Read Kahua TAHINGA 27 Bible Online

TAHINGA 27 - Kahua bible

TAHINGA 27

¹“Go tagarahia na bea ni vogasiha renigi na apinige na akasia. Ga heavore na sukuni. Na borahusigana ki 2 mita ma na 50 sentimita ma na aberaberagana ki manga ngekana nikâ ma bê tagere ki 1 mita ma na 50 sentimita.

²Na bea ni vogasiha ki tongatonga renigi na bugusuni igê na sukuni ge he. Go aba hagenani renia na kapa.

³Go tagarahigi na apira tangagi na rahu igê na bea ni vogasiha ma nikâ na maevo, na apira ni vogasiha, na eahi ma na apira tanga na gi. Go tagarahigi ngaigi hato renia na kapa.

⁴Go hêria na bea aberabera renigi na sigani na kapa ma ko nakagi na ringi na kapa tonganigi na sukuni ge he.

⁵Go naka na bea ngekana i ruguhana na bea ni vogasiha i akê ki tariha i gupu.

⁶Gu tagarahirerua na apinige ni tugiha renigi na apinige na akasia ma ko abarerua renia na kapa.

⁷Go suvarenirerua igê na ringi i na apanenaheri na bea ni vogasiha, matena ga tugia.

⁸Na bea ni vogasiha go tagarahia renigi na apinige ki guguhuga nga suria na katoha gê bani hagabâsigo renia igê na hungana.

⁹“Na mahera i metara na ruma na gahua apuna iaku ko ahia nga renigi na gahu siki ni Esipito ga kukuku. Na gahu ngegana ka tangarerua na akerenaheri ma ka uhuani nga na 50 mita.

¹⁰Ngaigi ka kuku igê na 40 na u na kapa higa, ga ura igê na 40 na hunani na kapa higa: 20 i ta akerena ma i ta akerena. Na rabotarê henigi na kavikavi go tagarahigi nga renigi na siliva.

¹²Igê na apanena bêso na gahu ka uhuana nga na 25 mita henigi na 10 na u ma na 10 na hunani.

¹³Igê na apanena bêkê i oga igê na maani ruma tanga na mahera na gahu ka uhuana nga na 25 mita nikâ.

¹⁴Na gahu i na apanenaheri na maani ruma na borahusigaterua karu 7 mita ma na 50 sentimita. Na u gi oru henigi na hunani gi oru i na apanenaheri.

¹⁶Tanga so na maani na mahera na gahu gi tage i 10 mita na borahusigana. Ngaia ki na gahu siki ni Esipito i uririga maravarava, rotorotoaga memera ma memera na varehuta na sipi ma ka turahêrigi igê na mahe. Ngaia ki kuku igê na u ge he igê na hunani ge he.

¹⁷Ngaigi hato na u ga rihia na mahera, na tabotarê ka ave tatarê igê. Na tabotarê ma na kavikavi igê ka na siliva ma na hunani ka na kapa higa.

¹⁸Na borahusigana na mahera ki 50 mita, na aberaberagana ki 25 mita ma ki akê na 2 mita ma na 50 sentimita. Na gahu ga kuku ngegana ka na gahu siki ni Esipito ma na hunani na u ka na kapa higa.

¹⁹Na ara ni marâ hato tanga na hagarahenga i rarona na ruma na gahu apuna ma na rapurapuna na ruma na gahu ma tanga na mahera ka na kapa higa.

²⁰“Go bonasira na Isiraelita ka torea me na oile ni olive mora ma taranina tangagi na laiti, hanana ga mavesia na ruma na gahu apuna.

²¹O Aroni mo karena ki tuguhira viga tangagi na laiti i ruma na gahu apuna iaku i murina hura na gahu i kuku i maana na bokesi na suruheri. Na laiti ngegana ka mave nga i maaku suria na bungiana, haganega i manurahi tanga na mahogotana. Na ramata ngekê ki tâtâ tare nga tangara na Isiraelita ma na raraha iata.