Read Kahua TAHINGA 26 Bible Online

TAHINGA 26 - Kahua bible

TAHINGA 26

¹“Go tagarahigi nga na gahu tangahuru gi tage tanga na ruma na gahu apuna iaku renigi na gahu siki ni Esipito ga uririga maravarava, rotorotoaga memera ma memera na varehuta na sipi. Na enoni i manisingenia na hêhênga ki hêrira nga na angero igê.

²Na ara ni gahu ka heavore nga. Na borahusigani ka 14 mita ma na aberaberagani ka 2 mita.

³Go turagi haku na ani gi rima ma na ani gi rima.

⁴Go tagarahigi na mangani na gahu maravarava igê na akerena hura gi tage na ara ni hitangiterua.

⁵Na mangani 50 igê tani ma igê tani ma ka goga nga heutumi.

⁶Go tagarahigi na kavikavi renia na golo, hanana ga têtêtakurerua haku na gahu.

⁷“Go tagarahia na ruata na ruma na gahu ke buhia na ruma na gahu apuna iaku. Go tagarahigi na gahu 11 renigi na varehuta nga na goti.

⁸Ga heavore nga ngaigi hato. Na borahusigani ka 15 mita ma na aberaberagani ka 2 mita.

⁹Go turagi haku na ani gi rima ma ko turagi haku na ani ge ono. Na onota tanga i kukuku igê i maana na ruma na gahu ko pinoa nga.

¹⁰Go tagarahigi na mangani igê na akerena hura gi tage na ara ni hitangiterua. Na mangani 50 igê tani.

¹¹Go tagarahigi na 50 na kavikavi renia na kapa higa. Go têtêtakugi na mangani renigi na kavikavi ngegana, hanana ga têtêtakurerua haku na gahu, karu manga na gerina gi tage ma.

¹²Na apanena na borahusigana na gahu i hitahita râ ki kukuku nga i murina hura na ruma na gahu apuna.

¹³Na 15 sentimita na aberaberagana na gahu ki hitahita râ i basigunaheri na ruma na gahu apuna.

¹⁴“Go tagarahirerua nikâ tani na bubuhina na gerina na ruma na gahu apuna: tani na gavota na sipi mane ga pupunigi memera, ma tani ki mamao ma manihinihi tanga na gerina i metara na ruma.

¹⁵“Na apê na ruma na gahu apuna gu tagarahigi nga renigi na apê na apinige na akasia.

¹⁶Na borahusigana na ara ni apinige na apê ki 5 mita ma na aberaberagana ki 75 sentimita.

¹⁷Na ara ni apinige na apê ki tongatonga nga renigi na bugusuni gi rua, hanana ka heavore, hanana ga ratogi haku.

¹⁸Na ruma na gahu apuna ki maatia i kerekê. Go tagarahigi na 20 na apinige na apê tanga ta apanena ma ta apanena,

¹⁹henigi na 40 na hunani na siliva henigi na kiru i ruguhani na apinige na apê, na ani gi rua i ruguhana na ara ni apinige na apê, tanga ga hagêrasigi igê na bugusuni.

²²Tanga na murina bêso na ruma na gahu apuna gu tagarahigi igê na 6 na apinige na apê,

²³henigi na ani gi rua tonganirerua na ruguna gi rua.

²⁴Na apinige na ape gi rua ngegana karu purupuru haku nga haganega kere vato tanga i kerekê. Nga hanana ngekana.

²⁵Ngekana na 8 na apinige na apê henigi na 16 na hunani na siliva: na ani gi rua tanga na apinige gi tage.

²⁶“Go tagarahigi na 15 na bênivoro renigi na apinige na akasia: na ani gi rima tanga ta apanena ma tanga ta apanena ma na ani gi rima tanga na murina na ruma na gahu apuna.

²⁸Na oruta na bênivoro ki tâtâ i gupu, i borahu ki arâ tare tanga i ta bogona na ruma na gahu apuna.

²⁹Go taruhigi na apinige na apê ma na bênivoro renia na golo. Go nakagi na ringi na golo igê na apinige na apê tanga ga suvarenigi na bênivoro igê.

³⁰Go hagêrasia na ruma na gahu apuna suria na katoha, gê bani hagabâsigo renia igê na hungana.

³¹“Gu tagarahia na gahu tanga i kukuku renigi na gahu siki ni Esipito ga uririga maravarava, rotorotoaga memera ma memera na varehuta na sipi. Na enoni i manisingenia na turaturaha ni hêhêga ki hêrira igê na angero.

³²Go kuharenia igê na kavikavi surigi na u ge he na apinige na akasia ga taruhigi renia na golo. Ngaigi ka ura igê na hunani na siliva.

³³Na gahu ngekana ki kuku igê na kavikavi igê na evâ na ruma na gahu apuna. Go naka na bokesi na suruheri henirerua na hê na ramata i rarona i murina banu na gahu i kuku vato. Na gahu ngekana ki voasia na ruma na gahu ki vora na kiboru gi rua: na kiboru apuna ma na kiboru apuna teha ngavê.

³⁴Go buhia na bokesi na suruheri renia na bubuhina.

³⁵I na apanena hura na gahu ngekana ko nakarerua igê na bea na bereti tanga râ na apê igê na otona ma na atohana na laiti tanga na apê i mahana.

³⁶“Go tagarahia na gahu tanga i kukuku igê na maana ruma na ruma na gahu apuna renia na gahu siki ni Esipito i uririga maravarava, rotorotoaga memera ma memera na varehuta na sipi, ga hêrigi igê na mahe.

³⁷Tanga na gahu ngekana go tapigi na u gi rima na apinige na akasia, ko taruhigi renia na golo, ko nakagi igê na kavikavi na golo ma ko tagarahigi na hunani gi rima renia na kapa higa tangagi na u ngegana.