Read Kahua TAHINGA 21 Bible Online

TAHINGA 21 - Kahua bible

TAHINGA 21

¹“Igê nikâ ka na ramata go nakagi tangara na Isiraelita.

²Manga igo ma ko vuria na kare vurivuri na Isiraelita, ngaia ki tuguhia, vi tagara tangago surigi na harisi ge one. Igê na pita na harisi ngaia ki aharupa, mareha vige vurivuri pusia marena.

³Manga vi ngaia ki na enoni taura igê na matena i voravora re igê na kare vurivuri iamu, ngaia ki pania so nga kaniana. Ma ki manga vi ngaia ma ki bani êragi igê na matena i voravora re igê na kare vurivuri iamu, ngaia ki girara i merâ kaniana.

⁴Manga vi na avanuna ma ki vatea renia na gete ma ngairerua karu aparara na kare, na mane ma na gete, ngaia na gete ngekê henira na karena ngaira ka na anina na avanuna. Vikê ngaia na mane na kare vurivuri ngegana ki panira so nga.

⁵Manga vi ngaia na mane na kare vurivuri ma ki vi, vi ngaia ki takuira na avanuna, na gete iana ma na karena ma ki pe obania vige aharupa,

⁶hoi, na avanuna ki merâ nga igê na ruma ni hagarahenga. Ma i ngekana ki katoa nga ki rêra ngahisia na maani ruma se na u i na akerena na maani ruma, ma ki taketake kurua na vero na karingana. Vikana ngaia ki page voravora re na kare vurivuri mataro me ki meme.

⁷Manga vi na mane ma ki hagavuringenia ka karena ki voravora re na kare vurivuri, ka karena ngekana ki asa vige rupasia mangara na mane na kare vurivuri.

⁸Manga vi o vaemana ma ki hagavuringenia tanga tani na mane, i takusia vi auragia, ma ngaia na mane ki usitenia, hoi, ngaia ki hagavuringenia aporo tanga o vaemana. Na avanuna ki apu tanga, vige hagavuringenia tangara na mahuara, suria na parongana tanga ki pe oto.

⁹Manga vi na mane ma ki vuria na gete na kare vurivuri tanga o karena, ngaia ki tuguhia i katoa manga vi ka karena marena.

¹⁰Manga vi na mane ma ki heroga, ki tuguhia, i haganahunia na ani i nago na gete iana renigi na ngauha, na gahu ma ki memêru, tagenana manga i nago.

¹¹Manga vi ngaia ma ki pe katokato vikana tanga, ngaia na gete ki aharupa, mareha vige vurivuri pusia marena.

¹²“Manga ta na enoni ma ki nahuhunia ta na enoni, hoi, ga nahunahu hunia nogana.

¹³Ma ki manga vi pe takusia vige nahu hunia ma na enoni akana ki bagararâ me ki me, ngaia ki girara i gavagava tanga ta na hitangini na hinua ni tahinga, gê nakagi.

¹⁴Ma ki manga na enoni ma ki mangariaga ma ki takusia vi nahunahu hunia ta na enoni, ma ki nahuia ki me, hoi, ga nahunahu hunia nogana, naka ma i gavagava tanga na bea ni vogasiha iaku, hanana vi tahitahi.

¹⁵Manga na enoni ma ki tahurua o vaemana se kenana, hoi, ga nahuia ki meme.

¹⁶Manga na enoni ma ki hanagoa ta na enoni, hanana vi hagavuringenia, se i nahunia ki voravora re na kare rakuraku iana marena, hoi, ga nahuia ki meme.

¹⁷Manga na enoni ma ki guha erasia o vaemana se kenana, hoi, ka nahuia ki meme.

¹⁸Manga vi na vererua ma karu heariha ma na hitangiterua ki tahurua tani renia na hê, se i rupugia ma ki mareha vige nahu hunia, hoi, ga pe hagaitangia. Ma manga na mane i mamari ma ki tâtâ ma i bea,

¹⁹ma humuri ki girara i kahu aharaga ma ki rivato rârâ i metara, hoi, na enoni i hagamamaria ki tuguhia, i vuria na matena i tâ i bea ma ki marupea mataro me ki komaga aporo.

²⁰Manga na enoni ma ki tahurua ta na kare vurivuri iana, na mane se na gete, renia na apinige, ma na kare vurivuri ki me ototo râ, hoi, ga hagaitangia nga.

²¹Ma ki manga na kare vurivuri ma ki oga surigi na tangiani gi tage se gi rua ma ki kahu me, hoi, ga pe hagaitangia na avanuna na kare vurivuri, suria ngaia ki tê tara renia na kare vurivuri iana. Ngaia nga ka na hagaitangiha tanga.

²²Manga vi na vererua ma karu heariha, ma na hitangiterua ki tuguia na gete i obara, ma na gete ki hagasiria na karena ma ngaia marena na gete ki pe mamari rârâ, hoi, na ani i tuguia na gete, ki tuguhia i tavoa na êru. O vaemana na gete ngekê ki naka vi gi hita na haga manga vi na mane ni hagaotonga ka aganaria henia.

²³Manga vi ngaia marena na gete ma ki mamari, na hagaitangiha ki manga ikê: na mera tanga na mera;

²⁴na maana tanga na maana; na rivona tanga na rivona; na rimana tanga na rimana; na êgana tanga na êgana;

²⁵na noro tanga na noro; na maara tanga na maara; na rupugapu tanga na rupugapu.

²⁶Manga na enoni ma ki tahuru pusi na oruna maana na kare vurivuri iana, na mane se na gete, ma na maana ki guru na enoni akana, ki tuguhia i rupasia na kare vurivuri, na mena na maana.

²⁷Manga vi ngaia ma ki tahuru barugia na rivona ngaia ki tuguhia i rupasia na kare vurivuri, mena na rivona.

²⁸Manga ta na puruka mane ma ki ahura ki me ta na enoni renia na hona, ngaira ka arihahunia nga, ma ki apu vige ngêgi na ahasigona. Siana ka hagaitangia na avanuna.

²⁹Manga vi na puruka mane ma ki tarigenira tare na enoni ma na avanuna ki bani girara ma ki mareha vige purusia, hoi, manga i ahura hunia ta na enoni renia na hona, ngaira ka ariha hunia nga, ma ka nahunahu hunia nikâ na avanuna.

³⁰Hoi, ma ki manga vi ngaira ma ka hagamarumungenia na avanuna ki vurivuri pusia marena, hanana vi hagatahia marena, ngaia ki tuguhia, vi tavoa nga na haga manga ga nungia tenia.

³¹Manga na puruka mane ma ki nahunahu hunia na kere mane se na kere gete, ka katoa nga vikana nikâ.

³²Manga na puruka mane ma ki nahuia ki me na kare vurivuri, na mane se na gete, na avanuna na puruka ki tavoa na tangahuru gi oru na siliva tanga na avanuna na kare vurivuri. Ma na puruka mane ka ariha hunia nga.

³³Manga na enoni ma ki gagagatenia na kiru se i oparia na kiru ma ki pe buhia, ma na puruka mane se na tonki ki vota i rarona ma ki me,

³⁴ngaia ki tuguhia i tavotavo haga tanga na avanuna na puruka se na tonki ma ki nahunia na puruka se na tonki akana.

³⁵Manga vi na puruka mane iana ta na enoni ma ki nahuia ki me ta na puruka mane iana na enoni getea, ngairerua ki tuguhirerua garu hagavuringenia na ani i mauri na puruka mane ma karu tongani na haga ma karu tongani nga nikâ na hasigona na ani i me.

³⁶Manga vi na avanuna na puruka mane ki bani girara vi na puruka iana ngekana ki hagamamaguraga ma ki mareha vige purusia, ngaia ki tuguhia i urusia aporo tanga, ma ki girara ma i torea na ani i me.