Read Kahua TAHINGA 23 Bible Online

TAHINGA 23 - Kahua bible

TAHINGA 23

¹“Siana kamu tokorenigi na tamasinga hagahagaparu igê na tamasinga. Siana kamu hagaparu pusia na enoni i aharê igê ta na marâ.

²Siana kamu têtê henira na enoni ga raha, matena ga katogi na tarani ga pe oto, se ga ririgi na tamasinga igê na hagaparuana igê na kotiha.

³Igê na tamasinga siana kamu panepane henira na enoni, suria vi ngaira ka matareha.

⁴Manga mu bâsia na puruka se na tonki iana na merongami i gava ki tarupe, mu torea nga aporo tanga.

⁵Manga vi na tonki iana na merongami ma ki migiapuri na toraha higa, mu tamania na avanuna, hanana mu raragea aharaga aporo na tonki. Siana kamu atani bâbâ mavê renia.

⁶Mu suria igê na otoha na enoni matareha, matena i gâgâ igê na kotiha.

⁷Siana kamu hagatoraia na enoni. Siana kamu suria ki meme na enoni i pe erasia rârâ ta na marâ, suria inê kê hagaitangia ngavê na anima na enoni i katoa na tarana era ngekana.

⁸Siana kamu aganarigi na vatevate, suria na vatevate ki hagagurura na enoni tenigi na tarani i oto, ma ki katora ka heherigagi na tamasinga iana na enoni, i pe erasia rârâ ta na marâ.

⁹Siana kamu katora bera na mahuara. Igamu kamu bani hata vikana nogami, matena mu mamahuara i Esipito.

¹⁰Surigi na harisi ge ono igamu kamu page hasihasi i mu iami ma kamu ngêngê igê.

¹¹Ma suria na pita na harisi igamu kamu page naka vê na mako ki aruga, ma siana kamu ngaugi na marâ igê. Na enoni matareha ki ararira, viga ngêngê igê. Ma na ani, ga ngêngê kasigi, ki ararira ga ngêngê nogata na marâ vasiga. Mu katogi vigana na mu ni vaini ma na pariki na apinige ni olive iami.

¹²Mu tagara surigi na tangiani ge ono, ma siana kamu tagara igê na pita na tangiana, hanana na kare vurivuri iami ma na enoni mahuara, ga tagara tangagamu ma na togoha iami, ka mamaro nogata.

¹³Mu marupegi nga na ramata hato iaku inê na Araha. Siana kamu hagarapera na ataro. Siana hagetage kamu tamasira.

¹⁴“Mu hagahigasigi na tangiani raha gi oru igê na ara ni harisi, hanana mu hagarahasiê igê.

¹⁵Igê na hageha na Abibi, na hageha mu hura pania igê i Esipito, ki tuguhigamu, mu hagahigasia igê na tangiana raha na bereti i pe ahunga, igê na tarana gê bani bonasigamu renia. Siana kamu ngaugi na bereti i ahunga surigi na tangiani gi pi na tangiana raha ngekana. Na ara ni mateni mu rahesiê igê, mu vogasiê igê nikâ.

¹⁶Mu hagahigasia na tangiana raha ni nagoni na ngêra, matena ga maua na mu. Mu hagahigasia na tangiana raha ni ruhu igê na matena ni turituriha, matena mu husihusi na guani na vaini ma na apinige ni ngauha.

¹⁷Hageoru i rarona na harisi, igê na tangiani raha gi oru ngegana ki tuguhira na mane hato i pasimi, viga hakuhaku i maaku, hanana ga rahesiê, inê na Araha God iami.

¹⁸Matena mu vogasiê renia na ganiana, siana kamu tagarenia tangê henia na bereti i ahunga. Na êbeta na ganiani mu vogasiê renigi igê na tangiani raha ngegana, siana kamu hagahitagi tanga i tangitangi me.

¹⁹I na ara ni harisi mu totora me na nagoni na mu iami i ruma mu rahesiê igê, inê na Araha God iami. Siana kamu hagagoboa na karena sipi se na goti renia na nongana na kenana.

²⁰“Inê be kasia na angero, ke nanago tarami, hanana ge anumasigamu igê na râha ma ke bêngenigamu tanga na agua gê bani naka tangagamu.

²¹Mu karinga ma kamu têtê viteana. Siana kamu haritohea, suria inê kê hagatorangenia ma ngaia ki asa vige tako renigamu, matena mu haritohea.

²²Manga vi igamu ma kamu têtê viteana ma kamu arâ surigi na tamasinga iaku, inê kê page meraheariha na merongami hato.

²³Na angero iaku ki page nanago tarami ma ki page bêngenigamu banu igê na agua iata na Amorita, na Hitita, na Perisita, na Kananita, na Givita ma na Jebusita, ma kê mutera ngavê.

²⁴Siana kamu hagarapera na ataro iata, se vigamu vogasira. Siana kamu taua na rotu iata. Mu kamakamarigi na nunuta na ataro iata ma kamu hogegi na panga ni vogasiha iata.

²⁵Manga mu rahesiê, inê na Araha God iami, inê kê page haganahunigamu renigi na ngauha ma na ve, ma kê page hagamagahurugi na maeha hato tenigamu.

²⁶Na hagasiriha ni kare ma na gomaraniha i asa, vige oga i pasimi. Inê kê page katogamu, kamu mauri arihu.

²⁷Inê kê page hagamagusira na enoni ga merongasigamu. Na enoni, mu meraheariha inê kê page katora ka tugupu. Inê kê page katora na merongami hato ka kariarigu ka gavagava tenigamu.

²⁸Inê be katora na merongami ka anumanuma ngavê. Inê be tarigenira hura na Gavita, na Kananita ma na Hitita, matena mu mataro me kamu guruguru sugira.

²⁹I asa be tarigenira hura hato i rarona na harisi gi tage. Manga gê katokato vikana, na agua ki page hihiruga ma na marâ vasiga ka page aharêsigamu.

³⁰Inê be tarigenira hura tatage hete, mataro me kamu rakorako, hanana mu ogasia igamu na agua iata.

³¹Na taritarihana na mako, gê haganahunigamu renia, ki haganega i Asi Memera tanga na ve i Uparatesi, ma tenia na asi i kereso tanga na bagamasusu raha. Inê be katogamu, kamu teharira na enoni ga oga igê, ma kamu tarigenira hura, matena mu guruguru sugira.

³²Siana kamu heaganari henira ngaira, se vi henira na ataro iata.

³³Siana kamu nakara na enoni ngegana ka gâga igê na agua iami. Manga ngekana, ngaira ka page hagarigugamu teniê inê tangara na ataro iata. Na tarana ngekana ki manga ga sutasuta karigamu kamu meme igê.