Read Kahua TAHINGA 22 Bible Online

TAHINGA 22 - Kahua bible

TAHINGA 22

¹Manga na enoni ma ki hanagoa na puruka hehene se na sipi ma ki nahuia ki me, se i hagavurungenia, ngaia ki tuguhia i urusia aporo na puruka gi tage renira na ani gi rima, ma ki urusia aporo na sipi gi tage renira na ani ge he.

²Na mane hanago ki tuguhia vi kasikasi mena na hanagoha iana. Manga i bara tanga, ngaia ki tuguhia nga viga hagavuringenia ki vora re na kare rakuraku, mena na marâ i hanagoa. Manga vi ngaia ma ki hanagoa na puruka hehene, se na tonki, se na sipi, ma ka tarahua vi ngaia ki nahunia, hoi, ngaia ki tuguhia i barua aporo renirerua na ani gi rua. Manga na mane i hanago ma ki banu i ruma igê na bungiana, hanana vi hanago igê, ma ka nahuia ki me, siana ka hagaitangia na ani i henahu, suria vi nahuia ki me igê na bungiana. Ma ki manga vi nahuia igê na tangiana, ngaia ka hagaitangia nga.

⁵Manga na enoni ma ki kasira na togoha iana igê na mu na aru iana se igê na pariki na vaini iana, ma ki pe bâsurira bâkoro, ma ngaira ka tarê ka ngêgi na mu ni ngêra iana ta na enoni, hoi, ngaia ki tuguhia i barua aporo renia na mu ni ngêra iana marena, se renigi na guani na apinige na vaini iana marena.

⁶Manga na enoni ma ki tanga na gi i mu iana marena ma na gi ki tatarê surigi na rauga ki tarêhia na mu iana ta na enoni ma ki tihu ta apanena na mu, se na mu hagenani, se na ngauha ga bani rurugi haku, hoi, na enoni i tanga na gi, ki tuguhia, vi barubaru aporo.

⁷Manga na enoni ma ki hagatora ta na enoni ki nakagi tanga na haga se na rêni se na anima na marâ koro iana, ma na mane hanago ki hanagogi tenia na ruma iana, hoi, manga viga tarahua na mane i hanago, ngaia ki tuguhia i urusigi aporo na marâ i hanagogi: na marâ gi rua henia na ara ni marâ hehegitigi i hanagogi.

⁸Ma ki manga ka pe tarahua na enoni i hanagogi, hoi, na enoni i nakagi na marâ ngegana, ki tuguhia ga merâ nga tanga na ruma ni hagarahenga, ma i ngekana ngaia ki tohetohe nga, vi ngaia ki pe hanagogi na nahuninga iana na tamana.

⁹Manga na vererua ma karu hepara renia ta na nahuninga, na puruka, na tonki, na sipi, na gahu se na anima na marâ i tasi, ki tuguhia, viga torererua tanga na ruma ni hagarahenga. Hoi, na ani God ki visia vi hanago ki tuguhia, i urusigi na marâ i hanagogi: na marâ gi rua henia na ara ni marâ hehegitigi i hanagogi.

¹⁰Manga na enoni ma ki hagatora ta na enoni ki bâsuria na tonki, na puruka hehene, na sipi se na anima na togoha, ma na marâ ngekana ki me, se i mamari, se ga hanagoa, ma ki mareha ta na enoni vige bâsia,

¹¹hoi, na enoni i bâsuria ki tuguhia, vi arâ tanga na ruma ni hagarahenga ma ki tohetohe igê, vi ngaia ki pe hanagoa. Manga na marâ ngekana ma ka pe hanagoa, na avanuna ki bara tanga vige visia ta na marâ renia, ma na tamana ki pe araria vige barua.

¹²Manga vi na marâ ngekana ma ka hanagoa, na enoni i bâsuria ki tuguhia i barua tanga na avanuna.

¹³Manga vi na marâ vasiga ma ka garahunia ka ngêa, hoi, na enoni i bâsuria ki tuguhia, i hagabângenia na agua ga ngê kasia, ma ki pe araria, vige barua, suria na marâ vasiga kani ga ngêa.

¹⁴Manga na enoni ma ki torea noga ta na togoha iana na tamana, ma na marâ ngekana ki mamari se i me, ma na avanuna ki pe gâga kani igê na matena ngekana, hoi, ngaia ki tuguhia vi barua.

¹⁵Ma ki manga na avanuna ma ki gâga igê na matena ngekana, ngaia ki pe araria vige barua. Manga vi taharia, na haga i taharia renia, ki arari râ ma vikana.

¹⁶Manga na mane ma ki naka bêna tanga na kere gete tatara i taura, ma ki rongo era henia, ngaia ki tuguhia vi vuria ki auragia.

¹⁷Ma ki manga o vaemana na kere gete ma ki manimania, hoi, na mane ki tuguhia, vi tavoa na haga tanga o vaemana na kere gete, na haga i raharaha araria na vurina na kere gete tatara.

¹⁸Mu nahuia nga ki meme na gete i harikua.

¹⁹Mu nahuia nga ki meme na mane i rikihia na marâ manga na goti se na marâ vigana.

²⁰Mu nahuia nga ki meme na enoni i vogasira na ataro ma ki pe vogasiê inênga hete na Araha.

²¹Siana kamu katora bera se mu hagamamasiaga apeta na mamahuara i berarogami. Mu takusia tare, vi igamu nogami kamu mamahuara i Esipito.

²²Siana kamu hagamamasiaga apeta na gete na nâ se vi na kare banogo.

²³Manga mu katokato vikana, inê na Araha kê aganarigi na avarasiha iata,

²⁴ma kê page mangariaga tangagamu igamu, ma kê page nakagamu vê kamu meme igê na hearihatana. Vikana na gete iami ka page nânâ ma na karemi ka page banogo.

²⁵Manga na kariaku ga matareha ma ka kaone tenigamu, siana kamu nungigi akê nikâ ta na haga tenira.

²⁶Manga na enoni ma ki kaone tenigamu ma ki vategamu na gahu iana i suru renia, vi page barua aporo na hagaba, hoi, ngaia ki tuguhigamu vigamu vatea aporo na gahu iana ma ki kahu susu na arito,

²⁷suria na aruhana gi tage akini ngekana. Manga i mareha, na ta ki aruha renia? Manga vi ngaia ma ki avarasiê, inê kê aganaria, suria inê kê hetaki.

²⁸Siana kamu tamasi erasia God. Siana kamu guhaguha erasira na ani ga bêngenigamu.

²⁹Mu tagarenigi tangê na nagoni na ngêra, na vaini ma na oile ni olive iami. Mu tagarenira tangê na bêbê ni kare mane iami.

³⁰Mu tagarenira tangê na kareta mane hagâkani na puruka, na sipi ma na goti iami. Mu nakara na kareta mane hagâkani ka gâga henira kenata surigi na tangiani gi pi, ma igê na varuta na tangiana kamu tagarenira tangê.

³¹Siana kamu ngaugi na ahasigota na ganiani, ga gara hunira na marâ vasiga. Mu hagangêra hete na o renigi, suria igamu ka na kariaku.