

TAHINGA 18

¹O Jetero na mane ni vogasiha i Mitiani, o hungâna o Moise, ngaia ki rongogi na ara ni tarani, God ki bani katogi tangara o Moise ma na Isiraelita, matena i bêngenira hura tenia I Esipito.

²Tahema ngaia ki râ me i pasina o Moise. Ngaia ki merarâ me ka Sipora, kaniana o Moise, ma o karena gi rua, ga bani oga vê i pasina.

³O Moise ki hêtana ta na hitangiterua vi o Geresome, suria ngaia o Moise ki vi: “Inê kê mamahuara. Mareha vi pasiku kani ikê.”

⁴Ma tani ngaia ki hêtana vi o Eliesere, i vi, God iaku ki tamaniê, suria ngaia o Moise ki vi: “Na God, o vaemaku i rahesia, ngaia ki tamaniê ma ki hagatahiê tenia na maneraha i Esipito, i obania vi nahuiê kê meme.”

⁵O Jetero ki mera ata me kaniana o Moise mo karena gi rua igê na tênga iana o Moise igê na bagamasusu raha hagarangia na hungana apuna.

⁶O Jetero ki bani hagarongoa o Moise, vi ngaira ka arâ me.

⁷Tahema o Moise ki râ vurusia, ki tubê so tanga ma ki siginia. Ngairerua karu hehagateri, vi ngairerua heri karu mauri koro ma, ma hemuri ngairerua karu banu igê na ruma na gahu iana o Moise.

⁸O Moise ki hagarongoa o Jetero renigi na ara ni tarani, na Araha ki hagaitangira na maneraha ma na ai ni Esipito renigi, hanana i hagatahira na Isiraelita. Ngaia ki hagarongoa nikâ renigi na mamasiaganiha ga tarahura na enoni igê na râha iata, ma manga i he na Araha ki hagatahira tenigi.

⁹Matena o Jetero ki rongogi hato, ngaia ki vagevage,

¹⁰ma ki vi: “Ge hagarahasia na Araha, i hagatahigamu tenira na maneraha ma na ai ni Esipito! Hagarahasia na Araha, i hagatahira na kariana tenigi na hagamamasiaganiha!

¹¹I ngekê inê kê kahu girara, vi na Araha ki raha teharira ngavê na ataro hato. Ngaia ki kato vikana, suria na ai ni Esipito ka ruhira na Isiraelita.”

¹²Memuri o Jetero ki susu tanga God ma ki vogasia igê na tarani getigi nikâ. Ma o Aroni ma na enoni raha hato iata na Isiraelita ngaira ka ngê haku henia o Jetero, hanana ga rahesia God igê.

¹³I tangi me, ma o Moise ki hagaotogi na tarani ga akê me i berarogata na enoni. Ngaia ki aruma surigi haganega tenia na mahogotana mataro me ki su na arito.

¹⁴Matena o Jetero ki bâsia o Moise ki aruma surigi vikana, ngaia ki hagatea, ki vi: “Tanu hega go katogi na tarani hato ngegana tangara na enoni? Tanu hega go katogi getego? Bâ, i haganega igê na mahogotana mataro me ki bungi, na enoni ka hakurigo ko hagaotora.”

¹⁵O Moise ki arami, ki vi: “I tuguhiê, vigê katokato vikana, suria na enoni ka arâ me i pasiku, hanana viga girara na obaniha iana God.

¹⁶Manga na vererua na enoni ma karu hetuguri, ngairerua karu arâ me i pasiku, ma inê kê tarahua, vi o ti na hitangiterua ki oto, ma kê hagesurirerua renigi na tamasinga ma na ramata iana God.”

¹⁷Mo Jetero ki vi: “I pe arari vigu katokato vikana,

¹⁸I era ma ki meme na apemi, igo ma na enoni. I raha era na tagaraha tangago igo getego.

¹⁹Hoi, be hagaotoa na takotakoha iamu ma God ki page tamanigo. I tuguhigo hete, vigo tamasi urusira na enoni i maana God ma ko hagarongoa God renigi na hetuguriha iata.

²⁰I tuguhigo hete, vigo hagesurira nga na enoni renigi na ramata iana God. Go hagesurira renigi na ogaha ma na tauha koro.

²¹Ma nikâ ki tuguhigo, go atera tani na mane tako, ga hagahigasia God, ka mane hatara ma ka kikitenigi na vatevate. Ki tuguhigo, vigo kasira na mane ni hagaotonga iata na enoni. Tani na mane ni hagaotonga ka bêngenira na rehagaro na enoni, tani na tangarê gi tage, tani na tangahuru gi rima ma tani na tangahuru gi tage.

²²Go kasira, ka hagaotora na enoni i na ara ni tangiani. Ngaira ka girara ga hagaotogi na hetuguriha hato, na ani sisite ma na ani raha na hetuguriha ka nakagi me tangago igo. Vikana ki mataku tangago, suria ngaira ka hagamahago igê na tagaraha iamu.

²³Manga go katokato vikana-God ke bonasigo vikana-hoi, i asa vige page meme na apemu, ma na enoni ka page aporo ape tatara, suria ga hagaotogi hato na berarogata.”

²⁴O Moise ki râ suria na katoha iana o Jetero.

²⁵Ngaia ki atera na mane tako i berarogata na Isiraelita. Ngaia ki kasira ka vora na mane ni hagaotonga iata na enoni. Tani ka bêngenira na rehagaro na enoni, tani na tangarê gi tage, tani na tangahuru gi rima, ma tani na tangahuru gi tage.

²⁶Ngaira ka hagaotora na enoni i na ara ni tangiani. Ngaira mareta ka hagaotogi na hetuguriha hato, na ani sisite, ma na ani raha ka nakagi vê tanga o Moise.

²⁷Ma hemuri o Moise ki aria o Jetero, ma o Jetero ki aporo i pasina.