Read Kahua JOBE 10 Bible Online

JOBE 10 - Kahua bible

JOBE 10

¹Inê kê usitenia na ogaha ngekê. Inê kê girara ma gê hagagege. Inê kê tamasi mahemaheaga ma.

²Tahema inê kê vi tanga God, kê vi: Siana ko vi, vi inê kê tasi. Visia me, tanu hega go toreê igê na tamasinga?

³I hega, i oto ma tangago vari vigo pe katoê bâkoro? Igo kanigo hagavorê! Ma ki tanu hega go kiteniê? Tanu hega go pane henira na eragani nuni ma ko pe botage reniê inê?

⁴I hega kanigo bâsigi na marâ tagenana ma manga igami na enoni mi bâsigi?

⁵I hega na mêriha iamu ki abubu manga igami? I hega, igo ko girara go meme manga igami?

⁶Vikana, tanu hega go harisurigi na tasi hato iaku? Tanu hega go garigi na ara ni bagatauhaku?

⁷Igo ko bani girara, vi inê kê pe tasi. Igo ko bani girara nikâ, vi i asa rârâ ta na enoni vige hagatahiê tenigo.

⁸Na rimamu karu tagarahiê ma karu maningaiê. Ma ki hega na rimamu ngegana kani garu rumurumugiê?

⁹Bâ, igo kanigo bani tagarahiê renia na mako. Ma ki hega, go rumurumugiê kê voravora aporo re na mako?

¹⁰Igo ko haganahunia o vaemaku renia na ramoha, hanana i aparê. Igo ko hagatotoê i obana kenaku.

¹¹Igo ko hagatotoa na apeku renigi na suriku ma na varugiku ma ko baraigi na suriku renigi na hasigoku ma na gavoku.

¹²Igo ko katoê kê mauri ma ko takuiê ma ko marupeê kê ama ni mauri nga.

¹³Ma i ngekê inê kê kahu girara, vi i na mateni ngegana igo ko bani kato pinihi vigo hagaerasiê.

¹⁴Igo ko mamasuriê, manga vigê tasitasi, hanana go hagaitangiê.

¹⁵Pusina ma gê tasitasi râ, ma igo ko hagaitangiê. Ma na mateni gê tanugi na tarani ga oto, inê kê ama ni magutenia nga na hagaitangiha. Inê kê hataera ma kê maki ngavê.

¹⁶Manga gê kere akê me maninga, igo ko gamorahiê manga na laione. Igo ko uhungigi na ani mavê na tarani, hanana vigo puriê so i ano.

¹⁷Tarema igo ko akê me henira na enoni ga tuguriê igê na tamasinga. Na mangariaganiha iamu ki ama ni raharaha nga tangê. Na merongasiha go katoa tare tangê, ki ama ni raharaha nga.

¹⁸Tanu hega God, ko nakê kê vora me? I araria ve bani me vê hete i obana kenaku, hanana siana ta na enoni ke basiê!

¹⁹Be hura ototo râ tenia na obana kenaku tanga na kiru. Ge koro manga vi ve bani mareha vê.

²⁰Na mêriha iaku ki sugi hato, iê? Nakê so, hanana ve vagevagesia na mêriha i hita so mênga.

²¹Inê kê sugi arâ ma kê arâ su. Gê arâ tanga na agua ni mengo ni mera.

²²Na agua ni roto hono ma ni hihite nuni, na agua ni hagagara eraha. Ma i ngekana na mavetana ki manga na bungiana.”