Read Kahua TAHINGA 7 Bible Online

TAHINGA 7 - Kahua bible

TAHINGA 7

¹Na Araha ki vi: “Bâ, o veogamu o Aroni ki page tamasi urusigo. Ngaia ki page tamasigi na tamasinga iamu tanga na maneraha, tagenana manga God ki tamasi i harana na poropete tangara na enoni.

²Go hagarongoa nga o Aroni renigi na ara ni marâ, gê bonasigo renigi, ma ngaia kani page bonasia na maneraha, hanana i hagamarumungenira na Isiraelita, ka huhura tenia i Esipito.

³Ma inê kanigê katoa na maneraha ki togeaga ma ki pe têtê viteamu, naka ma hagehita kê katogi na mena na raramoha raha, i nahuia i Esipito.

⁴Suria na maneraha ki usi vige tê viteamu, tahema inê kê page hagaitangia ngavê i Esipito, ma kê page bêngenira hura na Isiraelita na kariaku tenia i Esipito.

⁵Matena gê hagaitangia igê i Esipito ma kê bêngenira hura na Isiraelita tenia, na ai ni Esipito ka kahu aitangisiê, vi inê nga ki na Araha.”

⁶O Moise mo Aroni karu râ surigi na tamasinga iana na Araha tangarerua.

⁷Igê na matena garu tamasi tanga na maneraha i Esipito, o Moise ki tonga na harisi iana 80, ma o Aroni ki tonga na harisi iana 83.

⁸Na Araha ki vi tangarerua o Moise mo Aroni, ki vi:

⁹“Manga vi na maneraha i Esipito ma ki obania na mena, hanana vi hagatanga monari renigamurua, hoi, igo o Moise ko vi tanga o Aroni, ki kasia so i ano na vato iana i maana na maneraha. Na vato ki page voravora re na ma.”

¹⁰Hoi o Moise mo Aroni karu râ i pasina na maneraha ma karu kato manga i bani bonasirerua na Araha. O Aroni ki kasia so i ano na vato iana i maata na maneraha ma na kariana, ma na vato ki vora re na ma.

¹¹Ma na maneraha ki unira me na mane ni hagaotonga ma na mane ni girarasiha iana, ma ngaira ka kato vikana nogata igê na anita na mangataniha.

¹²Ngaira ka kasigi so i ano na anita na vato ma na vato ka vora re na ma. Ma na vato iana o Aroni ki unumigi na anita.

¹³Henaka, ma na maneraha ki ama ni togeaga nga, manga i bani visia na Araha. Na maneraha ki usi vige tê viteaterua o Moise mo Aroni.

¹⁴Ma hemuri na Araha ki vi tanga o Moise, ki vi: “Na maneraha i Esipito ki togeaga bâraha ma ki usi vige hagamarumungenira hura na Isiraelita.

¹⁵Hoi, gu râ vurusia nga igê na mavoraro, matena i soso tanga na ve i Nile. Go torea henigo na vato, go bani katoa noga renia na mena na ma. Go naasia i na akerena na ve.

¹⁶Go vi tanga na maneraha, ko vivi, ‘Na Araha, na God na Isiraelita ga rahesia, ngaia ki hagatorangeniê, hanana vigê nungigo, ko hagamarumungenira hura na kariana, hanana ngaira ka girara ga rahesia igê na bagamasusu raha. Ma ki mataro me i ngekê, igo ko ama ni manimanira ngavê nga.

¹⁷Hoita maneraha, na Araha ki vi, vi igo ko page aitangisia, vi o ti kani ngaia renigi na tarani i page katogi. Bâ, inê be tahurua na basina na ve renia na vato ikê, ma na ve ki page voravora re na gapu.

¹⁸Na siare igê ka page meme, ma na ve ki page mapu ngavê, ma na ai ni Esipito ka page makimaki tenia vige tono.’”

¹⁹Na Araha ki vi tanga o Moise, ki vi: “Go vi tanga o Aroni, ki tagarenia rârâ na vato iana surigi na ara ni ve, na âpavoro ma na rano hato i Esipito. Na ve hato ka page voravora re na gapu suria i Esipito hagenani ma igê nikâ na apira ma na pi na hê ni ve.”

²⁰Hoi, o Moise mo Aroni karu kato manga i bonasirerua na Araha. I maata na maneraha ma na kariana o Aroni ki têa akê na vato iana ma ki tahurua na basina na ve, ma na ve hagenani ki vora re na gapu.

²¹Na siare igê ka me. Na ve ki mapu ngavê ma na ai ni Esipito ka makimaki tenia vige tono. Na ara ni ve hato i Esipito ka vora re na gapu.

²²Ma na mane ni girarasiha iana na maneraha ka kato vikana nogata igê na anita na mangataniha. Na maneraha ki ama ni togeaga nga manga i nago. Ngaia ki usi vige tê viteaterua o Moise mo Aroni, manga i bani visia na Araha.

²³Ngaia ki murisigererua so ma, ma ki aporo i ruma raha iana ma ki pe gagêmaga rârâ renia na tarana ngekana.

²⁴Na ai ni Esipito hato ka oparigi na vekaru haninia na akerena na ve, hanana viga totono igê, suria na ve i Nile ki gagapugaga.

²⁵Na hagaitangiha ngekê ki oga surigi na tangiani gi pi.