Read Kahua TAHINGA 35 Bible Online

TAHINGA 35 - Kahua bible

TAHINGA 35

¹O Moise ki unihakura na ara ni Isiraelita hato, ma ki vi tangara, ki vi: “Na Araha ki bonasigamu vikê.

²Na tangiani ge ono ka tâ tangagamu, vigamu tagara igê. Na pita na tangiana ngaia ki na tangiana apuna, na tangiana raha ni mamaroha, na tangiana iaku inê na Araha. Manga na anima na enoni ma ki tagara igê na tangiana ngekana, ka hagamesia nga.

³Naka ma na gi, ngaia ki apu nikâ vige tanga igê na tangiana ni mamaroha.”

⁴O Moise ki vi tangara na Isiraelita hato, ki vi: “Na Araha ki haribona vikê:

⁵Mu mahata tanga na Araha. Na anima na enoni ki obania vikana, ngaia ki tagarenigi tanga na Araha, na golo, na siliva, se na kapa i higa;

⁶na gahu siki ni Esipito, na gahu maravarava, rotorotoaga memera ma ka memera, ga tagarahigi renigi na varehuta na sipi; na gahu ga tagarahigi renigi na varehuta na goti;

⁷na gavota na sipi mane ga taruhigi ka memera; na gavota mamao ma manihinihi; na gato na apinige na akasia;

⁸na oile tangagi na laiti; na marâ i sigini koro na vanuhani tanga na oile ni moneha ma na marâ i sigini mamaki tanga ga sungigi;

⁹na hê ga raha na meni na ani memera ma na ani getigi tanga na gahu ni parematona na mane ni vogasiha i teha ma tanga na anga ni girarasiha igê.

¹⁰“Na ara ni mane ni manisingeniha i berarogami, ka nanê nga, hanana ga tagarahigi na marâ, na Araha i haribona renigi.

¹¹Ngaigi kani igê: na ruma na gahu apuna henigi na gerina ma na bubuhina i haha i metara, na kavikavi, na apinige na apê hagêra, na bênivoro, na u ma na kiru tangigi na hunani;

¹²na bokesi na suruheri henigi na apinige ni tugiha, na bubuhina ma na gahu i kuku pusia banu;

¹³na bea henigi na apinige ni tugiha ma na ara ni marâ tanga; na bereti apuna iana na Araha;

¹⁴na atohana na laita henigi na ara ni marâ tanga; ngaigi na laiti henigi na oile;

¹⁵na bea ni vogasiha ni sungiani na marâ i sigini koro henirerua na apinige ni tugiha; na oile ni moneha; na marâ i sigini mamaki matena ga sungia; na gahu i kuku i maana na ruma na gahu apuna;

¹⁶na bea ga susu igê tanga na Araha henia na bea aberabera ga hêria renigi na sigani na kapa henigi na apinige ni tugiha ma na ara ni marâ hato tanga; na maraguhu ni tananiha henia na hunana;

¹⁷na gahu ga kuku rihuia na mahera henigi na u ma na kiru tangagi na hunani; na gahu tanga na maana na mahera;

¹⁸na rapurapu ma na varo tanga na ruma na gahu apuna;

¹⁹ma na gahu bâkoro ni mane ni vogasiha tanga na matena ga tagara igê na kiboru apuna: ngaigi ka na gahu tangara o Aroni na mane ni vogasiha mo karena.”

²⁰Na Isiraelita ka aharo vê ka râ.

²¹Na anima na enoni ga obania vi katokato vikana, ngaira ka migirâ me na mahatanga iata tanga na Araha, tanga ga tagarahia na ruma na gahu apuna iana na Araha renigi. Ngaira ka migirâ me na ara ni marâ hato ga obanigi tanga na hagarahenga ma tanga ga tagarahigi re na gahu ni mane ni vogasiha.

²²Ngaira hato na mane ma na gete ga agana hanana viga tagarenigi tanga na Araha na mahe na golo, ngaira ka migirâ me: na pini na mahe, na mumu ni karinga, na rago ma na ringi, na konokono ma na ani mavê na marâ na golo.

²³Na enoni ga nahunigi na gahu siki ni Esipito, na gahu maravarava, rotorotoaga memera se ga memera na varehuta na sipi, na gahu na varehuta na goti, na gavota na sipi mane ga pupunigi memera se na ani ga mamao ma ka manihinihi, ngaira ka migirâ me ka tagarenigi.

²⁴Na ani ga obania viga tagarenigi na siliva se na kapa i higa tanga na Araha, ngaira ka migirâ me. Na enoni ga nahunigi na apinige na akasia na mane tagara ga obanigi, ngaira ka migira me.

²⁵Na gete hato ni manisingeniha i garoroha, ngaira ka migirâ me na garo siki ni Esipito ma na garo maravarava, rotorotoaga memera ma ka memera na varehuta na sipi.

²⁶Ngaira ka garorogi nikâ na varehuta na goti.

²⁷Na meraha ka migirâ me na hê ga raha na meni, na ani memera ma na ani getigi, tanga na gahu ni parematona ma tanga na anga ni girarasiha.

²⁸Ngaira ka migirâ me nikâ na marâ i sigini koro na vanuhani, na oile tangagi na laiti, ma na oile tanga na oile ni moneha ma tanga na marâ i sigini mamaki, matena ga sungia.

²⁹Na Isiraelita hato ga obania, ngaira ka tagarenigi na mahatanga iata tanga na Araha tangagi na marâ na Araha i bonasia o Moise, hanana vi tagarahigi.

³⁰O Moise ki vi tangara na Isiraelita, ki vi: “Na Araha ki bani atea o Besalele, o karena o Uri. O virana ka no Gure. Ngaia ka na raraha iana o Juta.

³¹Na raramohana God ki angaria ma ki bani vatea renigi na aitangisiha, na giraraha ma na manisingeniha ni tagarahiani na marâ i bâkoro,

³²hanana i takusigi, ki segegi ma ki tagarahigi na marâ bâkoro renigi na golo, na siliva ma na kapa i higa;

³³hanana i retegi na hê ga raha na meni, ki hanga renigi igê na kiruni; hanana i tahetahe ma ki tagarahigi na ani mavê na marâ i bâkoro.

³⁴Na Araha ki haganahunirerua ngaia mo Oholiaba, o karena o Agisamaka tenia na raraha iana o Tane renia na giraraha, hanana garu hagesurira na mane getera renia na manisingeniha iaterua.

³⁵Na Araha ki katorerua karu manisingenigi na tagaraha hato ga katogi na mane ni taritariha, na mane ni segesegeha, na mane ni hêhênga: na gahu siki ni Esipito ma na gahu maravarava, rotorotoaga memera ma ka memera na varehuta na sipi ma na gahu getigi. Ngaira ka aitangisigi na ani mavê na tagaraha ma ka manisingenia na segeseha ni katoha.