Read Kahua TAHINGA 28 Bible Online

TAHINGA 28 - Kahua bible

TAHINGA 28

¹“Go unira me o veogamu o Aroni henira o karena o Nataba, o Abihu, o Eleasare ma o Itamare. Go tavora hura tenira na Isiraelita, hanana ga tagara tangê mangara na mane ni vogasiha.

²Go tagarahigi na gahu ni mane ni vogasiha tanga o veogamu o Aroni, na gahu bâkoro, ga katoa ki bâbâ hahanetaga.

³Go unira me na mane, gê bani vatera renia na aitangisiha ni turaha ni gahu ma ko bonasira ka tagarahigi na gahu tanga o Aroni, hanana go page hagapunaria ki tagara tangê manga na mane ni vogasiha.

⁴Go vi tangara, ka tagarahigi na gahu ni parematona, na anga ni girarasiha, na tuguni borahu, na tuguni abubu ga turatura igê na mahe, na bubuhibê ma na hogosina. Ngaira ka tagarahigi nga na gahu ni mane ni vogasiha ngegana tangara o veogamu o Aroni mo karena, hanana ngaira ka girara ga tagara tangê mangara na mane ni vogasiha.

⁵Na mane ga manisingenia na turaha ka tagarahigi nga renigi na gahu maravarava, rotorotoaga memera ma memera na varehuta na sipi, na sigani na golo ma na gahu siki ni Esipito.

⁶“Na gahu ni parematona ka tagarahia nga renigi na gahu maravarava, rotorotoaga memera ma memera na varehuta na sipi ma na gahu siki ni Esipito ga turagi igê na mahe.

⁷Na kakavina gi rua i sururerua tonganirerua na gaparana.

⁸Ngaira ka tagarahia na hogosina renigi na marâ ngegana nikâ. Na hogosina ki haku henia na gahu ni parematona ma ki bara vige tavoa râ tenia.

⁹Go tavorerua na hê memera i raha na meterua ma ko tarigi igê na atata o karena tangahuru matarerua o Jakobo,

¹⁰manga hanana ga vora hesurisuri: na vere ono igê tani ma igê tani.

¹¹Na mane i manisingenia vikana, ngaia nga kani tarigi na atata o karena o Jakobo igê ma ki hangarenirerua na hê ngegana tonganirerua na kiru na golo.

¹²Go turarerua tonganirerua na kakavina na gahu ni parematona. Ngairerua ka na girarana vi na varo ninuni tangahuru matarerua iana o Isiraele. Vikana na atata ka gâga i gaparana o Aroni. Ngekana inê na Araha kê page takusira tare na kariaku na Isiraelita.

¹³Go tagarahirerua na kiru na golo tangarerua na hê ngegana

¹⁴ma ko garororerua na garo na golo taranina ma ko sururerua tonganirerua na kiru.

¹⁵“Go tagarahia na anga ni girarasiha tanga na mane ni vogasiha i teha, hanana i tarahua vi na ta ka na obaniha iana God. Go tagarahia nga renigi na garo na golo, na varehuta na sipi maravarava, rotorotoaga memera ma ki memera ma na gahu siki ahuru ni Esipito, manga go tagarahia na gahu ni parematona renigi ma ko hagamahea vikana nikâ.

¹⁶Go pinoa ki voravora na anga i heavore na apaneniheri: na ara ni apaneni ka 20 sentimita.

¹⁷Go turagi igê na harahara ge he na hê i raha na meni. Igê na harahara gi tage na hê gi oru: tani ki memera, tani ki hereherega ma tani maravarava.

¹⁸Igê na ruata na harahara na hê gi oru nikâ: tani ki rotorotoaga maravarava, tani ki sikisiki maravarava ma tani ki toratorakaga.

¹⁹Igê na oruta na harahara na hê gi oru nikâ: tani ki sikisiki maravarava, tani ki hereherega ma tani rotorotoaga memera.

²⁰Igê na heta na harahara na hê gi oru nikâ: tani ki rotorotoaga maravarava, tani ki makomakoga ma tani ki memera. Ngaigi ngegana ka hanga renigi igê na kiru na golo.

²¹Na hê tangahuru matarerua ngegana ka tarigi tonganigi nga igê na atata o karena tangahuru matarerua o Jakobo, hanana ga hagabângenira na varo ninuni tangahuru matarerua iana o Isiraele.

²²Tanga na anga ni girarasiha gu garorogi na varo renigi na sigani na golo taranina.

²³Go tagarahirerua na ringi na golo ma ko nakarerua igê na sukuna bêtagere na anga ni girarasiha,

²⁴ma ko rakurerua na ringi ngegana renirerua na garo gi rua na golo.

²⁵Ta na bogoterua na garo ko rakurerua na kiru gi rua na golo re. Ngekana ko rakurerua i na apenena hura renirerua na kakavina i gaparana gi rua na gahu ni parematona.

²⁶Go tagarahirerua na ringi na golo ma ko rakurerua igê na sukuterua kere vato na anga ni girarasiha i na apenena banu tanga na gahu ni parematona.

²⁷Go tagarahirerua nikâ na ringi na golo ma ko rakurerua igê na bogoterua bê vato na kakavina i gaparana na gahu ni parematona i berarogaterua na anga ni girarasiha ma na hogosina.

²⁸Go suvarenirerua na garo maravarava igê na ringi na anga ni girarasiha ma na gahu ni parematona, hanana na anga ni girarasiha ki gâga gatagata i avorana na hagosina, i era ma ki guruguru rârâ.

²⁹Matena o Aroni ki bêbanu igê na kiboru apuna, ngaia ki haga nga na anga ni girarasiha henigi na hê ga tarigi igê na atata na varo ninuni iana o Isiraele, hanana vi inê na Araha kê page takusira tare na kariaku.

³⁰Gu nakarerua na hê ni girarasiha igê na anga ni girarasiha, hanana o Aroni ki torererua banu me i maaku igê na kiboru apuna. I na ara ni mateni i bêbanu me i pasiku, ngaia ki haga nga na anga ni girarasiha, hanana i tarahua na katoha iaku tangara na Isiraelita.

³¹“Na tuguni i kukuku huria na tuguni borahu ki maravarava nga ma ko tagarahia renigi na varehuta na sipi.

³²Ngaia ki tongatonga nga na makuruha igê na riona i taratara hura igê na bêna. Na makuruha ngekana ka turatura pusia na ahehena renia na gahu gatagata, i era ma ki tatari.

³³Rihuia na taretarena so hagenani na tuguni ngekana gu kuharenigi igê na marâ ga bâ mangagi na guani na apinige buburi ma na kere belo sisite na golo. Ngaigi na belo ma na guani ngegana ka kukuku hetorariga vigana, ki rihu ki takutaku. Na guani ko tagarahigi renigi nga na varehuta na sipi: tani na guani ka maravarava, tani ka rotorotoaga memera.

³⁵O Aroni ki tuguni nga renia, matena i tagara tangê manga na mane ni vogasiha, matena i bêbanu me i maaku igê na kiboru apuna iaku se i huhura, i era ma ki me.

³⁶“Go tagarahia na tarepuri apuna renia na golo taranina ma ko tarigi igê na tamasinga igê agê: ‘Na anina na Araha.’

³⁷Go rakua na tarepuri ngekana renia na sigana maravarava igê na bubuhibê bême i bêna.

³⁸O Aroni ki tuguhia i naka igê na raena, hanana inê na Araha kê page aganarigi na votovoto hato, na Isiraelita ga tagarenigi tangê, henaka vi ngaira ma ka pe tagarenigi maninga surigi na ramata.

³⁹“Go tagarahirerua na tuguni abubu ma na bubuhibê renigi na gahu siki ni Esipito tanga o Aroni, ma nikâ na hogosina, go turagi na mahe igê.

⁴⁰“Go tagarahigi na tuguni abubu, na hogotekâ ma na bubuhibê tangara o karena o Aroni, hanana ngaira ka bâkoro ma ka hahanetaga.

⁴¹Go hagatugunira o veogamu o Aroni mo karena renigi na tuguni ngegana. Hemuri ko monera renia na oile ma ku hagapunarira, ka vora re na mane ni vogasiha iaku.

⁴²Go tagarahigi na kâhisita renia na gahu siki, hanana siana ka maki surigi.

⁴³O Aroni mo karena ka hagesuru nga tare renigi na gahu hato ngegana, matena ga bêbanu me igê na ruma na gahu apuna iaku, se viga tagara igê na bea ni vogasiha igê na kiboru apuna mangara na mane ni vogasiha, i era ma ka aharê ma ka me. Ngaia nga ka na ramata i gâga hagahu nga tangara o Aroni ma o karena.