Read Kahua TAHINGA 19 Bible Online

TAHINGA 19 - Kahua bible

TAHINGA 19

¹Na Isiraelita ka pania i Repitimi ma ka ata râ igê na bagamasusu raha i Sinai igê na tangiana hagenago igê na oruta na hageha, i murina ga hura pania i Esipito. Ngaira ka tênga igê na hunana na hungana i Sinai.

³O Moise ki tagere vurusia God igê na hungana. I ngekana igê na hungana na Araha ki vi tanga o Moise, ki vi: “Gu vi tangara na Isiraelita, na raraha iana o Jakobo, ko vivi:

⁴“Igamu kamu bani bâsiê, manga i he inê na Araha kê hagaitangira na ai ni Esipito, ma manga i he kê marupegamu ma kê anumasigamu, manga na ahetaronga i anumasira na karena, ma kê bêngenigamu ikê.

⁵Hoi, manga mu têtê viteaku ma kamu marupea na suruheri iaku, igamu kamu voravora re nga na kariaku mareku. Na maveta hagenani ka na aniku, ma igamu nga kamu page voravora re na kariaku hetakui, na kariaku inê geteê ma.

⁶Igamu kamu page voravora re na enoni ni hagarahenga iaku ma inê be marungigamu. Go hagarongora nga vikana na Isiraelita.”

⁷Vikê o Moise ki rere vato ma ki hagahakura me na enoni raha iata na Isiraelita ma ki hagarongora renigi na ara ni tamasinga hato iana na Araha, manga God i hagatora.

⁸Ngaira hato na enoni ka arami haku, ka vi: “Igami kami page tanugi nga na ara ni marâ i visigi na Araha.” Hemuri o Moise ki aporo ma ki hagarongoa na Araha renigi na tamasinga iata na enoni.

⁹Na Araha ki vi tanga o Moise, ki vi: “Inê kê page arâ me tangago igê na vaha puru, hanana na enoni ka girara ga rongoê, matena gê megotamasi, ma ka page tongesurigo haganega tenia i ngekê.” O Moise ki hagarongoa na Araha renigi na aramiha iata na enoni.

¹⁰Ma na Araha ki vi tanga o Moise ki vi: “Gu aporo tangara na enoni ma ko bonasira, hanana vi i ngeke ma i gomaha ngaira ka hagamatarotarora mareta tanga na hagarahenga. I tuguhira viga tananigi na gahu iata,

¹¹ma ka nanê i oge gomaha. Igê nga na tangiana ngekana inê kê page soso igê na hungana i Sinai. Na enoni hato ka page bâsiê.

¹²Go naka na pereperega ki raravoro rihia na hungana. Siana na enoni ka pupu aharêngia. Gu hagapêpura, siana ka tagere igê na hungana, se viga rêra râ hagarangia. Manga ta na enoni ma ki aharê igê, ka page nahuia ki meme.

¹³Ga page arihahunia se ga hanasia ki meme. Siana kamu hataria. Na tarana ngekê ki tagenana ma tangara na enoni ma na togoha. Ga nahuira nga ka meme. Matena i angiangi na ahuri, na enoni ki tuguhira, viga tagere igê na hungana.”

¹⁴Hoi, o Moise ki aporo vato, ma ki bonasira na enoni ka hagarê tanga na hagarahenga. Vikê ngaira ka tananigi na gahu iata.

¹⁵O Moise ki vi tangara, ki vi: “I oge gomaha ki tuguhigamu mu bani nanê. Siana kamu meramêru na gete iami.”

¹⁶I na mahogotana igê na oruta na tangiana ki akurua ma ki marangea. Na vaha puru ki vora me igê na hungana ma ki rongo raha na ahuri. Na enoni hato igê na tênga ka bubununuga ngavê.

¹⁷O Moise ki bêngenira hura tenia na tênga ka râ tanga God. Ngaira ka ura igê na hunana na hungana.

¹⁸Na robona na gi ki gahuia na hungana i Sinai, suria na Araha ki so me igê i rarona na gi. Na robona ki akê manga na robona na anguruna na gi. Na enoni hato ka bubununuga ma ka tatata ngavê.

¹⁹Na ringena na ahuri ki kahu rongo raha ngavê. O Moise ki tamasi ma God ki aramia igê na gugusuhia.

²⁰Na Araha ki so me igê na botena na hungana i Sinai ma ki unia o Moise ki akê i pasina. O Moise ki tagere.

²¹Na Araha ki vi tanga, ki vi: “Gu aporo vato ma ko hagapêpura na enoni, siana ka pupu aharêngia na pereperega, hanana viga bâsiê, i era ma kê nahuira ka me.

²²Nikâ na mane ni vogasiha, ga ura me, ki tuguhira viga hagamatarotarora mareta, i era ma kê hagaitangira.”

²³O Moise ki vi tanga na Araha, ki vi: “Na enoni ki bara vige tagere me, suria go bani vi tangagami, vi na hungana ki apu tangagami, ma ko bonasigami, kami naka na pereperega ki rihu.”

²⁴Na Araha ki arami, ki vi: “Gu aporo vato ma ko meaporo me o Aroni. Na mane ni vogasiha ma na enoni ki apu tangara, vige pu aharêngia na pereperega i rihu hanana vige tagere me, i era ma kê hagaitangira.”

²⁵Vikê o Moise ki aporo vato tangara na enoni ma ki hagarongora renigi na tamasinga iana na Araha.