Read Kahua TAHINGA 40 Bible Online

TAHINGA 40 - Kahua bible

TAHINGA 40

¹Na Araha ki vi tanga o Moise, ki vi:

²“Igê na tangiana na haganegana na hageha hagenago go gasia na ruma na gahu iaku inê na Araha.

³Go naka igê na bokesi na suruheri, ga oga igê na tangahuri ramata, ma ko kuharenia na gahu igê na maana.

⁴I rarona ko naka igê nikâ na bea ma ko hagarêgi igê na ara ni marâ. Go naka banu nikâ igê na atohana na laiti henigi na laiti igê.

⁵Go naka na bea na golo tanga ga sungigi igê na marâ i sigini koro i maana na bokesi na suruheri, ma ku kuharenia na gahu i maana na ruma na gahu apuna iaku.

⁶Go naka i maana na ruma na gahu iaku na bea ga susu igê na votovoto.

⁷Go naka na maraguhu ni tananiha i berarogaterua na ruma na gahu apuna iaku ma na bea ni vogasiha ma ku hagavunusia renia na ve.

⁸Go ahia ki ririhu na agua hagenani ngekana renigi na gahu ma ko kuharenia na gahu igê na agua ga bêbanu igê.

⁹Ma hemuri ko hagapugi na ruma na gahu iaku ma na ara ni marâ hato getegi renia na oile apuna, hanana na ara ni marâ ngegana ka apuna.

¹⁰Hemuri ko hagapua na bea ni vogasiha henigi na ara ni marâ hato igê renia na oile, hanana ngaigi hato ki apuna.

¹¹Go hagapurerua vikana nikâ na maraguhu ni tananiha ma na bea i oga igê.

¹²Go unira o Aroni ma o karena tanga na maani ruma na gahu iaku, ma ko tananira renia na ve, hanana ga matarotaro i maaku.

¹³Go hagatugunia o Aroni renigi na gahu iata na mane ni vogasiha, ko monea renia na oile apuna. Vikana ngaia ki apuna ma ki araria, i tagara tangê manga na mane ni vogaiha.

¹⁴Gu unira me o karena ma ko hagatugunira renigi na tuguni iata na mane ni vogasiha.

¹⁵Hemuri ko monera nogata renia na oile apuna manga o vaemata, hanana ngaira ka girara ga tagara tangê manga na mane ni vogasiha. Na moneha ngekana ki katora, ka voravora re na mane ni vogasiha tare ki bê ki arâ.”

¹⁶O Moise ki katogi vigana surigi na tamasinga iana na Araha tanga.

¹⁷Vikê na tangiana na haganegana na hageha hagenago igê na ruata na harisi i murina ga hura tenia i Esipito, ngaira ka gasia na ruma na gahu apuna iana na Araha.

¹⁸O Moise ki nakagi so na apinige na peregana na ruma, ki hagêrasigi na u igê, ma ki nakagi na bênivoro ma na gogohane.

¹⁹Ngaia ki gasia na ruma na gahu iana na Araha ma ki buhia hagenani renia na ani getea na gahu, manga na Araha i bani bonasia renia.

²⁰Ngaia ki nakarerua na hê aberabera gi rua i rarona na bokesi na suruheri. Ngaia ki suvarenirerua na totora gi rua i na apanenaheri na bokesi ma ki buhia.

²¹Hemuri ngaia ki naka na bokesi i rarona na ruma na gahu apuna ma ki kuharenia na gahu pusia, hanana siana ka bâsia, manga na Araha i bani bonasia renia.

²²Ngaia ki naka na bea i rarona na ruma na gahu i mahana na gahu i kuku i maana na ruma na gahu apuna iana na Araha.

²³Ma igê na bea ngaia ki nakagi igê na bereti, ga tagarenigi tanga na Araha, manga na Araha i bani bonasia renia.

²⁴Ngaia ki naka na atohana na laiti i rarona na ruma na gahu i na apanena râ i otona na bea.

²⁵Ngaia ki tangagi na laiti tanga na Araha, manga na Araha i bani bonasia renia.

²⁶Ngaia ki naka na bea ni vogasiha na golo i rarona na ruma na gahu i na apanena hura na kiboru apuna,

²⁷ma ki sungigi igê na marâ i sigini koro, manga na Araha i bani bonasia renia.

²⁸Ngaia ki kuharenia na gahu i maana na ruma na gahu.

²⁹Ma i na apanena hura ngaia ki naka igê na bea tanga ga susu igê. Ngaia ki susu igê na ganiani ma na koni, manga na Araha i bani bonasia renia.

³⁰Ngaia ki naka na maraguhu ni tananiha i berarogaterua na ruma na gahu ma na bea ni vogasiha ma ki hagavunusia renia na ve.

³¹I na ara ni matena o Moise, o Aroni ma o karena ka bêbanu igê na ruma na gahu se tanga na bea ni vogasiha, ngaira ka tanani rima ma ka tanani uga i ngekana.

³³O Moise ki ahia rihu na ruma na gahu ma na bea ni vogasiha ma ki kuharenia na gahu igê na agua ga bêbanu igê. Hoi, ga hato na ara ni tagaraha hato iana.

³⁴Na vaha ki buhia na ruma na gahu ma na bâbâhana raha na Araha ki raro igê.

³⁵Tahema o Moise ki bara vige banu igê.

³⁶I na ara ni matena na vaha ki akê tenia na ruma na gahu, na Isiraelita ka tatavoraha hanana ga taunga nikâ i tagua.

³⁷Matena i gâga ma na vaha, ngaira ki asa iata vige tavoraha.

³⁸Igê na râha iata hagenani ngaira ka bâsia tare na vaha igê na ruma na gahu iana na Araha igê na tangiani, ma igê na bunigani ngaira ka basia tare na gi i mave.