Read Kahua TAHINGA 37 Bible Online

TAHINGA 37 - Kahua bible

TAHINGA 37

¹O Besalele ki tagarahia na bokesi na suruheri renia na apinige na akasia. Na borahusigana ki 1 mita ma na 25 sentimita. Na aberaberagana ki 75 sentimita ma ki 75 sentimita ki akê.

²Ngaia ki taruhigi na rarona ma i metara renia na golo taranina ma ki naka na tarina na golo rihuia.

³Ngaia ki tagarahigi na ringi na golo ge he tanga ga tugia igê ma ki nakagi igê na bêni kê na êgana ge he: na ani gi rua i ta apanena ma i ta apanena.

⁴Ngaia ki tagarahirerua na apinige na akasia ni tugiha ma ki taruhirerua renia na golo ma ki suvarenirerua igê na ringi i na apanenaheri na bokesi na suruheri.

⁶Ngaia ki tagarahia na bubuhina renia na golo taranina. Na borahusigana ki 1 mita ma na 25 sentimita ma na aberaberagana ki 75 sentimita.

⁷Ngaia ki tagarahirerua na nunuterua na angero renia na golo:

⁸tani igê ta bogona ma i ta bogona na bubuhina. Na bubuhina haku henirerua na angero ka na golo gi tage ma.

⁹Na angero karu matohetanga ma karu gasigi hetanga na gagahaterua i avorona na bubuhina.

¹⁰O Besalele ki tagarahia na bea renigi na apinige na akasia. Na borahusigana ki 1 mita ma na aberaberagana ki 50 sentimita ma na 75 sentimita ki akê.

¹¹Ngaia ki taruhia renia na golo taranina ma ki naka na tarina na golo ki rihu igê.

¹²Ngaia ki naka na tarina na 8 sentimita na golo rihuia na akerena ma tani na tarina na golo nikâ ngaia ki naka ki rihu i murina hura.

¹³Ngaia ki tagarahigi na ringi ge he ni tugiha ma ki nakagi tonganigi na sukuni ge he ga oga igê na êgani.

¹⁴Na ringi tangarerua na apinige ni tugiana na bea ka oga i ruguhana na tarina i murina hura.

¹⁵Ngaia ki tagarahirerua na apinige ni tugiha gi rua renigi na apinige na akasia ma ki taruhirerua renia na golo.

¹⁶Ngaia ki tagarahigi na apira, na ani raha na na ani sisite, na kâkâ, na pi tanga na vaini ni vogasiha ma na marâ vigana renigi na golo taranini.

¹⁷O Besalele ki tagarahia na atohana na laiti renia na golo taranina. Ngaia ki tagarahigi na hunana, na gatana henigi na takani ga ahaketa ma na ani ga pe ahaketa renigi na golo. Ngaigi hato ka vora na golo gitage togo ma.

¹⁸Na arani ge ono ka hura me tenia na gatana: gi oru i ta apanena ma i ta apanena.

¹⁹Na ara ni hitangini ki nahunigi na takani gi oru manga na memeapu: tani ka ahaketa ma tani ki mareha.

²⁰Na gatana na atohana na laiti ki nahunigi na takani ge he ngegana: tani ka ahaketa ma tani ka mareha.

²¹I ruguhana na ara ni arani ga bê hetanga, ki oga igê na takana i pe ahaketa.

²²Na hunana, na gatana henigi na arani ma na takani ki na golo gi tage togo na.

²³Ngaia ki tagarahigi na laiti gi pi tanga na atohana, na laiti henigi na eahi ma na kere apira tanga renia na golo taranina.

²⁴Ngaia ki tagarahia na atohana na laiti henigi na ara ni marâ hato tanga renigi na 40 kilo na golo taranina.

²⁵O Besabele ki tagarahia na bea renigi na apinige na akasia tanga ga sungigi igê na marâ i sigini koro. Ngaia ki heavore na akerena. Na borahusigana ki 50 sentimita. Na aberaberagana ki 50 sentimita ma ki bê tagere ki 1 mita. Na bugusuni igê na sukuni ge he ka rato haku henia na bea.

²⁶Ngaia ki buhigi na gerina, na apaneni ge he ma na bugusuni renigi na golo taranina ma ki naka na tarina na golo ki rihuia na akerena.

²⁷Ngaia ki tagarahigi na ringi na golo ge he ni tugiha: gi rua tanga ta apanena ma tanga ta apanena. Ngaia ki nakagi i ruguhana na tarina na golo tangarerua na apinige ni tugiha.

²⁸Ngaia ki tagarahirerua na apinige ni tugiha renigi na apinige na akasia ma ki taruhirerua renia na golo.

²⁹Ngaia ki tagarahigi na oile ni moneha apuna ma na marâ i sigini mamaki matena ga sungigi manga na mane i toraria na marâ ni moneha ni ape sigini koro.