Read Kahua TAHINGA 34 Bible Online

TAHINGA 34 - Kahua bible

TAHINGA 34

¹Na Araha ki vi tanga o Moise, ki vi: “Gu tahererua na hê aberabera gi rua mangarerua na ani i nago. Inê kê page segegi igê na tamasinga, gê bani sege igê na ani hagenago, go menamenarirerua.

²I gomaha mavoraro go nanê ma ko tagere me ikê igê na botena na hungana i Sinai.

³Siana vi ta na enoni ki arâ me henigo. Siana vi ta na enoni ki gâga i tagua ma igê na hungana. Siana vi ta na sipi se vi na puruka se vi na goti ka ngêngê igê na hunana na hungana.”

⁴Hoi, o Moise ki tahererua na hê aberabera haoru, ma igê na mahogotana i tangi me, ngaia ki rite ma ki merarâ tagere igê na hungana i Sinai, manga i bani bonasia na Araha renia.

⁵Na Araha ki so me igê na vaha, ma ki ura henia i ngekana, ma ki visia na atana apuna, i vi Araha.

⁶Na Araha ki ri i maana ma ki vi: “Inê na Araha ka na God ni takuiha ma ni hetakiha, gê haritagi, kê hagamonarigi tare na tamasinga iaku, ma ki teha i pasiku na hetakuiha.

⁷Inê kê hagamonaria na suruha iaku tare, ki bê ki arâ. Inê kê bonotenigi na eraha ma na tasi. Inê be hagaitangira nga na enoni mataruhira na oruta ma na heta na apaparaha iata renigi na tasi iata na êvarita.”

⁸O Moise ki hatani tubê so i ano ma ki rahesia.

⁹Ngaia ki vi: “Araha, manga vi igo ma ko obakoro reniê monari, inê kê nungigo, hanana go arâ me henigami. Na enoni ngegana ka guguruga bâraha. Gu bonotenigi na eraha ma na bagaparongamami. Gu makuanigami, suria igami ka na kariamu maremu.”

¹⁰Na Araha ki vi tanga o Moise, ki vi: “Hoi, inê be naka na suruheri henira na Isiraelita. Inê be katogi i maata na mena, i asa vige bani bâsigi me rârâ i nago i ta agua mavê i maveta, se vi i pasita na ani mavê na enoni i maveta. Na enoni hato ka page bâsigi na mena inê nga na Araha kê girara gê katogi. Na mena gê katogi tangago ka page hagakonera na enoni.

¹¹Mu marupegi nga na ramata, gê vategamu renigi i ngekê. Inê be paira hura na Amorita, na Kananita, na Hitita, na Perisita, na Givita ma na Jebusita, matena mu mataro me kamu guruguru parera.

¹²Siana kamu heaganari henira na enoni, ga oga igê na agua mu arâ tanga, suria na tarana ngekana ki manga na sutasuta mu meme igê.

¹³Mu hogegi hete na bea ni vogasiha iata ma na u na hê apuna iata, ma kamu tapitapi menamenarigi na nununa ka Asere na ataro.

¹⁴“Siana kamu hagarapera na ani mavê na ataro, suria inênga na Araha kê kitenira ngavê.

¹⁵Siana kamu heaganari henira na enoni igê na agua, suria, matena ga vogasira ma ka susu tangara na ataro iata, ngaira ka page unigamu, hanana vigamu hakunira. Vikana ngaira ka uhungigamu, kamu ngaugi na ngêra, ga vogasira na ataro iata renigi.

¹⁶Vari o karemi ka page auragira na gete mahuara ngegana. Vikana ngaira ka page katora, ka pe tototo suriê hete, ma ka vogasira na ataro ma iata.

¹⁷“Siana kamu tagarahigi na nunuta na ataro renigi na golo, na siliva ma na marâ vigana.

¹⁸“Mu hagahigasigi na tangiani raha ni bereti i pe ahunga. Manga gê bani bonasigamu, mu ngaugi ma na bereti i pe ahunga surigi na tangiani gi pi igê na hageha na Abibi, suria igamu kamu hura tenia i Esipito igê na hageha ngekana.

¹⁹“Na ara ni bêbê ni kare mane ma na kareta hagâkani na togoha, ngaira ka na aniku.

²⁰Ma igamu ki tuguhigamu, vigamu vurivuri pusia na ara ni kareta hagâkani na tonki renia na karena sipi, mu tagarenia baruna. Manga mu pe vurivuri pusia, mu nguria nga na riona. Ma ki tuguhigamu, vigamu vurivuri pusia na ara ni bêbê ni kare mane. I na ara ni matena mu arâ me i pasiku, siana kamu têrahe renigi na votovoto tangê.

²¹“Na tangiani ge ono ka tâ tangagamu, vigamu tagara surigi. Siana kamu tagara igê na pita na tangiana, naka ma igê na mateni ni hasinga se ni âpaha.

²²“Mu hagahigasia na tangiana raha ni nagoni na mu, matena mu haganega kamu âpâpa ma kamu huhuhu na ngêra. Mu hagahigasia na tangiana raha ni ruhu igê na matena ni turituriha, matena mu husihusi na guani na apinige ni ngauha.

²³“Na ara ni mane hato i pasimi ki tuguhira, viga arâ ka rahesiê, inê na Araha God iata na Isiraelita, hageoru i na ara ni harisi.

²⁴I murina gê tarigenira hura tarami na merongami, ma kê sugasuga na taritarihami, na merongami ki asa vige uhungia, ke henahuraua na agua iami surigi na tangiani raha gi oru ngegana.

²⁵“Siana kamu vogasiê renigi na ganiani henigi na bereti i ahunga. Siana kamu nakanaka râ tagua na ganiani mu nahuira igê na tangiana raha na Paseka tanga na tangiana i muri.

²⁶“I na ara ni harisi ki tuguhigamu, mu tagarenigi na nagoni na mu iami tangê i ruma iaku, inê na Araha. Siana kamu hagamakoa na bêhâgana na sipi se na goti renigi na nongani na susuna kenana.”

²⁷Na Araha ki vi tanga o Moise, ki vi: “Gu segegi so na ramata hato igê, suria ngaigi ka na hunana na suruheri iaku henigamu, igo ma na Isiraelita.”

²⁸O Moise ki oga i ngekana henia na Araha surigi na tangiani ma na bungiani tangahuru ge he. Ngaia ki pe ngê ma ki pe tono rârâ. Ngaia ki segegi igê na hê aberabera gi rua na tamasinga na suruheri, i vi na tangahuri ramata.

²⁹Matena o Moise ki merere me na tangahuri ramata tenia na hungana i Sinai, na maana ki togatoga ngavê, suria i metamasi na Araha. Ma ngaia marena ki pe girara, vige togatoga vikana.

³⁰O Aroni ma na enoni hato ka boretenia o Moise, ma ka bâsia, vi na maana kani togatoga, ma ngaira ka magu vige ura me hagarangia.

³¹Ma o Moise ki unira o Aroni ma na enoni raha hato iata na Isiraelita ka râ me i pasina, ma ki meratamasi.

³²Ma hemuri na Isiraelita hato ka haku rihia ma o Moise ki bonasira, ka marupegi na ramata hato, na Araha ki vatea renigi igê na hungana i Sinai.

³³Matena o Moise ki meratamasi hato, ngaia ki buhia na maana renia na gahu.

³⁴I na ara ni matena o Moise ki bêbanu i ruma na gahu iana na Araha, hanana vi metamasi, ngaia ki tavoa râ na gahu tenia na maana. Matena i huhura me, ngaia ki hagarongora na Isiraelita renigi na ara ni marâ hato, na Araha ki bonasia renigi, hanana vi visigi tangara.

³⁵Matena ngaira ka bâsia, vi na maana ki togatoga, ngaia ki buhia aporo na maana, mataro me ki arâ nikâ ki metamasi na Araha.