Read Kahua TAHINGA 3 Bible Online

TAHINGA 3 - Kahua bible

TAHINGA 3

¹O Moise ki bâsurira na sipi ma na goti iana o Jetero o hungâna, na mane ni vogasiha i Mitiani. I ta na tangiana ngaia ki torera na togoha ka aharêvoro igê na bagamasusu raha, ma ka mataro i Sinai, na hungana apuna iana God.

²Na angero iana na Araha ki vora me tanga igê na vavatana na gi igê na kere apinige i suru. O Moise ki rigia na apinige i tarê renia na gi, ma na apinige ki pe noro.

³O Moise ki tako, ki vi: “E, i tanu hega ngekana? I tanu hega kani pe noro na kere apinige? Be ura râ be bâsia.”

⁴Matena na Araha ki bâsia o Moise i ura me, ngaia ki tamasi me tanga tenia na kere apinige, ki vi: “Moise! Moise!” Ngaia ki arami, ki vi: “Oi, na ta?”

⁵God ki hagapêpua, ki vi: “Gu ura mavê i ngekana! Gu tarasigi râ na santere i ugamu, suria na agua go ura igê ngekê ki apuna.

⁶Inê nga ki na God, na êvarimu o Abarahamo, o Isako mo Jakobo ka rahesiê.” Vikê o Moise ki tukuia na maana, suria i magu vige bâsia God.

⁷Hemuri na Araha ki vi: “Inê kê bani bâsira na ai ni Esipito ga hagamamasiagara ngavê na kariaku. Inê kê bani rongogi na avarasiha iata, hanana viga tahitahi tenira na mane ga hagatutunguhira. Inê kê bani giraragi bâkoro na mamasiaganiha iata.

⁸Tahema inê kê so me, hanana vi gê hagatahira tenira na ai ni Esipito ma kê bêngenira hura tenia i Esipito tanga na agua na mako koro i hatahata tangara na togoha. I ngekê i ngekana ka oga igê na Kananita, na Hitita, na Amorita, na Pirisita, na Givita ma na Jebusita.

⁹I monari, inê kê bani rongogi na avarasiha iata na kariaku na Isiraelita, ma kê bani bâsira na ai ni Esipito, ga hagamamasiagara.

¹⁰Hoita, i ngekê inê kê hagatorangenigo i pasina na maneraha i Esipito, hanana go bêngenira hura na kariaku na Isiraelita tenia i Esipito.”

¹¹Ma o Moise ki vi tanga God, ki vi: “Bâ, inê ki na marâ purua ma. I pe arariê vi ve arâ i pasina na maneraha, hanana ve bêngenira hura na Isiraelita tenia i Esipito.”

¹²God ki arami, ki vi: “Inê kê page ngahisigo. Ma na matena go bêngenira hura na enoni tenia i Esipito, igamu kamu page rahêsiê igê na hungana ikê. Na tarana ngekê ki page hagatanga monari reniê, vi inê kanigê hagatorangenigo.”

¹³Ma o Moise ki arami, ki vi: “Manga vi gê arâ ma kê vi tangara na Isiraelita, kê vivi, ‘Na God na êvarimi ga rahesia, kani hagatorangeniê me tangagamu, hoi, ngaira ka page hagateê,’ ka vivi, ‘Ti ka na atana?’, ma kê aramira bâ hega?”

¹⁴God ki vi: “Inê nga nga ani.” Go vi tangara, ko vivi, Na ani ga hêtana vi ‘Inê nga nga na ani’ kani hagatorangeniê me tangagamu.

¹⁵Gu hagarongora na Isiraelita, vi inê na God na êvarita ga rahesia; inê na God o Abarahamo, o Isako mo Jakobo ga rahesia, kanigê hagatorangenigo tangara. Na ataku ngekê ki gâgâ hagahu. Na ara ni apaparaha i muri me, ki bê ki arâ, ki tuguhira, viga visiê nga vikana.

¹⁶Gu râ ma ku hagahakura na enoni raha hato iata na Isiraelita ma ko hagarongora, vi inê na Araha, na God na êvaritâ ga rahesia, na God o Abarahamo, o Isako ma o Jakobo ka rahesia, kanigê vora tangago. Gu hagarongora, vi inê kê bani vatugira, ma kê bani bâsira na ai ni Esipito ga hagamamasiagara.

¹⁷Inê kê bani kato, vi gê page torera hura tenia i Esipito, suria na ai ni Esipito ka hagamamasiagara ngavê igê. Inê kê page bêngenira tanga na agua na mako koro i hatahata tangara na togoha, tanga na agua iata na Kananita, na Hitita, na Amorita, na Perisita, na Givita ma na Jebusita.

¹⁸“Hoi, na kariaku ka page têtê viteamu. Ma hemuri igo ma ngaira na enoni raha iata na Isiraelita, kamu arâ nga i pasina na maneraha i Esipito. Go vi tanga, ko vivi, ‘Na Araha, na God na Isiraelita ga rahesia, kani hagagiraragami renia marena. Hoi, gu nakagami, kami tavoraha banu igê na bagamasusu raha tanga na agua, i hagatê na tangiani gi oru, hanana mi vogasia igê na Araha God iamami.’

¹⁹Inê kê bani girara, vi na maneraha i Esipito ki page manimanigamu, vigamu arâ, manga vi inê ma kê pe hagabângenia na raramohaku tanga.

²⁰Ma inê kê page hagabângenia na raramohaku ma kê page hagaitangia i Esipito renigi na mena, ga page hagamagusira.

²¹“Inê be katora na ai ni Esipito, ke hagahigasigamu, hanana na kariaku ki asa vige aharaga baguru.

²²Na ara ni hehene na Isiraelita ki nungia so nga na gete ni Esipito i gâgâ i pasina ma na gete ni Esipito i mebasigu hetanga renigi na gahu ma na rêni na golo ma na siliva. Na Isiraelita ka hagarênira nga o kareta ma ka kareta renigi. Vikana na Isiraelita ka page raugi na ruruguha iata na ai ni Esipito.”