Read Kahua JOBE 11 Bible Online

JOBE 11 - Kahua bible

JOBE 11

¹O Sopare ki tamasi, ki vi:

²“Ta na enoni ke aramigi râ noga na tamasinga bekabekaga hato ngegana. Na tamasinga borahu ki hagatanga monari vari, vi na enoni i tamasi ngekana, ki oto?

³Jobe, go takusia vari, vi na tamasinga iamu ka hagabigami? Go takusia vari, vi igami ki bara, vigami urusigi bê aporo na tamasinga iamu, go erasigami renigi?

⁴Igo ko vi, vi na tamasinga iamu ki monari. Igo ko vi, vi igo ko matarotaro i maana God.

⁵Manga vi God ke tamasi, vikê ke koro, hanana ge hura me na monariha.

⁶God ki hagabângenia, vi ngaia ki tako mataha ngavê teharigia. Na enoni ki bara ngavê, vige aitangisigi bâkoro na tauhana. Vikana igo ko kahu tahetara, vi God ki pe hagaitangigo bâraha, hanana vige ararigo.

⁷I hega igo ko girara vari na pereperegaterua na raramohana ma na arahanga iana God?

⁸Na vavearo ngaia ki mareha vi na pereperegana na raramohana God. Na raramohana ki teharia akê ngavê. Ma ku bâ! Igo ko arisia na vavearo! God ki aitangisia na agua iata na enoni ga bani me ma igo ki mareha ngavê.

⁹Na maveta ma na asi karu mareha vi na pereperegana na arahanga iana God. Na arahanga iana ki teharirerua ngavê.

¹⁰Manga vi God ma ke rakugo ma ke torego igê na tamasinga, ti ki girara i hagabarasia?

¹¹God ki aitangisira na enoni ga pinihigi na bagaitangihata. Ngaia ki bâsigi na ara ni bagatauhata ma ki nakagi i obana.

¹²Na bonobê ki tamasi bekabekaga tare. Na bo na bo.

¹³Jobe, igo ko pe manga ngekana. Igo ko girara go urisi parongamu. Gu aharia God.

¹⁴Gu kasigi râ na bagatauhamu. Siana ko nakagi na eraha i pasimu.

¹⁵Vikana kanigo page bâbâ rikiriki aporo. Igo ko page ramoramo aporo ma ke hato vigu magu.

¹⁶Vikana igo ko page bonotenigi na mamasiaganiha hato iamu ma ko page takusigi sisite râ ma. I manga na maganuha raha i hatohato râ ma ka bonotenia vê.

¹⁷Na ogaha iamu ki page mave teharia na arito igê na ritovagana. Ma na roto hono raha na ogaha iamu ki page raboa manga na arito.

¹⁸Igo ko page asitatara ma ko page takotako togo. God ki page ngahisigo matena go mauru igê na bungiana.

¹⁹Igo ko page mamaro suri parongamu. Na enoni rako ka page avarasigo.

²⁰Ma na enoni ga murisigea God ki asa iata vige tarahua na hetamaniha, ma ka page tahetara, vi i asa vige tahi. Ngaira ka naasia ma viga meme rêrê.”